Nau Kơp Bunuyh 32 - Nau Brah Ndu Ngơi 2023

Ndŭl mpôl Ruben jêh ri ndŭl mpôl Gat

¹ Phung kon sau Ruben jêh ri phung kon sau Gat geh âk mpôl mpô mpa rong. Khân păng saơ n'gor Jaser jêh ri n'gor Gilêat jêng ntŭk ueh ma nau rong chiăp mpô mpa rong.

² Pôri khân păng văch lah ma Y-Môis, ma kôranh ƀư brah Y-Êlêasar, jêh ri ma phung kôranh chiă uănh pô aơ:

³ “N'gor Atarôt, Dibôn, Jaser, Nimra, Hêsbôn, Êlêaleh, Jaser, Nimra, Hêsbôn, Êlêaleh, Sêbam, Nêbô, jêh ri Bêôn

⁴ Brah Yêhôva tâm lơh dơi jêh tanăp phung Israel tâm rƀŭn, jêng n'gor ueh ma nau rong chiăp mpô mpa rong. Rlau lơn ma nĕ, phung oh mon may geh âk mpôl mpô mpa rong.

⁵ Tơlah hên geh nau yô̆ tanăp măt may, dăn may ăn n'gor aơ jêng drăp ndơn ma phung oh mon may. Lơi ăn hên hăn găn ôh dak krong Yurdan.”

⁶ Ƀiălah Y-Môis plơ̆ lah ma phung kon sau Gat jêh ri phung kon sau Ruben: “Nôk phung oh nâu khân may hăn luh tâm lơh ƀiălah khân may mâm dĭng gŭ ta aơ?

⁷ Mâm khân ƀư ma phung ƀon lan Israel rdja nuih n'hâm, mâu ŭch hăn lăp tâm n'gor Brah Yêhôva ăn jêh ma khân păng?

⁸ Phung chô yau khân may lĕ ƀư đŏng tâm ban pônây tơlah gâp prơh khân păng hăn bơh Kadês Barnê gay n'hut uănh n'gor.

⁹ Yorlah phung chô yau khân may hăn hao tât ta rlŭng Êskôl gay saơ n'gor, khân păng hŏ ƀư rdja nuih phung ƀon lan Israel mâu ŭch lăp tâm n'gor Brah Yêhôva ăn jêh ma khân păng.

¹⁰ Tâm nar nây, nau ji nuih bơh Brah Yêhôva hit hao jêh ri Păng sơm ton lah:

¹¹ ‘Phung bunuyh du luh jêh tă bơh n'gor Êjipt, ntơm bơh bar jât năm leo klơ mâu mra saơ n'gor Gâp hŏ ton jêh gay ăn ma Y-Abraham, ma Y-Isăk, jêh ri ma Y-Yakôb, yorlah khân păng mâu lĕ nuih n'hâm hăn tĭng Gâp,

¹² Knŏng Y-Kalep, kon bu klâu Y-Jêphunê, bunuyh Kênisit, jêh ri Y-Yôsuê, kon bu klâu Y-Nun, yorlah bar hê khân păng tĭng ndô̆ jêh Brah Yêhôva ma lĕ nuih n'hâm.’

¹³ Yor ri, Brah Yêhôva hao ji nuih ma Phung ƀon lan Israel, jêh ri Păng ƀư ăn ma khân păng hăn nsong blêng tâm bri rdah tâm puăn jât năm, kŏ tât nôk lĕ rô̆ phung ƀư nau mhĭk tanăp măt Brah Yêhôva lĕ rai lôch jêh.

¹⁴ Aƀaơ, khân may jêng noi deh phung bunuyh tih, ntrok tay phung chô yau khân may nơm dâk hao jêh ri ƀư ma Brah Yêhôva ji nuih ma phung Israel lơ hô ntop.

¹⁵ Tơlah khân may đŏng chalơi Păng, Păng mra chalơi phung ƀon lan aơ tâm bri rdah jêh ri khân may mra ƀư ăn khân păng rai lĕ.”

¹⁶ Ƀiălah khân păng hăn dăch ma Y-Môis jêh ri lah: “Hên mra ƀư ndrung ma mpô mpa rong jêh ri ƀon toyh ma phung kon hên,

¹⁷ jêh ri hên mra djôt ndơ tâm lơh, gay ŭch hăn panăp phung ƀon lan Israel kŏ tât nôk hên njŭn jêh khân păng tât ta nkual khân păng. Knŏng geh phung kon hên mra gŭ tâm ƀon toyh geh mpêr nâp yor klach phung ƀon tơm tâm n'gor rduh lơh.

¹⁸ Hên mâu mra plơ̆ sĭt ôh ma ngih hên kŏ tât nôk lĕ rngôch phung Israel sŏk dơn jêh drăp ndơn khân păng nơm.

¹⁹ Hên mâu mra dơn drăp ndơ ôh ndrel ma phung ƀon lan Israel gŭ ta mpeh kơh kăl tê̆ dak krong Yurdan mâu lah ngai lơn yorlah hên hŏ dơn jêh drăp ndơn hên nơm gŭ ta mpeh luh nar dak krong Yurdan aơ.”

²⁰ Y-Môis plơ̆ lah ma khân păng: “Tơlah khân may ƀư pônây, djôt ndơ tâm lơh gay hăn ma nau tâm lơh tanăp Brah Yêhôva,

²¹ jêh ri tơlah lĕ rngôch djôt ndơ tâm lơh hăn rgăn dak krong Yurdan tanăp Brah Yêhôva kŏ tât nôk Păng mprơh jêh lĕ rngôch phung rlăng luh bơh tanăp Păng

²² jêh ri knŏng plơ̆ sĭt nôk khân may hŏ pit sŏk jêh n'gor nây tanăp Brah Yêhôva, pôri khân may ƀư lôch jêh nau kan đah Brah Yêhôva jêh ri phung Israel. Jêh ri nôk nây, n'gor aơ mra jêng drăp ndơn khân may tanăp Brah Yêhôva.

²³ Ƀiălah, tơlah khân may mâu mra ƀư pônây ôh, nanê̆ khân may hŏ ƀư tih đah Brah Yêhôva jêh ri ăn khân may gĭt ngăn nau tih nây mra nkhŭt tay ma khân may.

²⁴ Pônây, ƀư ƀon hom ma phung kon khân may, ndâk ndrung ma mpôl mpô mpa rong jêh ri ƀư hom moh nau khân may hŏ ngơi jêh.”

²⁵ Phung kon sau Gat jêh ri phung kon sau Ruben lah ma Y-Môis: “Phung oh mon may mra ƀư may jêng kôranh hên hŏ ntĭnh jêh.

²⁶ Phung ur jêh ri kon jê̆, mpôl biăp jêh ri lĕ rngôch mpô mpa rong hên mra gŭ ta aơ tâm lĕ ƀon Gilêat,

²⁷ Bi lĕ rngôch phung oh mon may mra djôt ndơ tâm lơh, hăn rgăn dak krong gay tâm lơh tanăp Brah Yêhôva, tĭng nâm kôranh hên ntĭnh jêh.”

²⁸ Pôri Y-Môis ăn nau ntĭnh di ma bar ndŭl mpôl nây ma kôranh ƀư brah Y-Êlêasar, ma Y-Yôsuê kon bu klâu Y-Nun, jêh ri ma phung kôranh chiă uănh lĕ ndŭl mpôl phung ƀon lan Israel.

²⁹ Y-Môis lah ma khân păng: “Tơlah phung kon sau Gat jêh ri phung kon sau Ruben djôt ndơ tâm lơh hăn rgăn dak krong Yurdan ndrel ma khân may gay tâm lơh tanăp Brah Yêhôva jêh ri nôk n'gor nây hŏ pit sŏk jêh, ăn khân may ăn ma khân păng n'gor Gilêat jêng drăp ndơn.

³⁰ Ƀiălah tơlah khân may mâu djôt ndơ tâm lơh hăn rgăn dak krong ndrel ma khân may, khân păng mra dơn drăp ndơn ta nklang khân may tâm n'gor Kanaan.”

³¹ Phung kon sau Gat jêh ri phung kon sau Ruben plơ̆ lah: “Hên mra ƀư tĭng nau Brah Yêhôva lah jêh ma phung oh mon may.

³² Hên mra djôt ndơ tâm lơh hăn lăp tâm n'gor Kanaan tanăp Brah Yêhôva, ƀiălah hên mra dơn drăp ndơn hên mpeh kơh aơ dak krong Yurdan.”

³³ Y-Môis ăn ma phung kon sau Gat, ma phung kon sau Ruben jêh ri ma du n'gul ndŭl mpôl Manasê jêng kon sau Y-Yôsep, ƀon bri hađăch Sihôn, hađăch phung ƀon lan Amôrit, jêh ri ƀon bri hađăch Ôk, hađăch n'gor Basan, glom geh n'gor jêh ri lĕ rngôch ƀon păng ndrel ma lĕ n'gor jŭm.

³⁴ Phung kon sau Gat ndâk ƀon Dibôn, Atarôt, Arôer,

³⁵ Atarôt-Sôpan, Jaser, Jôgbêha,

³⁶ Bet-Nimra, jêh ri Bet-Haran jêng lĕ ƀon toyh nâp. Khân păng ƀư đŏng ndrung ma mpôl mpô mpa rong.

³⁷ Phung kon sau Ruben ndâk ƀon Hêsbôn, Êlêaleh, Kiriathaim,

³⁸ Nêbô, jêh ri Baal-Mêon (amoh lĕ ƀon aơ hŏ rgâl) jêh ri Sipma. Khân păng ăn amoh êng ma lĕ rngôch ƀon khân păng ndâk jêh.

³⁹ Phung kon sau Makir jêng kon bu klâu Manasê hăn pit sŏk n'gor Gilêat jêh ri mprơh phung Amôrit gŭ jêh ta nây.

⁴⁰ Pôri Y-Môis ăn n'gor Gilêat ma Y-Makir, kon bu klâu Y-Manasê, jêh ri păng gŭ ta nây.

⁴¹ Y-Jar jêng kon bu klâu Y-Manasê hăn tâm lơh pit sŏk lĕ ƀon jê̆ phung ƀon lan Amôrit jêh ri rgâl amoh jêng ƀon jê̆ Jar.

⁴² Y-Nôba hăn tâm lơh pit sŏk ƀon Kênat jêh ri ƀon jê̆ păng, jêh nây tâm amoh jêng Nôba tĭng nâm amoh păng nơm.