Nau Kơp Bunuyh 22 - Nau Brah Ndu Ngơi 2023

Rnôk gŭ rêh tâm bri rdah Môap ( 22:1 – 36:13 ) Y-Balak jêh ri Balaam

¹ Jêh nây, phung ƀon lan Israel dâk hăn jêh ri ndâk ngih bok tâm neh lâng n'gor Môap đah tê̆ dak krong Yurdan, tâm tra đah Yêrikô.

² Y-Balak, kon bu klâu Y-Sipôr, saơ jêh rah vah lĕ nau phung Israel hŏ ƀư jêh ma phung Amôrit.

³ Phung Môap klach ngăn ma phung ƀon lan Israel yorlah khân păng âk ngăn.

⁴ Pôri, phung Môap lah ma phung kôranh bu ranh Madian: “Phung ƀon lan âk aơ mra rvăn lĕ rngôch phung ƀon lan gŭ jŭm he nâm bu ndrôk sa gơ̆ tâm mir.” Dôl nây, Y-Balak, kon bu klâu Y-Sipôr, hađăch n'gor Môap rnôk nây.

⁵ Hađăch prơh phung mbơh tât ma Y-Balaam, kon bu klâu Y-Bêôr ta ƀon Pêthôr, dăch dak krong Ơphrat, tâm n'gor phung kon sau Ammô, jêh ri lah: “Aơ, du phung ƀon lan hŏ du luh jêh bơh Êjipt, khân păng nkŭm lam klơ neh ntu jêh ri khân păng dôl ndâk ngih bok tâm tra đah gâp.

⁶ Aƀaơ, ăn may văch rak rtăp ma phung ƀon lan aơ, yorlah khân păng jêng ktang lơn ma gâp. Klăp lah gâp mra dăng ktang dơi lơh đah phung ƀon lan aơ jêh ri mprơh khân păng du luh bơh n'gor. Yorlah gâp gĭt mbu nơm may ăn nau ueh uĭn, păng mra geh nau ueh uĭn, jêh ri mbu nơm may rak rtăp, păng mra geh nau rak rtăp ngăn.”

⁷ Pôri phung kôranh bu ranh n'gor Môap jêh ri phung kôranh bu ranh n'gor Madian dâk hăn, djôt leo ndơ nhhơr ma phung n'hŭm. Khân păng tâm mâp đah Y-Balaam jêh ri nkoch tay lĕ nau ngơi Y-Balak.

⁸ Y-Balaam plơ̆ lah: “Bê̆ch hom ta aơ măng aơ jêh ri gâp mra plơ̆ lah ma khân may tĭng nâm Brah Yêhôva ngơi ma gâp.” Pôri phung kôranh chiă uănh n'gor Môap gŭ ndrel ma Y-Balaam.

⁹ Brah Ndu văch ma Y-Balaam jêh ri lah: “Mbu jêng phung dôl gŭ tâm ngih may?”

¹⁰ Y-Balaam lah ma Brah Ndu pô aơ: “Y-Balak, kon bu klâu Y-Sipôr, hađăch n'gor Môap, hŏ prơh bunuyh hăn ma gâp jêh ri lah:

¹¹ ‘Aơ, du phung ƀon lan du luh bơh n'gor Êjipt jêh ri nkŭm lam klơ neh ntu. Aƀaơ ri văch rak rtăp hom ma phung ƀon lan nây. Klăp lah gâp mra dăng ktang lơh mprơh lơi phung ƀon lan aơ.’”

¹² Brah Ndu lah ma Y-Balaam: “Lơi hăn ndrel ma khân păng, lơi rak rtăp ôh ma phung ƀon lan aơ, yorlah khân păng jêng phung ƀon lan geh jêh nau ueh uĭn.”

¹³ Ang ôi taơ, Y-Balaam kah rngăl ôi jêh ri lah ma phung kôranh chiă uănh tă bơh Y-Balak: “Plơ̆ sĭt hom ma n'gor khân may nơm, yorlah Brah Yêhôva dun jêh mâu ăn ôh gâp hăn ndrel ma khân may.”

¹⁴ Pôri phung kôranh chiă uănh n'gor Môap plơ̆ sĭt ro ma Y-Balak jêh ri lah: “Y-Balaam mâu ŭch hăn ndrel ma hên.”

¹⁵ Y-Balak prơh hăn phung kôranh chiă uănh âk lơn jêh ri phung bunuyh bu yơk lơn ma phung panăp,

¹⁶ khân păng tât ma Y-Balaam jêh ri lah: “Y-Balak, kon bu klâu Y-Sipôr, lah kơt aơ: ‘Lơi ăn geh ôh moh nau buay may hăn văch ma gâp,

¹⁷ yorlah gâp mra nkhôm toyh ma may jêh ri ăn may ăp moh nau may ŭch. Hăn văch rak rtăp hom ma phung ƀon lan aơ.’”

¹⁸ Y-Balaam plơ̆ lah ma phung oh mon hađăch Balak pô aơ: “Nđâp tơlah Y-Balak ăn ma gâp ngih toyh bêng ma prăk mah păng kđôi, gâp mâu dơi rlau ôh nau ntăm Yêhôva Brah Ndu gâp gay ƀư du nau kan nđâp lah jê̆ mâu lah toyh.

¹⁹ Ƀiălah gâp dăn ma khân may gŭ ta aơ măng aơ tâm ban đŏng, gay ma gâp dơi gĭt moh nau Brah Yêhôva mra lah đŏng ma gâp.”

²⁰ Dôl măng, Brah Ndu tât ma Y-Balaam jêh ri lah ma păng: “Yorlah phung nây văch jă, pôri may hăn hom ndrel ma khân păng, ƀiălah ăn may ƀư tĭng kơt lĕ nau Gâp ntĭnh ma may.”

²¹ Ang ôi taơ, Y-Balaam kah rngăl ôi, dăp ưn seh bri jêh ri hăn ndrel ma phung kôranh chiă uănh n'gor Môap.

²² Ƀiălah Brah Ndu hao ji nuih yor nau păng hăn, jêh ri tông mpăr Brah Yêhôva dâk ta trong buay păng. Nôk nây, Y-Balaam ncho seh bri păng nơm jêh ri geh bar hê oh mon păng hăn ndrel ma păng.

²³ Seh bri me saơ tông mpăr Brah Yêhôva dâk ta trong djôt đao rnglay tâm ti păng; jêh ri seh bri teng du jêh ri hăn trŭnh tâm mir. Y-Balaam dong seh bri, gay juet păng hăn plơ̆ tay ma trong.

²⁴ Jêh ri tông mpăr Brah Yêhôva dâk tâm trong jê̆ vah vang đang krăk ƀâu, geh mpir bar đah trong.

²⁵ Tơlah seh bri me saơ tông mpăr Brah Yêhôva, păng mpet đah mpir jêh ri geh rchiăt jâng Y-Balaam đah mpir, pônây Y-Balaam dong păng đŏng.

²⁶ Tông mpăr Brah Yêhôva hăn ngai đê̆ jêh ri dâk du ntŭk huêt, mâu geh ôh trong der mpeh pa ma mâu lah mpeh pa chiau.

²⁷ Tơlah seh bri me saơ tông mpăr Brah Yêhôva, păng kuen ro; Y-Balaam hao ji nuih, jêh ri păng dong seh bri ma mâng jra păng.

²⁸ Nôk nây, Brah Yêhôva pơk trôm mbung seh bri me, jêh ri păng lah ma Y-Balaam: “Moh gâp ƀư ma may dĭng may dong gâp pe tơ̆?”

²⁹ Y-Balaam lah ma seh bri: “Yorlah may mưch ir ma gâp. Tơlah geh đao tâm ti gâp, lĕ gâp nkhĭt jêh may!”

³⁰ Seh bri me lah ma Y-Balaam: “Gâp mâu di hĕ jêng seh bri may, may ncho bơh kăle tât aƀaơ? Gâp lĕ vay ƀư pô aơ ma may?” Păng lah: “Mâu ôh.”

³¹ Nôk nây, Brah Yêhôva pơk măt Y-Balaam jêh ri Y-Balaam saơ tông mpăr Brah Yêhôva dâk ta nklang trong, djôt đao rnglay tâm ti păng. Y-Balaam kŭnh bôk păng nơm, chŭn muh măt ta neh.

³² Tông mpăr Brah Yêhôva ôp: “Mâm may dong seh bri me may pe tơ̆ jêh? Aơ, gâp hăn luh gay buay may, yorlah gâp saơ may hăn tĭng trong tih mhĭk.

³³ Seh bri saơ lĕ gâp jêh ri hăn der pa đah tât pe tơ̆. Tơlah păng mâu der ôh ma gâp, n'hêl nanê̆ gâp hŏ nkhĭt jêh may jêh ri ăn păng dơi rêh.”

³⁴ Y-Balaam lah ma tông mpăr Brah Yêhôva: “Gâp hŏ ƀư tih jêh yorlah gâp mâu gĭt ôh May hŏ dâk jêh tâm trong gay ŭch nking gâp. Aƀaơ, tơlah May mâu di nuih gay gâp hăn, gâp mra plơ̆ sĭt ro yơh.”

³⁵ Tông mpăr Brah Yêhôva lah ma Y-Balaam: “Hăn hom ndrel ma phung bu klâu nây, ƀiălah ăn may ngơi knŏng nau Gâp mra ntĭnh ma may.” Pôri Y-Balaam hăn ndrel ma phung kôranh chiă uănh Y-Balak.

³⁶ Tơlah Y-Balak tăng ma Y-Balaam tât jêh, păng hăn luh ta ƀon Ar Môap, ta dak krong Arnôn, jêng n'har n'gor, gay tâm mâp păng.

³⁷ Y-Balak lah ma Y-Balaam: “Mâu di hĕ gâp prơh hăn jêh bunuyh kuăl may? Mâm dĭng may mâu văch ôh ma gâp? Gâp mâu dơi hĕ ƀư nau yơk ma may?”

³⁸ Y-Balaam ơh nau ma Y-Balak pô aơ: “Aƀaơ, gâp văch jêh ma may, ƀiălah gâp geh lĕ nau dơi ngơi ƀaƀă aƀaơ ri? Gâp knŏng lah nau Brah Ndu dơm tâm trôm mbung gâp.”

³⁹ Jêh ri Y-Balaam hăn ndrel ma Y-Balak, tât ta Kiriat-Husôt.

⁴⁰ Y-Balak nkhĭt ndrôk jêh ri biăp, jêh ri prơh bunuyh djôt leo nhhơr ma Y-Balaam jêh ri phung kôranh chiă uănh Môap dôl gŭ ndrel ma păng.

⁴¹ Ang ôi taơ, Y-Balak njŭn Y-Balaam tât ta Bamôt-Baal jêng ntŭk nây Y-Balaam saơ phung ƀaƀă ƀon lan dăch lơn.