Nau Kơp Bunuyh 29 - Nau Brah Ndu Ngơi 2023

Nar Rƀŭn Uh Nŭng

¹ “Ta nar năng nguay khay pơh, khân may mra geh nau tâm rƀŭn kloh ueh jêh ri mâu dơi ƀư du ntil kan vay ƀư ôh. Nĕ jêng du nar ma khân may uh nŭng.

² Khân may nhhơr hom du mlâm ndrôk nkuăng rah, du mlâm biăp nkuăng jêh ri pơh mlâm biăp kon nkuăng bêng du năm, mâu geh têl khap jêng ndơ ƀư brah gŭch geh n'hôl ƀâu kah, maak ma Brah Yêhôva.

³ Nhhơr hom ndrel ma ndơ ƀư brah rnih môi ma rnih môi tâm pach đah dak ngi: pe kilô ma ndrôk nkuăng nây, bar kilô ma biăp nkuăng nây,

⁴ du kilô ma ăp mlâm tâm pơh mlâm biăp kon nây;

⁵ jêh ri nhhơr hom du mlâm be nkuăng jêng mpa ƀư brah chuai nau tih ma khân may.

⁶ Ăn khân may nhhơr lĕ ndơ nhhơr nây padih ndơ ƀư brah gŭch ta bôk khay ndrel ma ndơ ƀư brah rnih môi, ndơ ƀư brah gŭch mro mrăng ndrel ma ndơ ƀư brah rnih môi ndrel ma ndơ nhhơr nhêt tĭng nâm nau vay nal. Lĕ ndơ ƀư brah nây ăn ŭnh sa gay nhhơr geh n'hôl ƀâu kah, maak ma Brah Yêhôva.”

Nar Chuai Nau Tih

⁷ “Ta nar jât khay pơh aơ, ăn khân may geh nau tâm rƀŭn kloh ueh, jêh ri ăn khân may nchâp huêng khân may nơm jêh ri mâu dơi ƀư ôh du ntil kan vay ƀư ôh.

⁸ Khân may nhhơr hom du mlâm ndrôk nkuăng rah, du mlâm biăp nkuăng, pơh mlâm biăp kon nkuăng bêng du năm, mâu geh têl khap jêng ndơ ƀư brah gŭch geh n'hôl ƀâu kah, maak ma Brah Yêhôva.

⁹ Nhhơr hom ndrel ma ndơ ƀư brah rnih môi ma rnih môi tâm pach đah dak ngi: pe kilô ma ndrôk nkuăng, bar kilô ma biăp nkuăng,

¹⁰ jêh ri du kilô ma ăp mlâm tâm pơh mlâm biăp kon nây.

¹¹ Khân may ăt nhhơr du mlâm be nkuăng jêng mpa ƀư brah chuai nau tih, padih ma ndơ ƀư brah tâm Nar Chuai Nau Tih, ndơ ƀư brah gŭch mro mrăng, ndơ ƀư brah rnih môi jêh ri ndơ nhhơr nhêt.”

Nau Rƀŭn Ngih Ndưp

¹² “Ta nar jât ma prăm khay pơh, ăn khân may geh nau tâm rƀŭn kloh ueh. Mâu dơi ƀư du ntil kan vay ƀư ôh, ƀiălah ăn khân may djôt prăp du nau rƀŭn ma Brah Yêhôva tâm pơh nar.

¹³ Khân may nhhơr hom jât ma pe mlâm ndrôk nkuăng rah, bar mlâm biăp nkuăng jêh ri jât ma puăn mlâm biăp kon nkuăng bêng du năm mâu geh têl khap jêng ndơ ƀư brah gŭch, jêng ndơ ƀư brah ăn ŭnh sa geh n'hôl ƀâu kah, maak ma Brah Yêhôva.

¹⁴ Nhhơr hom ndrel ma ndơ ƀư brah rnih môi ma rnih môi tâm pach đah dak ngi: pe kilô ma ăp mlâm ndrôk nkuăng, bar kilô ma ăp mlâm biăp nkuăng

¹⁵ jêh ri du kilô ma ăp mlâm tâm jât ma puăn mlâm biăp kon nây.

¹⁶ Ăn khân may ăt nhhơr du mlâm be nkuăng jêng mpa ƀư brah chuai nau tih, padih ma ndơ ƀư brah gŭch mro mrăng, ndơ ƀư brah rnih môi jêh ri ndơ nhhơr nhêt.

¹⁷ Ta nar tal bar, khân may nhhơr hom jât ma bar mlâm ndrôk nkuăng rah, bar mlâm biăp nkuăng, jêh ri jât ma puăn mlâm biăp kon nkuăng bêng du năm mâu geh têl khap.

¹⁸ Nhhơr hom ndơ ƀư brah rnih môi jêh ri lĕ ndơ nhhơr nhêt ndrel ma lĕ rngôch ndrôk nkuăng, ma biăp nkuăng jêh ri ma biăp kon tĭng rnoh hŏ veh jêh.

¹⁹ Khân may nhhơr đŏng du mlâm be nkuăng jêng mpa ƀư brah chuai nau tih, padih ma ndơ ƀư brah gŭch mro mrăng jêh ri ndơ nhhơr nhêt.

²⁰ Ta nar tal pe, khân may nhhơr hom jât ma nguay mlâm ndrôk nkuăng, bar mlâm biăp nkuăng, jêh ri jât ma puăn mlâm biăp kon nkuăng bêng du năm mâu geh têl khap.

²¹ Nhhơr hom ndơ ƀư brah rnih môi jêh ri ndơ nhhơr nhêt ndrel ma lĕ ndrôk nkuăng, ma biăp nkuăng jêh ri ma biăp kon tĭng nâm rnoh hŏ veh jêh.

²² Ăn khân may ăt nhhơr du mlâm be nkuăng jêng mpa ƀư brah chuai nau tih, padih ma ndơ ƀư brah gŭch mro mrăng, ndơ ƀư brah rnih môi jêh ri ndơ nhhơr nhêt.

²³ Ta nar tal puăn, khân may nhhơr hom jât mlâm ndrôk nkuăng, bar mlâm biăp nkuăng, jêh ri jât ma puăn mlâm biăp kon nkuăng bêng du năm mâu geh têl khap.

²⁴ Nhhơr hom ndơ ƀư brah rnih môi jêh ri lĕ ndơ nhhơr nhêt ndrel ma ndrôk nkuăng, ma biăp nkuăng jêh ri ma biăp kon tĭng nâm rnoh hŏ veh jêh.

²⁵ Ăn khân may ăt nhhơr du mlâm be nkuăng jêng mpa ƀư brah chuai nau tih, padih ma ndơ ƀư brah gŭch mro mrăng, ndơ ƀư brah rnih môi jêh ri ndơ nhhơr nhêt.

²⁶ Ta nar tal prăm, khân may nhhơr hom sĭn mlâm ndrôk nkuăng, bar mlâm biăp nkuăng, jêh ri jât ma puăn mlâm biăp kon nkuăng bêng du năm mâu geh têl khap.

²⁷ Nhhơr hom ndơ ƀư brah rnih môi jêh ri lĕ ndơ nhhơr nhêt ndrel ma ndrôk nkuăng, ma biăp nkuăng jêh ri ma biăp kon tĭng nâm rnoh hŏ veh jêh.

²⁸ Ăn khân may nhhơr đŏng du mlâm be nkuăng jêng mpa ƀư brah chuai nau tih, padih ma ndơ ƀư brah gŭch mro mrăng, ma ndơ ƀư brah rnih môi jêh ri ndơ nhhơr nhêt.

²⁹ Ta nar tal prao, khân may nhhơr hom pham mlâm ndrôk nkuăng, bar mlâm biăp nkuăng, jêh ri jât ma puăn mlâm biăp kon nkuăng bêng du năm mâu geh têl khap.

³⁰ Nhhơr hom ndơ ƀư brah rnih môi jêh ri lĕ ndơ nhhơr nhêt ndrel ma lĕ ndrôk nkuăng, ma lĕ biăp nkuăng, jêh ri ma lĕ biăp kon tĭng nâm rnoh hŏ veh jêh.

³¹ Ăn khân may nhhơr đŏng du mlâm be nkuăng jêng mpa ƀư brah chuai nau tih, padih ma ndơ ƀư brah gŭch mro mrăng, ma ndơ ƀư brah rnih môi jêh ri ma ndơ nhhơr nhêt.

³² Ta nar tal pơh, khân may nhhơr hom pơh mlâm ndrôk nkuăng, bar mlâm biăp nkuăng, jêh ri jât ma puăn mlâm biăp kon nkuăng bêng du năm mâu geh têl khap.

³³ Nhhơr hom ndơ ƀư brah rnih môi jêh ri lĕ ndơ nhhơr nhêt ndrel ma ndrôk nkuăng, ma biăp nkuăng jêh ri ma biăp kon tĭng nâm rnoh hŏ veh jêh.

³⁴ Ăn khân may nhhơr đŏng du mlâm be nkuăng jêng mpa ƀư brah chuai nau tih, padih ma ndơ ƀư brah gŭch nhhơr ƀaƀơ, ma ndơ ƀư brah rnih môi jêh ri ma ndơ nhhơr nhêt.

³⁵ Ta nar tal pham, ăn khân may geh nau tâm rƀŭn geh nau khư yơk jêh ri mâu dơi ƀư du ntil kan vay ƀư ôh.

³⁶ Nhhơr hom du mlâm ndrôk nkuăng, du mlâm biăp nkuăng, jêh ri pơh mlâm biăp kon nkuăng bêng du năm mâu geh têl khap jêng ndơ ƀư brah gŭch, jêng ndơ ƀư brah ăn ŭnh sa nhhơr geh n'hôl ƀâu kah, ƀư maak ma Brah Yêhôva.

³⁷ Ăt nhhơr ndơ ƀư brah rnih môi jêh ri lĕ ndơ nhhơr nhêt ndrel ma lĕ ndrôk nkuăng nây, ma lĕ biăp nkuăng nây jêh ri ma lĕ biăp kon tĭng nâm rnoh hŏ veh jêh.

³⁸ Ăn khân may nhhơr đŏng du mlâm be nkuăng jêng mpa ƀư brah chuai nau tih, padih ma ndơ ƀư brah gŭch mro mrăng, ndơ ƀư brah rnih môi jêh ri ndơ nhhơr nhêt.

³⁹ Nĕ jêng lĕ ndơ nhhơr khân may nhhơr hom ma Brah Yêhôva tâm lĕ nar rƀŭn nau khư yơk gay ƀư ndơ ƀư brah gŭch, ndơ ƀư brah rnih môi, ndơ nhhơr nhêt jêh ri ndơ ƀư brah ma nau đăp mpăn, padih lĕ ndơ ƀư brah nau ton jêh ri lĕ ndơ ƀư brah khân may nơm ŭch.”