Nau Kơp Bunuyh 21 - Nau Brah Ndu Ngơi 2023

Phung ƀon lan Israel tâm lơh dơi đah hađăch Arat

¹ Tơlah hađăch Arat, bunuyh n'gor Kanaan, gŭ ta Nêgep, tăng jêh ma Israel hăn văch tĭng trong Atharim, pôri hađăch hăn lơh đah Israel jêh ri nhŭp du rnoh bunuyh jêng bu nă.

² Phung ƀon lan Israel ƀư nau ton đah Yêhôva pô aơ: “Tơlah Kôranh Brah jao phung ƀon lan aơ tâm ti hên, hên mra ƀư rai lĕ ƀon khân păng.”

³ Brah Yêhôva dơn nau phung ƀon lan Israel jêh ri jao phung ƀon lan Kanaan tâm ti khân păng. Khân păng ƀư rai lĕ phung ƀon lan nây jêh ri lĕ ƀon khân păng, pônây bu ntơ ntŭk nây jêng Hôrma.

Bêh ŭnh jêh ri bêh ma kông

⁴ Tă bơh yôk Hor, phung ƀon lan Israel hăn tĭng mpeh Dak Mƀŭt Chăng gay ndăch dăr n'gor Êđôm. Ƀiălah ta nklang trong phung ƀon lan rdja nuih.

⁵ Phung ƀon lan ngơi tâm rdâng đah Brah Ndu jêh ri Y-Môis. Khân păng lah: “Mâm may njŭn hên du luh bơh n'gor Êjipt ăn khĭt tâm bri rdah nây? Yorlah ta aơ mâu geh piăng let jêh ri mâu geh dak nhêt, jêh ri hên tâm rmot ma ndơ sông sa dơm dam aơ.”

⁶ Brah Yêhôva prơh bêh ŭnh lăp ta nklang phung ƀon lan jêh ri chôk khĭt âk bunuyh Israel.

⁷ Phung ƀon lan hăn tât ma Y-Môis jêh ri lah: “Hên lĕ ƀư tih jêh, yorlah hên ngơi sưr ma Brah Yêhôva jêh ri ma may. Dăn may mbơh sơm ma Brah Yêhôva gay ma Păng ƀư ăn bêh aơ nkhah ngai bơh hên.” Pôri Y-Môis mbơh sơm an ma phung ƀon lan.

⁸ Brah Yêhôva lah ma Y-Môis: “Ƀư hom du mlâm bêh ŭnh jêh nây yông păng ta klơ mâng ndăl. Mbu lĕ bêh chôk jêh, n'gơr uănh ma ndơ nây, păng mra dơi rêh.”

⁹ Pônây Y-Môis ƀư du mlâm bêh kông jêh nây yông păng ta klơ du mâng ndăl. Mbu moh lĕ bêh chôk jêh n'gơr uănh bêh ma kông, mra dơi rêh.

¹⁰ Jêh nây, phung ƀon lan Israel hăn du luh jêh ri ndâk ngih bok ta Ôbôt.

¹¹ Tă bơh Ôbôt, khân păng hăn du luh jêh ri ndâk ngih bok ta Iyê-Abarim, tâm bri rdah tâm tra đah n'gor Môap, mpeh luh nar.

¹² Tă bơh ntŭk nây khân păng hăn du luh jêh ri ndâk ngih bok tâm rlŭng Sêret.

¹³ Jêh nây khân păng hăn jêh ri ndâk ngih bok mpeh đah tê̆ dak krong Arnôn, tâm bri rdah. Bri rdah aơ ling dĭ tât ta nkual Amôrit. Dak krong Arnôn jêng n'har phung ƀon lan Môap, vah vang nkual Môap jêh ri nkual phung ƀon lan Amôrit.

¹⁴ Yor nây, Nau Tâm Lơh Brah Yêhôva bu nchih: “Vahep gŭ ta Supha Jêh ri rlŭng dak krong Arnôn,

¹⁵ Nđâp lĕ kơh sop Tât ma mpeh Ar Jêh ri tât ta n'har n'gor Môap.”

¹⁶ Tă bơh ntŭk nây, phung ƀon lan Israel n'ho hăn tât ta Bêr. Nây jêng du mlâm ntu dak Brah Yêhôva hŏ ntăm jêh ma Y-Môis: “Tâm rƀŭn hom phung ƀon lan jêh ri Gâp mra ăn dak nhêt ma khân păng.”

¹⁷ Nôk nây, phung ƀon lan Israel mprơ nau aơ: “Hơi ntu dak, luh hom dak! Mprơ hom răm maak ma ntu dak!

¹⁸ Ntu dak phung hađăch hŏ kuyh jêh, Phung kôranh toyh tâm phung ƀon lan hŏ kuyh jêh, Ma mâng jra hađăch jêh ri mâng jra khân păng!” Jêh nây, phung ƀon lan Israel hăn tă bơh bri rdah tât ta Matana,

¹⁹ tă bơh Matana hăn tât ta Nahaliel, tă bơh Nahaliel hăn tât ta Bamôt,

²⁰ jêh ri tă bơh Bamôt hăn tât ta rlŭng tâm n'gor Môap, ta klơ n'gơn yôk Pisga jêng ntŭk bu uănh saơ bri rdah.

Tâm lơh dơi đah phung Amôrit jêh ri hađăch Basan

²¹ Phung ƀon lan Israel prơh phung mbơh hăn tât ma Y-Sihôn, hađăch phung Amôrit, lah pô aơ:

²² “Ăn hên hăn găn n'gor may. Hên mâu mra teng lăp ôh tâm lŏ sre mâu lah đang krăk ƀâu mâu lah nhêt dak bơh ntu dak. Hên knŏng hăn tĭng trong hađăch kŏ tât hên dơi hăn rgăn jêh tă bơh n'gor may.”

²³ Ƀiălah Y-Sihôn mâu ăn ôh phung Israel hăn rgăn n'gor păng. Păng tâm rƀŭn lĕ rngôch tahan jêh ri hăn lơh phung Israel tă bơh bri rdah. Păng văch ma Jahas jêh ri tâm lơh đah phung Israel.

²⁴ Phung Israel dơi lơh păng ma đao jêh ri pit sŏk n'gor păng ntơm bơh dak krong Arnôn tât ma dak krong Jabôk jêh ri dơi nsrŭng ta n'har phung Ammôn, yorlah n'gor khân păng dơi n'gang nâp ktang.

²⁵ Phung ƀon lan Israel pit sŏk lĕ ƀon phung Amôrit jêh ri gŭ tâm lĕ ƀon nây, nđâp ma lĕ ƀon Hêsbôn jêh ri tâm lĕ rngôch ƀon jê̆ jŭm.

²⁶ Hêsbôn jêng ƀon ma Y-Sihôn, hađăch phung Amôrit, jêng hađăch hŏ tâm lơh jêh đah hađăch kăle ri Môap jêh ri pit sŏk lĕ rngôch neh păng kŏ tât dak krong Arnôn.

²⁷ Yor nây, nơm ƀư mprơ geh nchih: “Văch hom ma Hêsbôn! Ƀư hom ƀon Y-Sihôn, Ndâk njêng ƀon nây!

²⁸ Yorlah geh ŭnh luh du tă bơh Hêsbôn, Du chiông ŭnh tă bơh Sihôn, Ŭnh sa jêh Ar tâm n'gor Môap, Jêh ri lĕ rngôch phung kôranh bơh ntŭk prêh Arnôn.

²⁹ Hơi Môap, rêh ni ma may! Hơi phung ƀon lan Kêmôs, khân may lĕ rai lôch jêh! May hŏ ăn jêh phung kon bu klâu may nơm jêng phung nchuăt du, Phung kon bu ur păng jêng bu nă, Ma Y-Sihôn, hađăch phung Amôrit.

³⁰ Ƀiălah he hŏ pănh jêh ma hăr lăp ta khân păng; Hêsbôn lĕ rai lôch jêh kŏ tât ma ƀon Dibôn. He hŏ ƀư rai jêh khân păng tât ta Nôphah, Ŭnh sa kŏ tât ta Mêdêba.”

³¹ Pôri phung Israel gŭ tâm n'gor phung ƀon lan Amôrit.

³² Y-Môis prơh bunuyh hăn n'hut uănh Jaser. Khân păng pit sŏk lĕ ƀon jê̆ jê̆ păng jêh ri mprơh phung Amôrit du luh bơh nây.

Tâm lơh dơi đah hađăch Ôk

³³ Phung ƀon lan Israel plơ̆ tay jêh ri hăn hao mpeh n'gor Basan. Y-Ôk, hađăch Basan, jêh ri lĕ rngôch phung tahan hăn luh jêh ri ŭch tâm lơh ta Êdrei.

³⁴ Ƀiălah Brah Yêhôva lah ma Y-Môis: “Lơi klach ôh! Yorlah Gâp hŏ jao jêh păng, lĕ rngôch phung tahan jêh ri n'gor păng tâm ti may. Phat hom ma păng nâm bu may hŏ phat jêh ma Y-Sihôn, hađăch phung Amôrit, nơm gŭ ta Hêsbôn.”

³⁵ Pôri phung ƀon lan Israel dơi lơh Y-Ôk, phung kon bu klâu jêh ri lĕ rngôch phung tahan păng, mâu hôm om ôh du huê bunuyh klen rêh. Jêh ri phung ƀon lan Israel pit in n'gor hađăch Ôk.