Nau Kơp Bunuyh 25 - Nau Brah Ndu Ngơi 2023

Phung kon bu ur Môap nsŭk nuih n'hâm phung ƀon lan Israel

¹ Nôk phung ƀon lan Israel dôl gŭ ta Sitim, khân păng ntơm ƀư tih văng tĭr đah phung kon bu ur Môap.

² Phung bu ur aơ jă phung ƀon lan Israel sa lĕ mpa ƀư brah nhhơr ma phung brah khân păng. Phung ƀon lan sa jêh ri chon mbah panăp phung brah khân păng.

³ Pôri phung ƀon lan Israel nkuăk mâng mbăk pah kan brah Baal-Pêôr, ƀư ăn Brah Yêhôva hao ji nuih ma phung Israel.

⁴ Brah Yêhôva lah ma Y-Môis: “Nhŭp hom lĕ rngôch kôranh chiă uănh tâm phung ƀon lan, yông khân păng tanăp Brah Yêhôva, ta nklang duh nar gay ma nau Brah Yêhôva ji nuih dơi aih du bơh Israel.”

⁵ Pôri, Y-Môis lah ma kôranh phat dôih Israel: “Ăn ăp nơm khân may nkhĭt lĕ bunuyh tâm phung mpôl băl khân may nơm, nây jêng lĕ bunuyh nkuăk mâng mbăk nhhơr yơk mbah ma brah Baal-Pêôr.”

⁶ Dôl nây, du huê tâm phung ƀon lan Israel djôt leo du huê bu ur Madian tât ta nklang oh nâu păng nơm, tanăp măt Y-Môis jêh ri tanăp măt lĕ rngôch phung ƀon lan Israel tâm rƀŭn, dôl lĕ rngôch phung ƀon lan Israel tâm rƀŭn nhhiăng nhĭm ta mpông Ngih Bok Nau Tâm Rƀŭn.

⁷ Tơlah Y-Phinêas, kon bu klâu Y-Êlêasar, sau kôranh ƀư brah Y-Arôn saơ nau nây, păng dâk ta nklang phung tâm rƀŭn, ti păng djôt đao,

⁸ hăn tĭng bunuyh Israel lăp tâm ngih bok, păng ntâp lăp ndŭl bunuyh Israel jêh ri bu ur nây. Nau mhĭk tâm phung ƀon lan Israel dơi nsrŭng ro.

⁹ Ƀiălah, geh bar rmưn puăn rbăn bunuyh lĕ khĭt jêh yor nau mhĭk nây.

¹⁰ Brah Yêhôva lah ma Y-Môis:

¹¹ “Y-Phinêas, kon bu klâu Y-Êlêasar, sau kôranh ƀư brah Y-Arôn, hŏ ƀư roh jêh nau ji nuih Gâp ma phung ƀon lan Israel, yorlah ta nklang khân păng, păng geh nuih n'hâm duh nđơr Gâp gay tâm rdâng đah tih nau văng tĭr; tă bơh nĕ, Gâp mâu ƀư rai ôh phung ƀon lan Israel tâm nau blau ntôn.

¹² Yor ri, lah hom ma păng pô aơ: ‘Gâp ƀư jêh nau tâm rnglăp ma nau đăp mpăn ma păng.

¹³ Păng jêh ri ma noi deh păng mra dơn nau tâm rnglăp ma kan kôranh ƀư brah n'ho ro, yorlah păng geh nuih n'hâm nau duh nđơr yor Brah Ndu păng nơm jêh ri hŏ chuai nau tih ma phung ƀon lan Israel.’”

¹⁴ Bunuyh Israel bu nkhĭt jêh ndrel ma bu ur Madian, nây jêng Y-Simri, kon bu klâu Y-Salu, du huê kôranh chiă uănh bơh noi deh Simêôn.

¹⁵ Amoh săk bu ur Madian bu nkhĭt jêh jêng H'Kôsbi kon bu ur Y-Sur, du huê kôranh chiă uănh ma phung Madian.

¹⁶ Brah Yêhôva lah tay ma Y-Môis:

¹⁷ “Ƀư rkhŭk hom phung Madian jêh ri hăn lơh khân păng.

¹⁸ Yorlah khân păng hŏ ƀư rkhŭk jêh ri ndơm khân may tâm nau nhhơr mbah brah Pêôr, jêh ri tâm nau H'Kôsbi, kon bu ur du huê kôranh chiă uănh Madian, jêng ruh khân păng. Bu nkhĭt H'Kôsbi nôk nau mhĭk tât yor phung ƀon lan nhhơr mbah ma brah Pêôr.”