Nau Kơp Bunuyh 3 - Nau Brah Ndu Ngơi 2023

Phung Lêvi

¹ Aơ jêng amoh săk phung ndŭl mpôl Y-Arôn jêh ri Y-Môis nchih tay tâm nôk Brah Yêhôva ngơi ma Y-Môis ta klơ yôk Sinai.

² Amoh săk phung kon bu klâu Y-Arôn jêng Y-Nadap, kon bu klâu bôk rah, tât Y-Abihu, Y-Êlêasar, jêh ri Y-Ithamar.

³ Nây jêng amoh phung kon bu klâu Y-Arôn, phung kôranh ƀư brah bu tŏ jêh dak ƀâu kah jêh ri prăp ăn ma khân păng ƀư nau kan kôranh ƀư brah.

⁴ Ƀiălah Y-Nadap jêh ri Y-Abihu hŏ khĭt tanăp Brah Yêhôva tơlah bar hê nhhơr du ntil ŭnh êng tanăp Brah Yêhôva tâm bri rdah Sinai. Khân păng mâu geh kon ôh, knŏng geh Y-Êlêasar jêh ri Y-Ithamar ƀư nau pah kan ƀư brah tâm uănh Y-Arôn jêng mbơ̆ khân păng.

⁵ Brah Yêhôva ngơi đah Y-Môis:

⁶ “Djôt leo hom ndŭl mpôl Lêvi tâm mpơl măt panăp kôranh ƀư brah Y-Arôn gay pah kan ma păng.

⁷ Phung Lêvi mra ƀư lĕ nau kan ma Y-Arôn jêh ri ma lĕ rngôch phung tâm rƀŭn ta ntŭk Ngih Bok Nau Tâm Rƀŭn ma nau pah kan tâm Ngih Bok.

⁸ Khân păng ăt djôt kan chiă uănh lĕ rngôch ndơ dŏng tâm Ngih Bok Nau Tâm Rƀŭn jêh ri ƀư nau pah kan phung ƀon lan Israel jao ma khân păng gay pah kan ta Ngih Bok.

⁹ Pônây, ăn may jao phung Lêvi ma Y-Arôn jêh ri ma phung kon bu klâu păng; yorlah bu hŏ săch jêh khân păng bơh phung ƀon lan Israel gay jao lĕ khân păng ma Y-Arôn.

¹⁰ Pôri may mra dơm ma Y-Arôn jêh ri phung kon bu klâu păng ƀư nau pah kan kôranh ƀư brah, bi phung êng văch dăch, ăn bu nkhĭt păng.”

¹¹ Brah Yêhôva ngơi tay đah Y-Môis:

¹² “Gâp hŏ săch jêh phung Lêvi tă bơh tâm phung ƀon lan Israel, gay khân păng ntrok lĕ rngôch kon bôk rah bơh phung ƀon lan Israel. Pônây phung Lêvi mra jêng ndơ Gâp,

¹³ yorlah lĕ rngôch kon bôk rah jêng ndơ Gâp. Ta nar Gâp rmal lĕ rngôch kon bôk rah tâm n'gor Êjipt, Gâp hŏ prăp êng ăn ma Gâp lĕ rngôch kon bôk rah tâm Israel, nđâp ma bunuyh jêh ri mpô mpa mra jêng ndơ Gâp. Gâp jêng Brah Yêhôva.”

¹⁴ Brah Yêhôva lah đŏng ma Y-Môis tâm bri rdah Sinai pô aơ:

¹⁵ “Kơp hom phung kon bu klâu Lêvi tĭng nâm ndŭl mpôl jêh ri noi deh khân păng. Kơp lĕ rngôch bu klâu ntơm bơh phung geh du khay leo klơ.”

¹⁶ Y-Môis kơp phung Lêvi di nâm Brah Yêhôva hŏ ntăm jêh ma păng nơm.

¹⁷ Aơ jêng amoh phung kon bu klâu Lêvi: Y-Gersôn, Y-Kôhat, jêh ri Y-Mêrari.

¹⁸ Aơ jêng kon bu klâu Y-Gersôn, tĭng nâm mpôl khân păng: Y-Lipni jêh ri Y-Simei.

¹⁹ Aơ jêng phung kon bu klâu Y-Kôhat tĭng nâm ăp ndŭl mpôl khân păng: Y-Amram, Y-Ishar, Y-Hêbron jêh ri Y-Usiêl.

²⁰ Phung kon bu klâu Y-Mêrari tĭng nâm ăp ndŭl mpôl khân păng nơm jêng: Y-Mahli jêh ri Y-Musi. Nây jêng phung ndŭl mpôl bơh noi deh Lêvi.

²¹ Ndŭl mpôl Lipni jêh ri ndŭl mpôl Simei luh tă bơh Y-Gersôn. Aơ jêng bar ndŭl mpôl Gersôn.

²² Rnoh kơp lĕ rngôch bu klâu khân păng ntơm du khay leo klơ geh pơh rbăn prăm rhiăng nuyh.

²³ Phung ndŭl mpôl Gersôn ndâk ngih bok mpeh pa dâng, gŭ pakơi Ngih Bok.

²⁴ Kôranh ndŭl mpôl phung Gersôn jêng Y-Êliasap, kon bu klâu Y-Laêl.

²⁵ Nau kan phung kon bu klâu Y-Gersôn tâm Ngih Bok Nau Tâm Rƀŭn jêng djôt kan chiă uănh lĕ rngôch ndơ tâm Ngih Bok, ngih bok nđâp ma lĕ bok nkŭm jêh ri bok nching ta bôk mpông Ngih Bok Nau Tâm Rƀŭn,

²⁶ lĕ bok nching tâm ndring ngih, bok nching ta mpông lăp ta ndring ngih jŭm Ngih Bok jêh ri ta nơng ƀư brah nđâp ma rse ndrăn dŏng ma Ngih Bok.

²⁷ Ndŭl mpôl Amram, ndŭl mpôl Ishar, ndŭl mpôl Hêbron jêh ri ndŭl mpôl Usiêl jêng phung ndŭl mpôl Y-Kôhat.

²⁸ Tĭng nâm rnoh kơp lĕ rngôch phung bu klâu ntơm du khay leo klơ geh pham rbăn prao rhiăng nuyh. Khân păng geh nau kan djôt kan chiă uănh ntŭk kloh ueh.

²⁹ Lĕ ndŭl mpôl phung kon sau Kôhat ndâk ngih bok ta mpeh tâm rđŭng Ngih Bok.

³⁰ Kôranh ndŭl mpôl Kôhat jêng Y-Êlisaphan, kon bu klâu Y-Usiêl.

³¹ Phung Kôhat djôt kan chiă uănh Hip Nau Tâm Rnglăp, sưng, jâng kađen, lĕ rngôch nơng ƀư brah, lĕ ndơ dŏng ma ntŭk kloh ueh dŏng tâm kan yơk mbah, bok nching jêh ri lĕ ndơ kan dŏng tât nau djôt prăp ta ntŭk kloh ueh.

³² Mât bôk lĕ kôranh ma phung Lêvi jêng Y-Êlêasar, kon bu klâu kôranh ƀư brah Y-Arôn. Bu hŏ săch jêh păng gay chiă uănh phung geh djôt kan chiă uănh tâm ntŭk kloh ueh.

³³ Ndŭl mpôl Mahli jêh ri ndŭl mpôl Musi luh tă bơh Y-Mêrari. Aơ jêng lĕ ndŭl mpôl Y-Mêrari.

³⁴ Rnoh kơp lĕ rngôch phung bu klâu khân păng ntơm du khay leo klơ hŏ kơp dơi geh prao rbăn bar rhiăng nuyh.

³⁵ Kôranh ndŭl mpôl Mêrari jêng Y-Suriel, kon bu klâu Y-Abihai. Phung kon sau Mêrari ndâk ngih bok ta mpeh dor Ngih Bok.

³⁶ Khân păng geh nau kan mât uănh lĕ kađar Ngih Bok, mâng nđăng, meh n'gâng, rnơl, lĕ ndơ dŏng jêh ri lĕ rngôch ndơ êng;

³⁷ lĕ rngôch meh n'gâng gŭ jŭm ndring ngih nđâp ma rnơl, mâng n'gâng jêh ri rse ndrăn đŏng.

³⁸ Phung ndâk ngih bok panăp Ngih Bok mpeh luh nar, panăp Ngih Bok Nau Tâm Rƀŭn mpeh luh nar jêh, jêng Y-Môis, Y-Arôn jêh ri phung kon bu klâu păng. Khân păng djôt kan chiă uănh ntŭk kloh ueh ntrok an ma phung ƀon lan Israel. Phung êng hăn dăch nây mra khĭt.

³⁹ Lĕ rngôch phung Lêvi Y-Môis jêh ri Y-Arôn kơp jêh tĭng nâm nau vay Brah Yêhôva ntăm, tĭng nâm ăp ndŭl mpôl, lĕ rngôch bu klâu phung geh ntơm du khay leo klơ, geh bar rmưn bar rbăn nuyh.

Nau chuai tay phung kon bôk rah

⁴⁰ Brah Yêhôva lah ma Y-Môis: “Kơp hom lĕ rngôch phung kon bu klâu bôk rah tâm phung ƀon lan Israel ntơm du khay leo klơ jêh ri nchih amoh săk khân păng.

⁴¹ Gâp jêng Brah Yêhôva. Săch hom phung Lêvi ăn ma Gâp, khân păng mra ntrok ma lĕ rngôch phung kon bu klâu bôk rah tâm phung ƀon lan Israel, jêh ri sŏk mpô mpa rong tă bơh phung Lêvi ntrok an ma lĕ rngôch mpô mpa rong deh dak bôk tă bơh phung ƀon lan Israel.”

⁴² Pôri, Y-Môis kơp lĕ rngôch phung kon bôk rah tâm phung ƀon lan Israel, di tĭng nâm Brah Yêhôva ntĭnh ntăm ma păng.

⁴³ Rnoh kơp phung kon bu klâu bôk rah ntơm phung geh du khay leo klơ bu kơp jêh geh bar rmưn bar rbăn bar rhiăng pơh jât ma pe nuyh.

⁴⁴ Brah Yêhôva ngơi đŏng ma Y-Môis:

⁴⁵ “Săch hom phung Lêvi ntrok ma lĕ rngôch phung kon bôk rah tâm phung ƀon lan Israel jêh ri mpô mpa rong phung Lêvi ntrok ma mpô mpa rong phung ƀon lan Israel. Kơt nĕ, phung Lêvi mra jêng ndơ Gâp. Gâp jêng Brah Yêhôva.

⁴⁶ Gay chuai tay phung bar rhiăng pơh jât ma pe nuyh phung kon bôk rah tâm phung ƀon lan Israel rmeh lơn ma rnoh phung Lêvi

⁴⁷ ăn may sŏk prăm sêkel prăk tĭng nâm sêkel tâm ntŭk kloh ueh; du sêkel jêng bar jât gêra.

⁴⁸ Ăn may jao rnoh prăk rmeh lơn nây ma Y-Arôn jêh ri ma phung kon bu klâu păng nâm nau chuai tay ma phung kon bu klâu bôk rah.”

⁴⁹ Pônây Y-Môis sŏk prăk tâm chuai tay bơh phung kon bu klâu bôk rah rmeh lơn ma phung Lêvi hŏ tâm chuai jêh.

⁵⁰ Păng sŏk prăk bơh phung kon bôk rah tâm phung ƀon lan Israel jêng du rbăn pe rhiăng prao jât ma prăm sêkel tĭng nâm sêkel tâm ntŭk kloh ueh.

⁵¹ Y-Môis ăn prăk tâm chuai nây ma Y-Arôn jêh ri ma phung kon bu klâu păng, tĭng nâm nau Brah Yêhôva ntĭnh jêh ma Y-Môis.