Nau Kơp Bunuyh 28 - Nau Brah Ndu Ngơi 2023

Ndơ ƀư brah ăp nar

¹ Brah Yêhôva lah tay ma Y-Môis:

² “Đă hom nau ntăm aơ ma phung ƀon lan Israel jêh ri lah: ‘Ăn khân may nhhơr ma Gâp tâm di yan lĕ ndơ ƀư brah jêh ri ndơ sông sa gay ƀư ndơ ƀư brah, ăn ŭnh sa nhhơr hao geh n'hôl ƀâu kah ma Gâp.’

³ Pôri may lah hom ma phung ƀon lan Israel pô aơ: ‘Aơ jêng ndơ ƀư brah ăn ŭnh sa khân may mra nhhơr ma Brah Yêhôva: Ăp nar bar mlâm biăp kon nkuăng du năm deh, mâu geh ntŭk mhĭk ôh, jêng ndơ ƀư brah gŭch mro mrăng.

⁴ Nhhơr hom du mlâm biăp kon nây ơm ôi, du mlâm biăp kon êng dăch kêng măng,

⁵ jêh ri nhhơr ndrel ma ndơ ƀư brah rnih môi glom du kilô rnih môi, pach đah du lit dak ngi ôlive.

⁶ Nĕ jêng ndơ ƀư brah gŭch mro mrăng hŏ rdâk jêh ta yôk Sinai, jêng du ndơ ƀư brah ăn ŭnh sa nhhơr n'hôl ƀâu kah, ma Brah Yêhôva.’

⁷ Ndơ nhhơr nhêt mra jêng du lit ndrănh ma ăp biăp kon. May nhhơr hom ndơ nhhơr nhêt ma Brah Yêhôva tâm Ntŭk Kloh Ueh.

⁸ May nhhơr hom du mlâm biăp kon êng ri dăch kêng măng nđâp ma ndơ ƀư brah rnih môi jêh ri ndơ nhhơr nhêt tâm ban ma ơm ôi. Nĕ jêng du ndơ ƀư brah ăn ŭnh sa nhhơr geh n'hôl ƀâu kah, maak ma Brah Yêhôva.”

Ndơ ƀư brah nar saƀat

⁹ “Tâm nar saƀat, ăn may nhhơr bar mlâm biăp kon nkuăng bêng du năm, mâu geh ôh ntŭk mhĭk, ndrel ma ndơ nhhơr nhêt jêh ri ndơ ƀư brah rnih môi glom geh bar kilô rnih môi tâm pach đah dak ngi.

¹⁰ Nây jêng ndơ ƀư brah gŭch tâm ăp nar saƀat, rmeh ma ndơ nhhơr gŭch mro mrăng jêh ri ndơ nhhơr nhêt.”

Ndơ ƀư brah ăp khay

¹¹ “Ăp tơ̆ bôk khay, ăn may nhhơr ma Brah Yêhôva bar mlâm ndrôk nkuăng rah, du mlâm biăp nkuăng jêh ri pơh mlâm biăp kon nkuăng bêng du năm mâu geh ôh ntŭk mhĭk jêng ndơ ƀư brah gŭch;

¹² nhhơr ndrel ma pe kilô rnih môi pach đah dak ngi dŏng ma ndơ ƀư brah rnih môi ma ăp mlâm ndrôk nkuăng, bar kilô rnih môi pach đah dak ngi dŏng ma ndơ ƀư brah rnih môi ma du mlâm biăp nkuăng;

¹³ du kilô rnih môi pach đah dak ngi dŏng ma ndơ ƀư brah rnih môi ma ăp mlâm biăp kon. Nĕ jêng ndơ ƀư brah gŭch, jêng ndơ ƀư brah ăn ŭnh sa nhhơr n'hôl ƀâu kah maak ma Brah Yêhôva.

¹⁴ Ndơ nhhơr nhêt mra jêng bar lit ndrănh krăk ƀâu ma du mlâm ndrôk nkuăng, du lit n'gul ma du mlâm biăp nkuăng jêh ri du lit ma ăp biăp kon. Nĕ jêng ndơ ƀư brah gŭch ăp tơ̆ bôk khay tâm du năm.

¹⁵ Padih ma ndơ ƀư brah gŭch nhhơr mro mrăng jêh ri ma ndơ nhhơr nhêt, ăn may nhhơr đŏng ma Brah Yêhôva du mlâm be nkuăng jêng ndơ ƀư brah chuai nau tih.”

Rƀŭn Nau Găn

¹⁶ “Ta nar jât ma puăn khay nguay, djôt prăp hom rƀŭn Nau Găn ma Brah Yêhôva.

¹⁷ Ta nar jât mprăm tâm khay nây mra jêng du nar nau rƀŭn jêh ri sa hom sa piăng let mâu geh ndrui tâm pơh nar.

¹⁸ Ta nar tal nguay, khân may mra geh nau tâm rƀŭn kloh ueh jêh ri mâu dơi ƀư du ntil kan vay ƀư ôh.

¹⁹ Ăn khân may nhhơr ma Brah Yêhôva bar mlâm ndrôk nkuăng rah jêh ri pơh mlâm biăp kon nkuăng bêng du năm jêng ndơ ƀư brah gŭch, lĕ rngôch da dê mâu geh têl khap ôh.

²⁰ Ndơ ƀư brah rnih môi mra jêng pe kilô rnih môi pach đah dak ngi ma du mlâm ndrôk nkuăng, bar kilô ma du mlâm biăp nkuăng,

²¹ jêh ri du kilô ma ăp mlâm kon biăp.

²² Ndrel ma du mlâm be nkuăng jêng ndơ ƀư brah chuai nau tih gay ƀư nau rƀŭn chuai nau tih ma khân may.

²³ Khân may nhhơr hom lĕ ndơ nhhơr padih ma ndơ ƀư brah gŭch ơm ôi, jêng ma ndơ ƀư brah gŭch mro mrăng.

²⁴ Ăn khân may ăn ŭnh sa nhhơr lĕ ndơ ƀư brah mro mrăng kơt nĕ dôl pơh nar gay geh n'hôl ƀâu kah, maak ma Brah Yêhôva. Ăn may nhhơr ndơ ƀư brah nây padih ndơ ƀư brah gŭch mro mrăng jêh ri ndơ nhhơr nhêt.

²⁵ Jêh ri nar tal pơh, khân may mra geh nau tâm rƀŭn kloh ueh jêh ri mâu dơi ƀư du ntil kan vay ƀư ôh.”

Nau Rƀŭn Lĕ Pơh

²⁶ “Ta yan nau rƀŭn Lĕ Pơh di tâm nar geh kao play dak bôk, tơlah khân may nhhơr ndơ ƀư brah rnih môi mhe ma Brah Yêhôva, ăn khân may geh nau tâm rƀŭn kloh ueh jêh ri mâu dơi ƀư du ntil kan vay ƀư ôh.

²⁷ Khân may mra nhhơr bar mlâm ndrôk nkuăng rah, du mlâm biăp nkuăng jêh ri pơh mlâm biăp kon nkuăng bêng du năm jêng ndơ ƀư brah gŭch geh n'hôl ƀâu kah, maak ma Brah Yêhôva.

²⁸ Ăt nhhơr ndơ ƀư brah rnih môi ma rnih môi tâm pach đah dak ngi: pe kilô ma ăp mlâm ndrôk nkuăng, bar kilô ma du mlâm biăp nkuăng,

²⁹ jêh ri du kilô ma ăp mlâm biăp kon.

³⁰ Ăt nhhơr hom du mlâm be nkuăng gay ƀư nau rƀŭn chuai nau tih khân may nơm.

³¹ Padih ma ndơ ƀư brah gŭch mro mrăng jêh ri ma ndơ ƀư brah rnih môi, ăn khân may ăt nhhơr lĕ ndơ nhhơr nây ndrel ma ndơ nhhơr nhêt. Lĕ mpa ƀư brah mâu geh têl khap ôh.”