Nau Kơp Bunuyh 26 - Nau Brah Ndu Ngơi 2023

Kơp rnoh bunuyh tơ̆ tal bar

¹ Pakơi nau mhĭk nây, Brah Yêhôva lah ma Y-Môis jêh ri Y-Êlêasar, kon bu klâu kôranh ƀư brah Y-Arôn:

² “Kơp hom rnoh bunuyh tâm lĕ rngôch phung ƀon lan Israel tâm rƀŭn ntơm bơh nơm geh bar jât năm leo klơ, tĭng nâm ndŭl mpôl khân păng, jêng lĕ rngôch phung Israel dơi hăn ma nau tâm lơh.”

³ Pôri, Y-Môis jêh ri kôranh ƀư brah Y-Êlêasar ngơi ma phung ƀon lan Israel ta neh lâng klơ dor Môap dăch dak krong Yurdan, tâm tra năp đah Yêrikô, pô aơ:

⁴ “Kơp hom rnoh bunuyh ntơm bơh nơm geh bar jât năm leo klơ tĭng nâm Brah Yêhôva hŏ ntĭnh jêh ma Y-Môis.” Aơ jêng lĕ phung Israel hŏ du luh jêh tă bơh n'gor Êjipt:

⁵ Kon sau Y-Ruben, kon bu klâu bôk rah ma Y-Israel. Phung kon bu klâu Y-Ruben glom geh: Y-Hanŏk deh luh ndŭl mpôl Hanŏk; Y-Palu deh luh ndŭl mpôl Palu;

⁶ tă bơh Y-Hêsron deh luh ndŭl mpôl Hêron; tă bơh Y-Karmi deh luh ndŭl mpôl Karmi.

⁷ Aơ jêng ndŭl mpôl Ruben; rnoh kơp hŏ kơp dơi jêh jêng puăn rmưn pe rbăn pơh rhiăng pe jât bunuyh.

⁸ Phung kon bu klâu Y-Palu jêng Y-Êliap.

⁹ Phung kon bu klâu Y-Êliap jêng Y-Nêmuel, Y-Dathan jêh ri Y-Abiram. Y-Dathan jêh ri Y-Abiram jêng lĕ phung bu săch jêh bơh phung tâm rƀŭn ƀiălah hăn tĭng trong ndrel ma Y-Kôra, ƀư nau tâm rdâng đah Y-Môis jêh ri Y-Arôn, tâm ban đŏng tâm rdâng đah Brah Yêhôva.

¹⁰ Neh hŏ hă mbung rvăn bar hê khân păng ndrel ma Y-Kôra, lĕ bunuyh hăn tĭng khân păng khĭt da dê, tơlah dôl ŭnh sa bar rhiăng prăm jât bunuyh. Khân păng dơi jêng du nau ngơi nkah ma phung ƀon lan.

¹¹ Ƀiălah, kon sau Y-Kôra mâu khĭt lĕ ôh.

¹² Phung kon bu klâu Y-Simêôn tĭng nâm ndŭl mpôl khân păng glom geh: Y-Nêmuel deh luh ndŭl mpôl Nêmuel; Y-Jamin deh luh ndŭl mpôl Jamin; Y-Jakin deh luh ndŭl mpôl Jakin;

¹³ Y-Sêra deh luh ndŭl mpôl Sêra; Y-Sôl deh luh ndŭl mpôl Sôl.

¹⁴ Aơ jêng lĕ ndŭl mpôl Simêôn; rnoh kơp jêng bar rmưn bar rbăn bar rhiăng nuyh.

¹⁵ Phung kon sau Y-Gat tĭng nâm ndŭl mpôl khân păng nơm glom geh: Y-Sêphôn deh luh ndŭl mpôl Sêphôn; Y-Hagi deh luh ndŭl mpôl Hagi; Y-Suni deh luh ndŭl mpôl Suni;

¹⁶ Y-Ôsni deh luh ndŭl mpôl Ôsni; Êri deh luh ndŭl mpôl Êri;

¹⁷ Y-Arôt deh luh ndŭl mpôl Arôt; Y-Arêli deh luh ndŭl mpôl Arêli.

¹⁸ Nĕ jêng lĕ ndŭl mpôl phung kon bu klâu Y-Gat; rnoh kơp jêng puăn rmưn rbăn prăm rhiăng nuyh.

¹⁹ Phung kon bu klâu Y-Yuđa jêng Y-Er jêh ri Y-Ônan ƀiălah khân păng lĕ khĭt jêh tâm n'gor Kanaan.

²⁰ Phung kon sau Y-Yuđa tĭng nâm ndŭl mpôl khân păng nơm glom geh: Y-Sêla deh luh ndŭl mpôl Sêla; Y-Pêres deh luh ndŭl mpôl Pêres; Y-Sêra deh luh ndŭl mpôl Sêra.

²¹ Phung kon sau Y-Pêres glom geh: Y-Hêsron deh luh ndŭl mpôl Hêsron; Y-Hamul deh luh ndŭl mpôl Hamul.

²² Nĕ jêng phung ndŭl mpôl Y-Yuđa; rnoh kơp jêng pơh rmưn prao rbăn prăm rhiăng nuyh.

²³ Phung kon sau Y-Isakar tĭng nâm ndŭl mpôl khân păng glom geh: Y-Tôla deh luh ndŭl mpôl Tôla; Y-Puva deh luh ndŭl mpôl Puva;

²⁴ Y-Jasup deh luh ndŭl mpôl Jasup; Y-Simrôn deh luh ndŭl mpôl Simrôn.

²⁵ Nĕ jêng phung ndŭl mpôl Y-Isakar; rnoh kơp jêng prao rmưn puăn rbăn pe rhiăng nuyh.

²⁶ Phung kon sau Y-Sabulôn tĭng nâm ăp ndŭl mpôl glom geh: Y-Sêret deh luh ndŭl mpôl Sêret; Y-Êlon deh luh ndŭl mpôl Êlon; Y-Jalêel deh luh ndŭl mpôl Jalêel.

²⁷ Nĕ jêng ndŭl mpôl Sabulôn; rnoh kơp jêng prao rmưn prăm rhiăng nuyh.

²⁸ Phung kon sau Y-Yôsep tĭng nâm ăp ndŭl mpôl glom geh Y-Manasê jêh ri Y-Êphraim.

²⁹ Phung kon sau Y-Manasê glom geh: Y-Makir deh luh ndŭl mpôl Makir; Y-Makir deh luh Y-Gilêat jêh ri Y-Gilêat deh luh ndŭl mpôl Gilêat.

³⁰ Aơ jêng phung kon sau Y-Gilêat: Y-Iêser deh luh ndŭl mpôl Iêser; Y-Hêlek deh luh ndŭl mpôl Hêlak;

³¹ Y-Asriêl deh luh ndŭl mpôl Asriêl; Y-Sichem deh luh ndŭl mpôl Sichem;

³² Y-Sêmida deh luh ndŭl mpôl Sêmida; Y-Hêpher deh luh ndŭl mpôl Hêpher.

³³ Y-Sêlôpêhat, phung kon bu klâu Y-Hêpher mâu geh ôh kon bu klâu, ƀiălah geh phung kon bu ur. Amoh phung kon bu ur Y-Sêlôpêhat jêng H'Mahla, H'Nôa, H'Hôgla, H'Milka, jêh ri H'Tirsa.

³⁴ Nĕ jêng phung ndŭl mpôl Manasê; rnoh kơp jêng prăm rmưn bar rbăn pơh rhiăng nuyh.

³⁵ Aơ jêng phung kon sau Y-Êphraim tĭng nâm ndŭl mpôl: Y-Suthêla deh luh ndŭl mpôl Suthêla; Y-Bêker deh luh ndŭl mpôl Bêker; Y-Tahan deh luh ndŭl mpôl Tahan.

³⁶ Aơ jêng phung kon sau Y-Suthêla: Y-Êran deh luh ndŭl mpôl Êran.

³⁷ Nĕ jêng phung ndŭl mpôl phung kon sau Y-Êphraim; rnoh kơp jêng pe rmưn bar rbăn nuyh. Nĕ jêng phung ndŭl mpôl phung kon sau Y-Yôsep tĭng nâm phung ndŭl mpôl khân păng.

³⁸ Phung kon sau Y-Benjamin tĭng nâm phung ndŭl mpôl glom geh: Y-Bêla deh luh ndŭl mpôl Bêla; Y-Asbel deh luh ndŭl mpôl Asbel; Y-Ahiram deh luh ndŭl mpôl Ahiram;

³⁹ Y-Sêphupham deh luh ndŭl mpôl Sêphupham; Y-Hupham deh luh ndŭl mpôl Hupham.

⁴⁰ Phung kon sau Y-Bêla jêng Y-Ardơ jêh ri Y-Naaman. Y-Ardơ deh luh ndŭl mpôl Ardơ; Y-Naaman deh luh ndŭl mpôl Naaman.

⁴¹ Nĕ jêng kon sau Y-Benjamin tĭng nâm ndŭl mpôl; rnoh kơp jêng puăn rmưn prăm rbăn prao rhiăng nuyh.

⁴² Aơ jêng phung kon sau Y-Dan tĭng nâm ndŭl mpôl: Y-Suham deh luh ndŭl mpôl Suham. Aơ jêng ndŭl mpôl Dan.

⁴³ Lĕ rngôch ndŭl mpôl Suham hŏ kơp dơi jêng prao rmưn puăn rbăn puăn rhiăng nuyh.

⁴⁴ Phung kon sau Y-Aser tĭng nâm ndŭl mpôl glom geh: Y-Imna deh luh ndŭl mpôl Imna; Y-Isvi deh luh ndŭl mpôl Imna; Y-Isvi deh luh ndŭl mpôl Isvi; Y-Bêria deh luh ndŭl mpôl Bêrit.

⁴⁵ Phung kon sau Y-Bêria: Y-Hêber deh luh ndŭl mpôl Hêber; Y-Malkiêl deh luh ndŭl mpôl Malkiêl.

⁴⁶ Amoh phung kon bu ur Y-Aser jêng H'Sêra.

⁴⁷ Nĕ jêng phung ndŭl mpôl phung kon sau Y-Aser; rnoh kơp jêng prăm rmưn pe rbăn puăn rhiăng nuyh.

⁴⁸ Phung kon sau Y-Naptali tĭng nâm ăp ndŭl mpôl glom geh: Y-Jasêel deh luh ndŭl mpôl Jasêel; Y-Guni deh luh ndŭl mpôl Guni;

⁴⁹ Y-Jêser deh luh ndŭl mpôl Jêser, Y-Silem deh luh ndŭl mpôl Silem.

⁵⁰ Nĕ jêng phung ndŭl mpôl tă bơh ndŭl mpôl Y-Naptali; rnoh kơp jêng puăn rmưn prăm rbăn puăn rhiăng nuyh.

⁵¹ Rnoh kơp phung ƀon lan Israel hŏ kơp dơi jêng prao rsen du rbăn pơh rhiăng pe jât nuyh.

⁵² Brah Yêhôva lah ma Y-Môis:

⁵³ “Tĭng nâm rnoh bunuyh geh amoh săk bu mra tâm pă neh jêng drăp ndơn ma khân păng.

⁵⁴ Ma ndŭl mpôl geh rnoh bunuyh âk lơn, may pă hom drăp ndơn toyh lơn ma khân păng, jêh ri ndŭl mpôl geh rnoh bunuyh djê̆ lơn, pă hom drăp ndơn jê̆ lơn. Ăp ndŭl mpôl mra dơi ăn drăp ndơn tĭng nâm rnoh hŏ kơp jêh,

⁵⁵ ƀiălah nchroh n'hôr hom gay tâm pă n'gor. Phung ƀon lan Israel mra dơn kô̆ drăp ndơn khân păng nơm tĭng nâm amoh ndŭl mpôl khân păng nơm.

⁵⁶ Nchroh n'hôr hom gay tâm pă drăp ndơn ma ăp ndŭl mpôl tĭng nâm rnoh phung ƀon lan âk mâu lan djê̆.”

⁵⁷ Aơ jêng phung Lêvi bu kơp jêh tĭng nâm ăp ndŭl mpôl khân păng: Y-Gersôn deh luh ndŭl mpôl Gersôn; Y-Kôhat deh luh ndŭl mpôl Kôhat; Y-Mêrari deh luh ndŭl mpôl Mêrari.

⁵⁸ Aơ ăt jêng phung ndŭl mpôl Lêvi: Ndŭl mpôl Lipni, ndŭl mpôl Hêbron, ndŭl mpôl Mahli, ndŭl mpôl Musi, ndŭl mpôl Kôra. Y-Kôhat deh luh Y-Amram.

⁵⁹ Amoh ur Y-Amram jêng H'Jôkêbet, kon bu ur Y-Lêvi, deh tâm n'gor Êjipt; păng deh ăn ma Y-Amram: Y-Arôn, Y-Môis jêh ri H'Miriam ruh ma khân păng.

⁶⁰ Bi Y-Arôn deh luh Y-Nadap, Y-Abihu, Y-Êlêasar jêh ri Y-Ithamar.

⁶¹ Ƀiălah Y-Nadap jêh ri Y-Abihu khĭt dôl khân păng nhhơr du ntil ŭnh êng tanăp Brah Yêhôva.

⁶² Lĕ rngôch bu klâu ntơm du khay leo klơ hŏ kơp jêng bar rmưn pe rbăn nuyh. Phung Lêvi mâu dơi kơp ndrel ma rnoh bunuyh phung ƀon lan Israel, yorlah phung Lêvi mâu dơn drăp ndơn ta nklang phung ƀon lan Israel.

⁶³ Nĕ jêng phung Y-Môis jêh ri kôranh ƀư brah Y-Êlêasar hŏ nchih amoh săk jêh nôk khân păng kơp rnoh phung ƀon lan Israel tâm neh lâng klơ dor Môap, dăch dak krong Yurdan tâm tra đah Yêrikô.

⁶⁴ Tâm phung bunuyh aơ mâu geh mbu tâm phung Y-Môis jêh ri kôranh ƀư brah Y-Arôn hŏ kơp jêh tâm nau kơp phung ƀon lan Israel tâm bri rdah Sinai.

⁶⁵ Yorlah Brah Yêhôva lah jêh ma khân păng pô aơ: “Khân păng mra khĭt tâm bri rdah!” Pôri, mâu hôm geh du huê nuyh rêh ôh, knŏng Y-Kalep, kon bu klâu Y-Jêphunê jêh ri Y-Yôsuê, kon bu klâu Y-Nun.