Nau Kơp Bunuyh 2 - Nau Brah Ndu Ngơi 2023

Nau dăp rmlak tahan

¹ Brah Yêhôva lah ma Y-Môis jêh ri Y-Arôn:

² “Ăn phung ƀon lan Israel ndâk ngih bok tâm tra đah Ngih Bok Nau Tâm Rƀŭn, ăp nơm gŭ tâm dâng n'ha kơ jêh ri plơp ntơ ndŭl mpôl khân păng.

³ Rmlak tahan phung Yuđa mra gŭ mpeh pa lơ, mpeh luh nar, tĭng n'ha kơ jêh ri tĭng ntơ phung khân păng. Kôranh ma phung ƀon lan Yuđa jêng Y-Nahsôn, kon bu klâu Y-Aminadap,

⁴ phung tahan păng bu hŏ kơp jêh geh pơh rmưn puăn rbăn prao rhiăng nuyh.

⁵ Phung ndŭl mpôl Isakar ndâk ngih bok êp ta meng phung Yuđa. Kôranh ma phung ƀon lan Isakar jêng Y-Nêthanel, kon bu klâu Y-Suar,

⁶ Phung tahan păng bu hŏ kơp jêh geh prăm rmưn puăn rbăn puăn rhiăng nuyh.

⁷ Jêh nây ndŭl mpôl Sabulôn. Kôranh ma phung ƀon lan Sabulôn jêng Y-Êliap, kon bu klâu Y-Hêlôn,

⁸ phung tahan păng bu hŏ kơp jêh geh prăm rmưn pơh rbăn puăn rhiăng nuyh.

⁹ Lĕ rngôch phung tahan tâm rmlak tahan Yuđa, tĭng nâm ăp phung, jêng du rhiăng pham rmưn prao rbăn puăn rhiăng nuyh. Khân păng jêng phung hăn lor panăp.

¹⁰ Phung tahan Ruben ndâk ngih bok mpeh tâm rđŭng tĭng nâm ăp phung tâm dâng n'ha kơ khân păng. Kôranh phung ƀon lan Ruben jêng Y-Êlisur, kon bu klâu Y-Sêdur,

¹¹ phung tahan păng bu hŏ kơp jêh geh puăn rmưn prao rbăn prăm rhiăng nuyh.

¹² Ndŭl mpôl Simêôn ndâk ngih bok êp ta meng ndŭl mpôl Ruben. Kôranh phung ƀon lan Simêôn jêng Y-Sêlumiel, kon bu klâu Y-Surisadai,

¹³ phung tahan păng bu hŏ kơp jêh geh prăm rmưn sĭn rbăn pe rhiăng nuyh.

¹⁴ Jêh nây ndŭl mpôl Gat. Kôranh ma phung ƀon lan Gat jêng Y-Êliasap, kon bu klâu Y-Rêuel,

¹⁵ phung tahan păng bu hŏ kơp jêh geh puăn rmưn prăm rbăn prao rhiăng prăm jât nuyh.

¹⁶ Lĕ rngôch phung tahan tâm rmlak tahan Ruben, tĭng nâm ăp phung jêng du rsen prăm rmưn du rbăn puăn rhiăng prăm jât nuyh. Khân păng mra hăn tal bar.

¹⁷ Jêh nây, Ngih Bok Nau Tâm Rƀŭn jêh ri rmlak tahan Lêvi mra hăn ta nklang phung rmlak tahan êng. Rmlak tahan Lêvi mra hăn du luh tâm groi lor nglĕ hŏ ndâk ngih bok jêh, ăp nơm tĭng nâm ăp phung tâm dâng n'ha kơ khân păng.

¹⁸ Rmlak tahan Êphraim ndâk mpeh nhâp nar tĭng nâm ăp phung tâm dâng n'ha kơ khân păng. Kôranh phung ƀon lan Êphraim jêng Y-Êlisama, kon bu klâu Y-Amihut

¹⁹ jêh ri phung tahan păng bu hŏ kơp jêh geh puăn rmưn prăm rbăn prăm rhiăng nuyh.

²⁰ Ndŭl mpôl Manasê ndâk ngih bok êp ta meng ndŭl mpôl Êphraim. Kôranh phung ƀon lan Manasê jêng Y-Gamaliel, kon bu klâu Y-Pêdasur,

²¹ phung tahan păng bu hŏ kơp jêh geh pe rmưn bar rbăn bar rhiăng nuyh.

²² Jêh nây ndŭl mpôl Benjamin. Kôranh phung ƀon lan Benjamin jêng Y-Abidan, kon bu klâu Y-Gidêôni,

²³ phung tahan păng bu hŏ kơp jêh geh pe rmưn prăm rbăn puăn rhiăng nuyh.

²⁴ Kơt nây, lĕ rngôch tahan tâm rmlak tahan Êphraim, tĭng nâm ăp phung, jêng du rsen pham rbăn du rhiăng nuyh. Khân păng mra hăn tal pe.

²⁵ Rmlak tahan Dan ndâk mpeh dor geh bok tĭng nâm ăp phung, tâm dâng n'ha kơ khân păng nơm. Kôranh phung ƀon lan Dan jêng Y-Ahiêser, kon bu klâu Y-Amisadai,

²⁶ phung tahan păng bu hŏ kơp jêh geh prao rmưn bar rbăn pơh rhiăng nuyh.

²⁷ Ndŭl mpôl Aser mra ndâk ngih bok êp ta meng ndŭl mpôl Dan. Kôranh phung ƀon lan Aser jêng Y-Pagiel, kon bu klâu Y-Ôkran,

²⁸ phung tahan păng bu hŏ kơp jêh geh puăn rmưn du rbăn prăm rhiăng nuyh.

²⁹ Jêh nây ndŭl mpôl Naptali. Kôranh phung ƀon lan Naptali jêng Y-Ahira, kon bu klâu Y-Ênan,

³⁰ phung tahan păng bu hŏ kơp jêh geh prăm rmưn pe rbăn puăn rhiăng nuyh.

³¹ Kơt nây, lĕ rngôch tahan tâm rmlak tahan Dan jêng du rsen prăm rmưn pơh rbăn prao rhiăng nuyh. Khân păng mra hăn pakơi lơn, tâm dâng n'ha kơ khân păng nơm.

³² Nây jêng phung ƀon lan Israel bu hŏ kơp jêh tĭng nâm ăp ndŭl mpôl khân păng. Lĕ rngôch phung tâm lĕ rmlak tahan hŏ kơp jêh tĭng nâm ăp phung jêng prao rsen pe rmưn prăm rhiăng prăm jât nuyh.

³³ Ƀiălah bu mâu kơp ôh phung Lêvi ndrel ma phung ƀon lan Israel, tĭng nâm Brah Yêhôva ntĭnh jêh ma Y-Môis.

³⁴ Pôri phung ƀon lan Israel ƀư di nâm nau Brah Yêhôva hŏ ntăm jêh ma Y-Môis. Khân păng ndâk ngih bok tĭng nâm ăp phung jêh ri hăn du luh tĭng nâm ăp ndŭl mpôl jêh ri noi deh khân păng nơm.”