Nau Kơp Bunuyh 33 - Nau Brah Ndu Ngơi 2023

Nau hăn trong phung ƀon lan Israel ntơm bơh Êjipt tât neh lâng Môap

¹ Aơ jêng lĕ nau hăn trong phung ƀon lan Israel tơlah khân păng luh bơh n'gor Êjipt tĭng nâm ăp ndŭl mpôl, tâm dâng nau chiă uănh Y-Môis jêh ri Y-Arôn.

² Y-Môis tông bâr nau ntăm Brah Yêhôva nchih tay nau hăn trong phung ƀon lan tĭng ăp trong. Jêh ri aơ jêng lĕ ăp trong nkoch tĭng nâm lĕ ntŭk ntơm hăn:

³ Phung ƀon lan Israel Hăn ntơm bơh Ramsê tâm ta nar jât ma prăm tâm khay nguay, jêng nar pakơi jêh Rƀŭn Nau Găn. Khân păng hăn du luh tâm nau janh nuih tanăp măt phung Êjipt.

⁴ Tâm dôl nây, phung Êjipt gŭ tâp lĕ rngôch kon dak rah Brah Yêhôva rmal jêh yorlah Păng hŏ phat dôih ma phung brah khân păng.

⁵ Phung ƀon lan Israel du luh bơh Ramsê jêh ri tât ndâk ngih bok ta Sukôt,

⁶ jêh nây khân păng du luh bơh Sukôt tât ndâk ngih bok ta Êtam gŭ ta lôch bri rdah.

⁷ Jêh nĕ, khân păng du luh bơh Êtam, hăn ndăch tât mpeh Pi-hahirôt tâm tra đah Baal-Sêphôn jêh ri ndâk ngih bok panăp Mikdôl.

⁸ Phung ƀon lan Israel du luh bơh Pi-hahirôt, găn dak mƀŭt tât mpeh bri rdah jêh ri khân păng hăn pe nar trong tâm bri rdah Êtam, jêh ri ndâk ngih bok ta Mara.

⁹ Khân păng hăn luh bơh Mara hăn tât ta Êlim. Ta Êlim geh jât ma bar tu dak jêh ri pơh jât tơm play đung; jêh nây khân păng ndâk ngih bok ta nây.

¹⁰ Bơh Êlim, khân păng hăn tât ndâk ndưp dăch Dak Mƀŭt Chăng.

¹¹ Khân păng luh bơh Dak Mƀŭt Chăng jêh ri ndâk ngih bok tâm bri rdah Sin.

¹² Hăn luh bơh bri rdah Sin, khân păng ndâk ngih bok ta Dôphka.

¹³ Khân păng luh bơh Dôphka jêh ri ndâk ngih bok ta Alus.

¹⁴ Hăn luh bơh Alus, khân păng ndâk ngih bok ta Rêphidim jêng ntŭk mâu geh ôh dak nhêt ma phung ƀon lan.

¹⁵ Khân păng hăn luh bơh Rêphidim jêh ri ndâk ngih bok tâm bri rdah Sinai.

¹⁶ Jêh nĕ, khân păng hăn luh bơh bri rdah Sinai jêh ri ndâk ngih bok ta Kibrôt-Hatava.

¹⁷ Hăn luh bơh Kibrôt-Hatava, khân păng ndâk ngih bok ta Hasêrôt.

¹⁸ Khân păng hăn luh bơh Hasêrôt jêh ri ndâk ngih bok ta Ritma.

¹⁹ Hăn luh bơh Ritma, khân păng ndâk ngih bok ta Rimôn-Pêres.

²⁰ Khân păng hăn luh bơh Rimôn-Pêres jêh ri ndâk ngih bok ta Lipna.

²¹ Hăn luh bơh Lipna, khân păng ndâk ngih bok ta Risa.

²² Jêh nĕ, khân păng hăn luh bơh Risa jêh ri ndâk ngih bok ta Kêhêlatha.

²³ Hăn luh bơh Kêhêlatha, khân păng ndâk ngih bok ta yôk Sêpher.

²⁴ Khân păng hăn luh bơh Sêpher jêh ri ndâk ngih bok ta Harada.

²⁵ Hăn luh bơh Harada, khăn păng ndâk ngih bok ta Makhêlôt.

²⁶ Khân păng hăn luh bơh Makhêlôt jêh ri ndâk ngih bok ta Tahat.

²⁷ Hăn luh bơh Tahat, khân păng ndâk ngih bok ta Têra.

²⁸ Khân păng hăn luh bơh Têra jêh ri ndâk ngih bok ta Mitka.

²⁹ Hăn luh bơh Mitka, khân păng ndâk ngih bok ta Hasmôna.

³⁰ Khân păng hăn luh bơh Hasmôna jêh ri ndâk ngih bok ta Môsêrôt.

³¹ Hăn luh bơh Môsêrôt, khân păng ndâk ngih bok ta Bênê Jakan.

³² Khân păng hăn luh bơh Bênê-Jakan jêh ri ndâk ngih bok ta Hôr-Hagitgat.

³³ Hăn luh bơh Hôr-Hagitgat, khân păng ndâk ngih bok ta Jôtbata.

³⁴ Khân păng hăn luh bơh Jôtbata jêh ri ndâk ngih bok ta Abrôna.

³⁵ Hăn luh bơh Abrôna, khân păng ndâk ngih bok ta Êsiôn-Gêber.

³⁶ Khân păng hăn luh bơh Êsiôn-Gêber jêh ri ndâk ngih bok tâm bri rdah Sin ntĭt jêng Kadês.

³⁷ Jêh nĕ, khân păng hăn luh bơh Kadês jêh ri ndâk ngih bok ta yôk Hor, ta n'har n'gor Êđôm.

³⁸ Kôranh ƀư brah Y-Arôn hao ta klơ yôk Hor tĭng nâm nau Brah Yêhôva ntĭnh jêh ri păng khĭt ta nây di nar năng nguay khay prăm, tâm năm tal puăn jât jêh phung Israel du luh bơh n'gor Êjipt.

³⁹ Y-Arôn khĭt ta klơ yôk Hor, păng dơi rêh du rhiăng bar jât ma pe năm.

⁴⁰ Dôl nây, hađăch ƀon Arat jêng bunuyh Kanaan gŭ Nêgep tâm n'gor Kanaan, tăng lư nau phung ƀon lan Israel văch tât jêh.

⁴¹ Phung ƀon lan Israel hăn luh bơh Yôk Hor jêh ri ndâk ngih bok ta Salmôna.

⁴² Hăn luh bơh Salmôna, khân păng ndâk ngih bok ta Punon.

⁴³ Khân păng hăn luh bơh Punon jêh ri ndâk ngih bok ta Ôbôt.

⁴⁴ Jêh nĕ, khân păng hăn luh bơh Ôbôt jêh ri ndâk ngih bok ta Iyê-Abarim ta n'har n'gor Môap.

⁴⁵ Hăn luh bơh Iyim, khân păng ndâk ngih bok ta Dibôn Gat.

⁴⁶ Khân păng hăn luh bơh Dibôn Gat jêh ri ndâk ngih bok ta Almôn-Diblataim.

⁴⁷ Jêh nĕ, khân păng hăn luh bơh Almôn-Diblataim jêh ri ndâk ngih bok ta yôk Abarim panăp Nêbô.

⁴⁸ Hăn luh bơh yôk Abarim, khân păng ndâk ngih bok ta neh lâng Môap, dăch dak krong Yurdan tâm tra đah ƀon Yêrikô.

⁴⁹ Khân păng ndâk ngih bok dăch dak krong Yurdan, ntơm bơh Bet-Jêsimôt tât ta Abel-Sitim tâm neh lâng Môap.

⁵⁰ Brah Yêhôva lah ma Y-Môis tâm neh lâng n'gor Môap dăch dak krong Yurdan, tâm tra đah ƀon Yêrikô, pô aơ:

⁵¹ “Lah hom ma phung ƀon lan Israel: ‘Tơlah khân may rgăn dak krong Yurdan lăp tâm n'gor Kanaan

⁵² ăn khân may mprơh lĕ rngôch phung ƀon lan tơm bri luh bơh panăp khân may, ƀư rai lĕ rngôch rup brah trah jêh ri rup tŏ jêh ri ƀư rai lĕ rngôch ntŭk prêh khân păng.

⁵³ Khân may mra dơn n'gor nĕ jêng drăp ndơn jêh ri gŭ ta nây, yorlah Gâp ăn jêh n'gor nây jêng drăp ndơn ma khân may.

⁵⁴ Nchroh n'hôr hom gay tâm pă n'gor tĭng nâm ndŭl mpôl khân may. Ndŭl mpôl âk lơn ăn khân may ăn drăp ndơn toyh lơn; hôm ma ndŭl mpôl djê̆ ăn khân may ăn drăp ndơn jê̆ lơn. Ăp nơm mra dơn kô̆ păng nơm tĭng nâm nau nchroh n'hôr păng geh dơi. Ăt tĭng ăp ndŭl mpôl phung chô yau khân may gay tâm pă n'gor.

⁵⁵ Ƀiălah tơlah khân may mâu mprơh ôh phung ƀon lan tơm bri hăn luh, pônây lĕ rngôch phung ƀon lan khân may hôm e om mra jêng nâm lok tâm măt khân may jêh ri nâm lok ta pŭng khân may. Khân păng mra ƀư rkhŭk khân may tâm n'gor khân may mra gŭ.

⁵⁶ Jêh nây Gâp mra ƀư ma khân may nâm Gâp mĭn jêh ŭch ƀư ma khân păng.’”