Nau Kơp Bunuyh 30 - Nau Brah Ndu Ngơi 2023

Nau ton

¹ Y-Môis lah tay ma phung ƀon lan Israel lĕ nau Brah Yêhôva hŏ ntăm nti jêh ma păng nơm.

² Y-Môis lah ma phung kôranh chiă uănh ma phung ndŭl mpôl Israel pô aơ: “Aơ jêng nau Brah Yêhôva hŏ ntăm nti:

³ Tơlah du huê bu klâu ƀư jêh nau ton ma Brah Yêhôva mâu lah tâm ton sơm ma moh nau, djôt prăp hom, lơi mâu răp jăp. Ăn păng ƀư di nâm nau mbung păng hŏ ngơi.

⁴ Tơlah du huê bu ur, tâm nôk druh mpăr hôm e gŭ tâm ngih mbơ̆ păng nơm, geh ƀư nau ton ma Brah Yêhôva jêh ri djôt prăp hom nau păng nơm hŏ ton jêh,

⁵ tơlah mbơ̆ păng tăng jêh nau păng ton jêng nau ton păng djôt prăp hom, ƀiălah mbơ̆ păng mâu ngơi ôh ma păng, pôri lĕ rngôch nau păng ton mra hôm e ôh.

⁶ Ƀiălah tơlah mbơ̆ păng tăng nau păng ton jêh jêh ri mbơ̆ păng dun jêh, lĕ nau păng ƀư jêh mâu lah nau ton mâu mra hôm e ôh, jêh ri Brah Yêhôva mra yô̆ an tih ma păng, yorlah mbơ̆ păng buay jêh ma păng.

⁷ Tơlah bu ur nây gŭ sai jêh, jêh nây păng geh nau ton mâu lah trôm mbung păng ngơi ndal nau tâm nkol jêh păng nơm,

⁸ jêh ri tơlah nar nây sai păng tăng gĭt nau nây, ƀiălah sai păng mâu ngơi ôh ma păng, pônây lĕ nau ton jêh ri tâm ton mra hôm e ôh.

⁹ Bi tơlah ta nar nây sai păng tăng jêh ri dun jêh, pôri nau ton mâu lah tâm ton ndal nây mâu mra hôm e khlay ôh, jêh ri Brah Yêhôva mra yô̆ an tih ma păng.

¹⁰ Ăp nau ton du huê bu ur ndrô mâu lah du huê bu ur bu chalơi jêh, ăn păng djôt nau ton nây.

¹¹ Tơlah du huê bu ur hŏ ƀư jêh nau ton nôk gŭ rêh tâm ngih sai păng, mâu lah tâm ton moh nau, ăn păng djôt nau nây,

¹² jêh ri tơlah sai păng hŏ tăng jêh nau nây jêh ri mâu ngơi ôh jêh ri mâu dun ôh ma păng, pôri lĕ nau ton jêh ri tâm ton păng ngơi jêh mra hôm e ôh.

¹³ Ƀiălah tơlah sai păng tăng gĭt jêh ri chalơi nau ton nây, pôri lĕ nau ton jêh ri tâm ton tă bơh trôm mbung păng hŏ ngơi jêh mâu mra hôm e ôh. Yorlah sai păng hŏ chalơi jêh lĕ nau nây, pôri Brah Yêhôva mra yô̆ an ma păng.

¹⁴ Sai păng geh nau dơi ƀư nâp mâu lah chalơi lĕ rngôch nau păng ton jêng lĕ rngôch nau păng tâm nkol păng nơm.

¹⁵ Tơlah sai păng mâu ngơi ma păng kŏ tât ôi taơ, nâm ntĭt jêng sai păng hŏ ƀư nâp lĕ rngôch nau păng ƀư jêh nau ton mâu lah tâm ton păng. Sai păng hŏ ƀư nâp nau nây, yorlah sai păng mâu ngơi ôh dôl tăng ur păng sơm ton.

¹⁶ Bi tơlah sai păng chalơi jêh lĕ nau sơm ton nây du mông pakơi nôk tăng, pôri sai păng mra anh nau tih ur păng.”

¹⁷ Nĕ jêng lĕ nau vay Brah Yêhôva dăp ntĭm nti jêh ma Y-Môis tât sai jêh ri ur păng nơm, mbơ̆ jêh ri kon bu ur păng dôl păng hôm druh mpăr mom gŭ tâm ngih mbơ̆ păng.