Nau Kơp Bunuyh 35 - Nau Brah Ndu Ngơi 2023

Lĕ ƀon phung Lêvi

¹ Tâm neh lâng Môap dăch dak krong Yurdan, tâm tra đah Yêrikô, Brah Yêhôva lah ma Y-Môis:

² “Ntĭnh hom ma phung ƀon lan Israel ăn ma phung Lêvi lĕ ƀon sŏk bơh drăp ndơn khân păng nơm gay ăn khân păng dơi gŭ. Ăn đŏng ma phung Lêvi lĕ mir gơ̆ jŭm lĕ ƀon nây.

³ Khân păng mra dơi gŭ tâm ƀon, bi neh jŭm lĕ ƀon nây mra prăp ăn mpô mpa rong, lĕ ndơ jêh ri lĕ rngôch mpô mpa êng êng.

⁴ Mir gơ̆ jŭm ƀon toyh khân păng ăn ma phung Lêvi mra dĭ puăn rhiăng prăm jât met ntơm bơh mpir mpeh padih ƀon.

⁵ Pôri ăn khân may veh ta padih ƀon mpeh luh nar sĭn rhiăng met, ma mpeh pa dâng sĭn rhiăng met, ma mpeh nhâp nar sĭn rhiăng met, ma mpeh dor sĭn rhiăng met, bi ƀon mra gŭ ta nklang. Nây mra jêng mir gơ̆ ma lĕ ƀon phung Lêvi.”

Lĕ ƀon du nde krap

⁶ “Tâm lĕ rngôch ƀon toyh khân may ăn ma phung Lêvi mra jêng prao rplay ƀon du krap gay mra ăn ma nơm nkhĭt bunuyh dơi du krap gŭ ta nây. Padih prao rplay ƀon nây, khân may mra ăn tay puăn jât ma bar rplay ƀon toyh ma phung Lêvi.

⁷ Lĕ rngôch ƀon toyh khân may ăn ma phung Lêvi ndrel ma mir ndrêh gơ̆ mra jêng puăn jât ma pham rplay ƀon.

⁸ Lĕ ƀon toyh khân may sŏk tă bơh drăp ndơn phung ƀon lan Israel gay ăn ma phung Lêvi, ndŭl mpôl geh âk neh khân may mra sŏk âk lơn; jêh ri ndŭl mpôl geh djê̆ neh khân may mra sŏk djê̆ lơn. Ăp ndŭl mpôl mra ăn ma phung Lêvi lĕ ƀon toyh veh tĭng nâm drăp ndơn khân păng geh jêh.”

⁹ Brah Yêhôva lah ma Y-Môis:

¹⁰ “Lah hom ma phung ƀon lan Israel pô aơ: ‘Tơlah khân may rgăn dak krong Yurdan lăp tâm n'gor Kanaan,

¹¹ ăn khân may săch lĕ ƀon toyh mra jêng ntŭk du krap ma khân may nơm, jêng ntŭk ma nơm mâu mĭn ŭch lơh khĭt bunuyh, klăp lah nchuăt tât du krap.

¹² Lĕ ƀon toyh nây mra jêng ntŭk du krap ma nơm mâu mĭn ŭch nkhĭt bunuyh tât du bơh nơm har plơng mham jêh ri mâu khĭt, kŏ tât păng dâk tanăp nau phung tâm rƀŭn phat dôih.

¹³ Pôri, tâm lĕ ƀon toyh khân may ăn mra geh prao rplay ƀon du krap ma khân may.

¹⁴ Khân may mra ăn pe rplay ƀon toyh mpeh kơh tê̆ dak krong Yurdan jêh ri pe rplay ƀon toyh êng êng tâm n'gor Kanaan, prăp jêng lĕ ƀon du krap.

¹⁵ Prao rplay ƀon toyh aơ mra dŏng ƀư ntŭk du krap ma phung ƀon lan Israel, ma nơm bu năch jêh ri ma nơm gŭ njơh ƀât lât ta nklang khân păng, gay ma mbu nơm mâu mĭn ŭch lơh khĭt bunuyh klăp lah nchuăt du ta nây.

¹⁶ Ƀiălah tơlah mbu sŏk ndơ loih lơh khĭt du huê bunuyh, păng jêng nơm nkhĭt bunuyh. Nơm nkhĭt bunuyh nây ăn bu nkhĭt lơi.

¹⁷ Tơlah păng djôt lŭ tâm ti klăp lah ƀư khĭt bunuyh jêh ri lơh khĭt du huê bunuyh, nơm nkhĭt bunuyh. Nơm nkhĭt bunuyh nây ăn bu nkhĭt lơi.

¹⁸ Mâu lah tơlah mbu djôt tâm ti ndơ ƀư ma si, klăp lah ƀư khĭt bunuyh jêh ri lơh khĭt du bunuyh, păng jêng nơm nkhĭt bunuyh. Nơm khĭt bunuyh nây ăn bu nkhĭt lơi.

¹⁹ Nơm har plơng ma mham mra nkhĭt nơm nkhĭt bunuyh nây. Tơlah păng mâp đah nơm nkhĭt bunuyh, nơm har plơng ma mham mra nkhĭt lơi bunuyh nây.

²⁰ Tơlah mbu yor nuih n'hâm tâm rmot nklơ̆ du huê bunuyh mâu lah ŭch klŭp du mlâm ndơ ma du huê bunuyh jêh ri ƀư khĭt bunuyh,

²¹ mâu lah tơlah mbu yorlah nau tâm rmot jêh ri dong du huê bunuyh ma ti, jêh ri ƀư ma păng khĭt, pôri ăn bu nkhĭt lơi păng; nây jêng nơm nkhĭt bunuyh. Nơm har plơng ma mham mra nkhĭt lơi nơm nkhĭt bunuyh tơlah mâp đah păng.

²² Ƀiălah tơlah mbu yorlah mâu mĭn ŭch, mâu di yorlah nau tâm rmot nklơ̆ mâu lah klŭp du mlâm ndơ ta du huê bunuyh,

²³ mâu lah tơlah mbu yorlah mâu mĭn ŭch, mâu di yorlah nau tâm rmot jêh ri ƀư tŭp du mlâm lŭ ta du huê bunuyh, ƀư khĭt ma bunuyh,

²⁴ ăn phung tâm rƀŭn phat dôih nơm nkhĭt bunuyh jêh ri nơm har plơng ma mham tĭng nâm nau vay aơ:

²⁵ Phung tâm rƀŭn mra rklaih nơm nkhĭt bunuyh bơh ti nơm har plơng ma mham jêh ri njuăl păng plơ̆ sĭt ma ƀon du krap jêng ntŭk păng nchuăt du jêh jêh ri ăn păng gŭ ta nây kŏ tât kôranh ƀư brah toyh lơn, jêng nơm bu tŏ jêh dak ƀâu kah kloh, khĭt.

²⁶ Ƀiălah tơlah nơm nkhĭt bunuyh hăn luh padih n'har ƀon du krap jêng ntŭk păng nchuăt jêh tât gay du krap,

²⁷ jêh ri tơlah nơm har plơng ma mham tâm mâp păng jêh ri nkhĭt păng ta padih n'har ƀon du krap, pôri nơm har plơng ma mham mâu mra ƀư tih nkhĭt bunuyh.

²⁸ Yorlah ăn bunuyh nkhĭt bunuyh gŭ tâm ƀon du krap kŏ tât nôk kôranh ƀư brah toyh lơn khĭt. Nơm nkhĭt bunuyh dơi plơ̆ sĭt ma neh jêng drăp ndơn păng jêh nây kôranh ƀư brah toyh khĭt.

²⁹ Nĕ jêng nau vay dăp jêh ri nau vay ƀư gay khân may ƀư tĭng hom tâm lĕ rngôch rô̆ khân jêh ri tâm lĕ rngôch ntŭk khân may gŭ.

³⁰ Tơlah mbu nkhĭt bunuyh, bu mra nkhĭt lơi păng tơlah geh phung mbơh n'hêl nanê̆. Ƀiălah bu mâu dơi nkhĭt ôh tơlah geh knŏng du huê nơm mbơh.

³¹ Khân may mâu dơi sŏk dơn ôh prăk tâm chuai nau rêh ma du huê nkhĭt bunuyh jêng nơm geh tih khĭt. Ăn bu nkhĭt lơi păng.

³² Mâu dơi đŏng sŏk dơn ôh prăk tâm chuai ma nơm ŭch nkhĭt bunuyh dơi gŭ tâm ƀon du krap, jêh nây păng dơi sĭt tay n'gor lor kôranh ƀư brah toyh khĭt.

³³ Khân may lơi ƀư ƀơ̆ ôh n'gor khân may mra gŭ. Yorlah mham ƀư ƀơ̆ neh jêh ri mâu geh ôh nau ƀư kloh neh yor mham nkhŭt ta nây, knŏng đah mham nơm hŏ ƀư nkhŭt mham.

³⁴ Pônây, khân may lơi ƀư ƀơ̆ ôh neh jêng ntŭk khân may mra gŭ, yorlah Gâp jêng Brah Yêhôva gŭ ta nklang phung ƀon lan Israel.’”