Nau Kơp Bunuyh 23 - Nau Brah Ndu Ngơi 2023

Nau ngơi mbơh lor tal nguay Y-Balaam

¹ Y-Balaam lah ma Y-Balak: “Ndâk hom ta aơ ma gâp pơh mlâm nơng ƀư brah jêh ri ta aơ nkra ma gâp pơh mlâm ndrôk nkuăng jêh ri pơh mlâm biăp nkuăng.”

² Y-Balak ƀư di tĭng nâm Y-Balaam lah jêh. Y-Balak ndrel Y-Balaam nhhơr du mlâm ndrôk nkuăng jêh ri du mlâm biăp nkuăng ta klơ ăp nơng ƀư brah.

³ Y-Balaam lah ma Y-Balak: “Hađăch dâk hom ta meng ndơ may nơm ƀư brah gŭch, bi gâp mra hăn. Klăp lah Brah Yêhôva mra tâm mpơl ma gâp jêh ri gâp mra nkoch tay ma may moh nau Păng ăn gâp saơ.” Jêh nây păng hăn hao du yôk jêng ntŭk hil.

⁴ Brah Ndu tâm mpơl ma Y-Balaam. Y-Balaam lah ma păng: “Gâp ndâk jêh pơh mlâm nơng ƀư brah jêh ri klơ ăp nơng ƀư brah, gâp hŏ nhhơr jêh du mlâm ndrôk nkuăng jêh ri du mlâm biăp nkuăng.”

⁵ Brah Yêhôva dơm nau ngơi tâm trôm mbung Y-Balaam jêh ri lah: “Plơ̆ sĭt hom ma Y-Balak jêh ri ngơi pô aơ.”

⁶ Y-Balaam plơ̆ sĭt ma hađăch, saơ hađăch jêh ri phung kôranh chiă uănh n'gor Môap dâk ta meng ndơ ƀư brah gŭch.

⁷ Y-Balaam lah nau mbơh lor pô aơ: “Y-Balak, hađăch n'gor Môap, jă gâp văch tă bơh n'gor Aram, Tă bơh klơ dor yôk mpeh luh nar, jêh ri lah: ‘Văch rtăp hom ma phung Yakôb! Văch hom, ngơi mhĭk ma phung Israel!’

⁸ Phung Brah Ndu mâu mâp rak rtăp ôh, mâm gâp dơi rak rtăp ma phung nây? Phung Brah Yêhôva mâu mâp ngơi mhĭk ôh, mâm gâp dơi ngơi mhĭk ma phung nây?

⁹ Yorlah bơh klơ n'gơn yôk gâp saơ Israel, Tă bơh chor prêh, gâp uănh khân păng: Aơ jêng du phung ƀon lan prăp êng, Jêh ri mâu kơp ôh păng nơm ndrel ma phung mpôl băl bunuyh.

¹⁰ Mbu dơi kơp ndruyh choih Y-Yakôb? Mbu dơi kơp du kô̆ tâm puăn Israel? Ăn gâp dơi khĭt ma đah nau khĭt nơm sŏng srăng; Ăn gâp rai lôch tâm ban ma khân păng!”

¹¹ Dôl nây, Y-Balak lah ma Y-Balaam: “Moh nau may hŏ ƀư jêh ma gâp? Gâp sŏk may ăn may rak rtăp ma phung rlăng gâp, ƀiălah may knŏng ăn nau ueh uĭn ma khân păng!”

¹² Y-Balaam plơ̆ lah: “Gâp mâu njrăng gay ngơi moh nau Brah Yêhôva dơm jêh tâm trôm mbung gâp?”

Nau mbơh lor tal bar Y-Balam

¹³ Y-Balak lah ma Y-Balaam: “Hăn hom ndrel ma gâp tât du ntŭk êng, tă bơh ntŭk nây may dơi saơ Phung ƀon lan aơ. Ƀiălah may mra saơ knŏng du kô̆, ƀiălah mâu mra saơ ôh lĕ rngôch khân păng. Ta nây, may mra rak rtăp hom khân păng.”

¹⁴ Pônây, păng leo Y-Balaam tât ta mir Y-Sôphim, klơ n'gơn yôk Pisga, jêh nây ndâk pơh mlâm nơng ƀư brah, ta klơ ăp nơng ƀư brah nhhơr du mlâm ndrôk nkuăng jêh ri du mlâm biăp nkuăng.

¹⁵ Y-Balaam lah ma Y-Balak: “Dâk ta aơ, dăch ndơ may ƀư brah gŭch, bi gâp mra hăn tâm mâp ma Brah Yêhôva ta ri.”

¹⁶ Brah Yêhôva tâm mpơl ma Y-Balaam jêh ri dơm nau ngơi tâm trôm mbung păng gay lah. Păng lah: “Plơ̆ sĭt hom ma Y-Balak jêh ri ngơi pô aơ.”

¹⁷ Y-Balaam plơ̆ sĭt ma Y-Balak, saơ păng jêh ri phung kôranh chiă uănh n'gor Môap dâk dăch ndơ păng ƀư brah gŭch. Y-Balak lah ma păng: “Moh nau Brah Yêhôva hŏ ngơi?”

¹⁸ Y-Balaam ngơi nau mbơh lor pô aơ: “Hơi Y-Balak, dâk hom, jêh ri iăt hom! Hơi kon bu klâu Y-Sipôr, rkêng tôr iăt hom!

¹⁹ Brah Ndu mâu jêng du huê bunuyh ôh dĭng păng ngơi mƀruh, Mâu đŏng jêng du huê kon bunuyh kŏ tât păng rgâl nau păng mĭn. Moh nau Păng hŏ ntăm jêh, mâu hĕ Păng mra ƀư ăn tât nau nây? Moh nau Păng hŏ ton, mâu hĕ Păng mra ƀư ăn tât nau nây?

²⁰ Aơ, gâp sŏk dơn jêh nau ntăm ăn nau ueh uĭn; Păng hŏ ăn nau ueh uĭn jêh, gâp mâu dơi rgâl nau nây ôh.

²¹ Păng mâu saơ ôh nau jêr tâm phung Yakôb Mâu lĕ păng saơ nau uh ah tâm phung Israel. Brah Yêhôva Brah Ndu khân păng gŭ ndrel ma khân păng, Hađăch nter răm maak nklang Israel.

²² Brah Ndu hŏ njŭn leo phung ƀon lan nây luh bơh n'gor Êjipt; Khân păng geh nau ktang nâm ndrôk bri.

²³ Mâu geh nau ngơi n'hŭm-chrâng ôh dơi tâm rdâng đah phung Yakôb, Mâu đŏng geh n'hŭm pol dơi tâm rdâng đah phung Israel; Yorlah tât dôl bu mra nkoch ma Yakôb jêh ri Israel pô aơ: ‘Brah Ndu ƀư jêh lĕ nau kan khlay ngăn ngên!’

²⁴ Aơ du phung ƀon lan dâk nâm bu du mlâm yau mŭr me, Jêh ri khân păng du dâk nâm bu du mlâm yau mŭr nkuăng; Păng knŏng kuen nôk păng hêk sa mpa Jêh ri nhêt mham lĕ mpa păng hŏ nkhĭt.”

²⁵ Nôk nây, Y-Balak lah ma Y-Balaam: “Lơi rak rtăp ôh ma khân păng, jêh ri mâu lĕ ăn nau ueh uĭn ma khân păng.”

²⁶ Y-Balaam plơ̆ lah ma Y-Balak: “Mâu di hĕ nau gâp mbơh ma may pô aơ lĕ moh nau Brah Yêhôva hŏ lah, gâp mra ƀư nau nây?”

²⁷ Y-Balak lah ma Y-Balaam: “Văch hom aơ, gâp mra njŭn may ma ntŭk êng. Klăp lah Brah Ndu mra di nuih ăn may dơi rak rtăp ma phung ƀon lan aơ ta nây.”

²⁸ Y-Balak njŭn Y-Balaam tât ta n'gơn yôk Pêôr, tâm tra đah bri rdah.

²⁹ Y-Balaam lah ma Y-Balak: “Ndâk hom ta aơ ma gâp pơh mlâm nơng ƀư brah jêh ri ndrăp lor ta aơ ma gâp pơh mlâm ndrôk nkuăng jêh ri pơh mlâm biăp nkuăng.”

³⁰ Pôri, Y-Balak ƀư tĭng nâm nau Y-Balaam lah jêh. Păng nhhơr du mlâm ndrôk nkuăng jêh ri du mlâm biăp nkuăng jêng ndơ ƀư brah gŭch ta klơ ăp nơng ƀư brah.