Nau Kơp Bunuyh 34 - Nau Brah Ndu Ngơi 2023

N'har n'gor Kanaan

¹ Brah Yêhôva lah ma Y-Môis:

² “Ntĭnh hom ma phung ƀon lan Israel pô aơ: ‘Nôk khân may lăp jêh tâm n'gor Kanaan jêng n'gor ma khân may dơn jêng drăp ndơn, n'har n'gor nây kơt aơ:

³ Mpeh rđŭng, n'gor nây mra ntơm bơh bri rdah Sin njŏ tĭng n'har n'gor Êđôm. Kơt nĕ, n'har mpeh rđŭng khân may mra ntơm bơh bôl Dak Mƀŭt Khĭt, mpeh luh nar.

⁴ N'har nây mra ndăch mpeh rđŭng Akrabim rgăn mpeh Sin jêh ri tât ta ma mpeh pa dâng Kadês Barnê, jêh nây hăn rgăn mpeh Hasar Adar jêh ri hăn tât ta mpeh Asmôn.

⁵ N'har mra ndăch ntơm bơh Asmôn tât ta dak n'hor Êjipt jêh ri lôch ta dak mƀŭt.

⁶ Ta n'har mpeh nhâp nar mra geh Dak Mƀŭt Toyh. Nây jêng n'har mpeh nhâp nar khân may.

⁷ N'har mpeh dor khân may mra ntơm bơh Dak Mƀŭt Toyh tât ta yôk Hor.

⁸ Ntơm bơh yôk Hor, n'har mra tât ta ntŭk lăp ƀon Hamat, găn Sêdat,

⁹ jêh nây tât ta mpeh Siphrôn jêh ri nglĕ dŭt ta Hasar-Ênan. Nây mra jêng n'har khân may ta mpeh dor.

¹⁰ N'har mpeh luh nar khân may mra ntơm bơh Hasar-Ênan tât ta Sêpham,

¹¹ jêh ri ntơm bơh Sêpham jŭr tât ta Ribla mpeh luh nar Ain, jêh nây jŭr kŏ tât ta kơh dak mƀŭt Chinêret ta mpeh luh nar.

¹² Pôri n'har mra tât ta dak krong Yurdan jêh ri nglĕ dŭt ta Dak Mƀŭt Khĭt. Nây mra jêng n'gor khân may ndrel ma lĕ n'har văr jŭm nây.’”

¹³ Y-Môis ntăm ma phung ƀon lan Israel pô aơ: “Nĕ jêng n'gor khân may mra dơn jêng drăp ndơn, nâm Brah Yêhôva ntĭnh ntăm gay ăn ma sĭn ndŭl mpôl jêh ri n'gul ndŭl mpôl.

¹⁴ Yorlah ndŭl mpôl Ruben tĭng ăp noi deh khân păng; ndŭl mpôl Gat tĭng ăp noi deh khân păng, jêh ri n'gul ndŭl mpôl Manasê hŏ dơn kô̆ drăp ndơn khân păng jêh.

¹⁵ Bar ndŭl mpôl nây jêh ri n'gul ndŭl mpôl sŏk dơn jêh drăp ndơn khân păng nơm kơh aơ dak krong Yurdan, tâm tra đah ƀon Yêrikô ma mpeh luh nar, jêng ma mpeh luh nar.”

¹⁶ Brah Yêhôva lah tay ma Y-Môis:

¹⁷ “Aơ jêng amoh phung mra tâm pă n'gor: Kôranh ƀư brah Y-Êlêasar jêh ri Y-Yôsuê, kon bu klâu Y-Nun.

¹⁸ Ăn khân may săch ăp ndŭl mpôl du huê kôranh chiă uănh gay tâm pă n'gor.

¹⁹ Jêh nây jêng amoh phung nây: Ndŭl mpôl Yuđa geh Y-Kalep, kon bu klâu Y-Jêphunê.

²⁰ Ndŭl mpôl Simêôn geh Y-Sêmuel, kon bu klâu Y-Amihut.

²¹ Ndŭl mpôl Benjamin geh Y-Êlidat, kon bu klâu Y-Kislon.

²² Ndŭl mpôl Dan geh du huê kôranh chiă uănh amoh Y-Buki, kon bu klâu Y-Jôgli.

²³ Phung kon sau Y-Yôsep glom geh ndŭl mpôl Manasê, geh du huê kôranh chiă uănh amoh Y-Haniêl, kon bu klâu Y-Êphôt,

²⁴ jêh ri ndŭl mpôl Êphraim geh du huê kôranh chiă uănh amoh Y-Kêmuêl, kon bu klâu Y-Siptan.

²⁵ Ndŭl mpôl Sabulôn geh du huê kôranh chiă uănh amoh Y-Êlisaphan, kon bu klâu Y-Parnak.

²⁶ Ndŭl mpôl Isakar geh du huê kôranh chiă uănh amoh Y-Paltiêl, kon bu klâu Y-Asan.

²⁷ Ndŭl mpôl Aser geh du huê kôranh chiă uănh amoh Y-Ahihut, kon bu klâu Y-Sêlômi.

²⁸ Ndŭl mpôl Naptali geh du huê kôranh chiă uănh Y-Pêdahel, kon bu klâu Y-Amihut.”

²⁹ Nĕ jêng phung Brah Yêhôva ntĭm jêh gay tâm pă drăp ndơn ma phung ƀon lan Israel tâm n'gor Kanaan.