Nau Kơp Bunuyh 31 - Nau Brah Ndu Ngơi 2023

Phung ƀon lan Madian mâu dơi tâm lơh

¹ Brah Yêhôva lah ma Y-Môis:

² “Plơng har hom ma phung Madian yorlah phung ƀon lan Israel, jêh nau nây may mra hăn gŭ ndrel ma phung chô yau may.”

³ Pôri Y-Môis ntăm ma phung ƀon lan: “Ăn khân may ndrăp ndơ tâm lơh gay hăn tâm lơh đah phung Madian jêh ri plơng har ma phung ƀon lan nây yorlah Brah Yêhôva.

⁴ Ăp ndŭl mpôl Israel prơh hom du rbăn tahan hăn ma nau tâm lơh.”

⁵ Pôri tâm ăp ndŭl mpôl Israel, bu săch du rbăn tahan jêh ri geh jât rmưn bar rbăn nuyh dơi ndrăp ndơ tâm lơh gay hăn ma nau tâm lơh.

⁶ Y-Môis prơh jât rmưn bar rbăn nuyh hăn ma nau tâm lơh, jêng ăp ndŭl mpôl prơh du rbăn nuyh, ndrel ma Y-Phinêas, kon bu klâu kôranh ƀư brah Y-Êlêasar, djôt leo lĕ ndơ tâm lơh kloh ueh jêh ri nŭng uh gay ntrŭt phung tahan.

⁷ Khân păng tâm lơh đah phung ƀon lan Madian tĭng nâm nau Brah Yêhôva hŏ ntăm jêh ma Y-Môis jêh ri khân păng nkhĭt lĕ rngôch phung bu klâu.

⁸ Tâm rnoh phung khĭt geh prăm nuyh hađăch Madian amoh jêng: Y-Êvi, Y-Rêkem, Y-Sur, Y-Hur jêh ri Y-Rêba. Khân păng sŏk đŏng đao gay nkhĭt Y-Balaam, kon bu klâu Y-Bêôr.

⁹ Phung ƀon lan Israel nhŭp phung bu ur Madian jêh ri phung kon se jê̆ khân păng jêng bu nă, sŏk lĕ rngôch mpô mpa rong, mpôl biăp jêh ri drăp ndơ khân păng.

¹⁰ Khân păng su ma ŭnh lĕ ƀon phung ƀon lan Madian gŭ nđâp lĕ ngih bok khân păng,

¹¹ jêh nây sŏk lĕ rngôch drăp ndơ, ndơ pit sŏk, kơp bunuyh jêh ri mpôl mpô mpa rong.

¹² Khân păng djôt leo phung bu nă jêh ri lĕ ndơ pit sŏk tât ma Y-Môis, ma kôranh ƀư brah Y-Êlêasar jêh ri ma phung ƀon lan Israel tâm rƀŭn dôl ndâk ngih bok ta neh lâng Môap, dăch dak krong Yurdan tâm tra đah Yêrikô.

¹³ Nôk nây Y-Môis, kôranh ƀư brah Y-Êlêasar, jêh ri lĕ rngôch phung kôranh chiă uănh hăn luh padih ngih bok gay tâm mâp đah khân păng.

¹⁴ Y-Môis ji nuih ma phung kôranh tahan gak jêng phung kôranh mhe plơ̆ sĭt tă tâm lơh, jêng phung kôranh chiă uănh ma du rbăn tahan jêh ri phung kôranh chiă uănh ma du rhiăng tahan.

¹⁵ Y-Môis lah ma khân păng: “Mâm ƀư khân may ŭch om lĕ rngôch phung bu ur hôm rêh lĕ?

¹⁶ Phung bu ur nây hăn tĭng nau Y-Balaam gay ndơm phung ƀon lan Israel nhhơr mbah Pêôr, ƀư tih toyh tanăp măt Brah Yêhôva jêh ri ƀư ăn phung tâm rƀŭn Brah Yêhôva tâm rƀŭn anh nau mhĭk.

¹⁷ Pônây aƀaơ, nkhĭt hom phung bu klâu tâm phung kon se jê̆ jêh ri phung bu ur hŏ bê̆ch ndrel đah bu klâu,

¹⁸ ƀiălah prăp om rêh lĕ rngôch phung druh mpăr ê hŏ gĭt ôh bê̆ch ndrel đah bu klâu.

¹⁹ Bi khân may, ndâk hom ngih bok padih rmlak tahan tâm pơh nar. Mbu nơm nkhĭt bunuyh mâu lah pah săk jăn khĭt, ăn păng ƀư kloh păng nơm ta nar tal pe jêh ri nar tal pơh.

²⁰ Ăn khân may ƀư kloh lĕ rngôch kho ao, lĕ rngôch ndơ ƀư ma ntâu, lĕ rngôch ndơ ƀư ma rsau be jêh ri lĕ rngôch ndơ ƀư ma tơm si.”

²¹ Kôranh ƀư brah Y-Êlêasar lah ma phung tahan plơ̆ sĭt jêh tă bơh nau tâm lơh pô aơ: “Aơ jêng nau vay dăp tâm nau vay Brah Yêhôva hŏ ntăm jêh ma Y-Môis:

²² Maih, prăk, kông, loih, thao jêh ri ndrak,

²³ jêng lĕ rngôch ndơ dơi gŭ tâm ŭnh khân may mra ăn nklang ŭnh gay dơi ƀư kloh. Ƀiălah, ăn khân may dŏng dak jut tho nau ƀơ̆ gay ƀư kloh ma ndơ nây. Hôm ăp ndơ mâu dơi gŭ ôh tâm ŭnh, ăn khân may trăm păng tâm dak jut tho nau ƀơ̆ nây.

²⁴ Ta nar năng pơh, ăn khân may pih kloh kho ao khân may jêh nau nây mơ khân may dơi lăp tâm rmlak tahan.”

²⁵ Brah Yêhôva lah tay ma Y-Môis:

²⁶ “Ăn may, kôranh ƀư brah Y-Êlêasar, jêh ri phung kôranh chiă uănh ma phung tâm rƀŭn kơp ndơ pit sŏk hŏ rgum jêh, lĕ bunuyh jêh ri mpô mpa rong,

²⁷ jêh nây tâm pă jêng bar ndơ pit sŏk nây ma phung tahan jêh ri ăn lĕ rngôch phung tâm rƀŭn.

²⁸ Tâm kô̆ prăp ma phung tahan hŏ hăn jêh tâm lơh, mâu lah bunuyh, mâu lah ndrôk mâu lah seh bri mâu lah biăp, ăn may sŏk du kô̆ tâm prăm rhiăng djôt leo nhhơr ma Brah Yêhôva.

²⁹ Sŏk tă bơh ndơ nây du n'gul jêng ndơ ma phung tahan gay jao ma kôranh ƀư brah Y-Êlêasar, jêng ndơ nhhơr ma Brah Yêhôva.

³⁰ Bi du n'gul ri ma phung ƀon lan Israel, ăn may sŏk du kô̆ tâm prăm jât, mâu lah bunuyh mâu lah ndrôk mâu lah seh bri mâu lah biăp, jêng lĕ rngôch mpô mpa rong, jêh ri jao ma phung Lêvi, jêng phung sâm dơn djôt kan chiă uănh Ngih Bok Brah Yêhôva.”

³¹ Y-Môis jêh ri kôranh ƀư brah Y-Êlêasar ƀư di tĭng nâm nau Brah Yêhôva ntĭnh jêh ma Y-Môis.

³² Ndơ pit sŏk hôm e phung tahan tâm lơh sŏk jêh jêng prao rsen pơh rmưn prăm rbăn mlâm biăp;

³³ pơh rmưn bar rbăn mlâm ndrôk,

³⁴ prao rmưn du rbăn mlâm seh bri nkuăng,

³⁵ jêh ri pe rmưn bar rbăn bu ur druh.

³⁶ Du kô̆ n'gul jêng ndơ ma phung hŏ hăn tâm lơh geh pe rsen pe rmưn pơh rbăn prăm rhiăng mlâm biăp,

³⁷ nhhơr ma Brah Yêhôva prao rhiăng pơh jât ma prăm mlâm biăp;

³⁸ pe rmưn prao rbăn mlâm ndrôk, nhhơr ma Brah Yêhôva jêng pơh jât ma bar mlâm;

³⁹ pe rbăn prăm rhiăng mlâm seh bri nkuăng, nhhơr ma Brah Yêhôva prao jât ma nguay mlâm;

⁴⁰ jât rmưn prao rbăn bunuyh, nhhơr ma Brah Yêhôva jêng pe jât ma bar bunuyh.

⁴¹ Y-Môis jao ma kôranh ƀư brah Y-Êlêasar lĕ ndơ nhhơr jêng ndơ nhhơr ma Brah Yêhôva di tĭng nâm Păng hŏ ntăm nti jêh ma Y-Môis.

⁴² Du kô̆ n'gul ri jêng ndơ ma phung ƀon lan Israel, jêng du n'gul Y-Môis hŏ pă đah phung hăn tâm lơh.

⁴³ Du n'gul nây jêng ndơ ma phung tâm rƀŭn glom geh: pe rsen pe rmưn pơh rbăn prăm rhiăng mlâm biăp;

⁴⁴ pe rmưn prao rbăn mlâm ndrôk,

⁴⁵ pe rmưn prăm rhiăng mlâm seh bri,

⁴⁶ jêh ri jât rmưn prao rbăn bunuyh.

⁴⁷ Tâm du n'gul nây jêng ndơ ma phung ƀon lan Israel, Y-Môis sŏk du kô̆ prăm jât tă bơh bunuyh mâu lah mpô mpa rong jêh ri jao ma phung Lêvi, jêng phung geh nau kan djôt kan chiă uănh Ngih Bok Brah Yêhôva di tĭng nâm Brah Yêhôva ntĭnh jêh ma Y-Môis.

⁴⁸ Phung kôranh tahan gak jêng kôranh tahan gak toyh du rbăn tahan jêh ri phung kôranh tahan gak toyh ma du rhiăng tahan hăn dăch Y-Môis,

⁴⁹ jêh ri lah: “Phung oh mon may kơp jêh phung tahan jêng phung tâm dâng nau dơi hên jêh ri mâu pưt ôh du huê.

⁵⁰ Ăp nơm tâm hên djôt leo jêh ndơ nhhơr ma mah hŏ sŏk jêh nâm rse rvăk rhên, thek ta tôr, rgên ti, mblo tôr, jêh ri rgên tâp pŏng, nhhơr ma Brah Yêhôva gay chuai nau tih khân păng nơm tanăp Păng.”

⁵¹ Y-Môis jêh ri kôranh ƀư brah Y-Êlêasar sŏk dơn rnoh mah nây, jêng lĕ rngôch ndơ nkrơ̆ nây.

⁵² Lĕ rngôch ndơ nhhơr ma mah tă bơh phung kôranh tahan gak toyh ma du rbăn tahan jêh ri phung kôranh chiă uănh toyh ma du rhiăng tahan nhhơr ma Brah Yêhôva, geh klăp lah du rhiăng sĭn jât kilô.

⁵³ Ăp tahan hăn tâm lơh sŏk jêh ndơ pit sŏk ma păng nơm.

⁵⁴ Pôri Y-Môis jêh ri kôranh ƀư brah Y-Êlêasar sŏk dơn mah tă bơh phung kôranh chiă uănh toyh ma du rbăn tahan jêh ri kôranh chiă uănh toyh ma du rhiăng tahan, jêh nây djôt leo ndơ nây lăp ma Ngih Bok Nau Tâm Rƀŭn jêng ndơ ndray ma phung ƀon lan Israel tanăp Brah Yêhôva.