Nau Kơp Bunuyh 19 - Nau Brah Ndu Ngơi 2023

Nau vay rƀŭn nhhơr ndrôk me guh

¹ Brah Yêhôva lah tay ma Y-Môis jêh ri Y-Arôn:

² “Aơ jêng nau vay dăp bơh nau vay Brah Yêhôva hŏ ntăm jêh: ‘Ngơi hom ma phung ƀon lan Israel, ăn khân păng têk leo ma may du mlâm ndrôk me guh mâu geh ntŭk kuet rôi ôh, mâu geh têl khap ôh jêh ri mâu mâp nkuăk mâng mbăk.

³ Jêh nây jao ndrôk nây ma kôranh ƀư brah Y-Êlêasar; bu têk njŭn păng luh padih rmlak tahan jêh ri nkhĭt ndrôk nây tanăp păng.

⁴ Kôranh ƀư brah Y-Êlêasar mra sŏk nglau ti mbŭk mham ndrôk nsrih pơh tơ̆ mham nây panăp Ngih Bok Nau Tâm Rƀŭn.

⁵ Bu mra gŭch ndrôk me nây tanăp măt păng; bu mra gŭch ntâu, puăch, mham ndrel ma ek păng.

⁶ Jêh nây, kôranh ƀư brah mra sŏk tơm si sêdar, n'gĭng hisôp jêh ri brai chăng rhưch, jêh ri mƀăr ndơ nây ta nklang ndrôk me dôl hit ŭnh.

⁷ Jêh nây, kôranh ƀư brah mra pih kho ao păng jêh ri ŭm tâm dak, jêh nau nây păng dơi lăp ma rmlak tahan. Ƀiălah kôranh ƀư brah mra jêng ƀơ̆ tât kêng măng.

⁸ Nơm gŭch ndrôk me nây mra pih kho ao păng, ŭm tâm dak jêh ri mra jêng ƀơ̆ ƀơch tât kêng măng.

⁹ Du huê bu klâu kloh mra kuak buh ndrôk me nkhŭt padih rmlak tahan, tâm ntŭk kloh. Bu djôt prăp buh nây ma phung ƀon lan Israel tâm rƀŭn gay ƀư dak jut tho nau ƀơ̆, yorlah nây jêng du ndơ ƀư brah ƀư kloh nau tih.

¹⁰ Mbu nơm kuak buh ndrôk me druh nây mra pih kho ao păng jêh ri jêng ƀơ̆ tât kêng măng. Aơ jêng du nau vay dăp n'ho ro ma phung ƀon lan Israel jêh ri ma bu năch nơm gŭ njưh ƀât lât ta nklang khân păng.

¹¹ Mbu nơm pah bi săk jăn du huê bunuyh khĭt mra jêng ƀơ̆ tâm pơh nar.

¹² Nar tal pe jêh ri nar tal pơh, păng mra sŏk dak jut tho nau ƀơ̆ ƀư kloh păng nơm, pônây păng mra jêng kloh. Bi nar tal pe jêh ri nar tal pơh, păng mâu ƀư kloh ôh păng nơm, păng mâu mra jêng kloh ôh.

¹³ Mbu nơm pah bi săk jăn du huê bunuyh lĕ khĭt jêh, jêh ri mâu ƀư kloh ôh păng nơm, mra ƀư ƀơ̆ Ngih Bok Brah Yêhôva jêh ri nơm nây ăn bu mra nsot lơi bơh phung Israel. Yorlah dak jut tho nau ƀơ̆ mâu mâp nsrih ôh ta klơ păng, păng mra jêng ƀơ̆; nau ƀơ̆ păng ăt hôm e gŭ ta păng.’”

Nau vay ma nau rƀŭn ƀư kloh ma bunuyh jêh ri ma ndơ dŏng geh nau ƀơ̆ ƀơch

¹⁴ “‘Aơ jêng nau vay djôt prăp hom tơlah geh du huê bunuyh khĭt tâm ngih bok: Ăp nơm mbu nơm lăp ngih bok jêh ri lĕ rngôch ndơ tâm ngih bok mra jêng ƀơ̆ tâm pơh nar.

¹⁵ Lĕ rngôch glah mâu kŭp, mâu kât ndrŭp tay mra jêng ƀơ̆.

¹⁶ Mbu gŭ tâm mir, pah tât du huê bunuyh bu nkhĭt păng ma mpiăt đao mâu lah du săk jăn khĭt mâu lah du mlâm nting bunuyh, mâu lah môch mra jêng ƀơ̆ tâm pơh nar.

¹⁷ Gay ƀư kloh ma nơm jêng ƀơ̆, bu mra sŏk buh bơh mpa ƀư brah gŭch tâm ndơ ƀư brah ƀư kloh nau tih, ăn tâm du mlâm glah jêh ri pot đah dak sŏk ta dak krong mâu lah dak n'hor.

¹⁸ Du huê bunuyh geh nau kloh mra sŏk n'gĭng hisôp mbŭk tâm dak nây, jêh nây nsrih păng ta klơ ngih bok, ta klơ lĕ rngôch ndơ dŏng, ta klơ phung gŭ ta nây jêh ri ta klơ nơm pah jêh nting mâu lah du huê bunuyh bu nkhĭt, mâu lah săk jăn khĭt, mâu lah môch.

¹⁹ Ta nar tal pe jêh ri nar tal pơh, du huê bunuyh geh nau kloh nsrih hom dak nây ta klơ bunuyh ƀơ̆ jêh ri nar tal pơh bunuyh geh nau kloh mra ƀư kloh ma păng. Bunuyh geh nau kloh mra pih kho ao, ŭm tâm dak jêh ri dăch kêng măng păng mra geh nau kloh.

²⁰ Bi bunuyh jêng ƀơ̆ jêh, mâu dơi ƀư kloh, nơm nây ăn bu nsot lơi păng bơh nklang phung tâm rƀŭn, yorlah păng lĕ ƀư ƀơ̆ Ntŭk Kloh Ueh Brah Yêhôva. Yorlah bu mâu mâp nsrih ôh ta klơ păng ma dak jut tho nau ƀơ̆, pôri păng ăt hôm jêng ƀơ̆.

²¹ Aơ mra jêng ma du nau vay dăp n'ho ro ma phung ƀon lan. Mbu nơm nsrih dak ma dak jut tho nau ƀơ̆ mra pih kho ao păng; mbu nơm pah dak jut tho nau ƀơ̆ mra jêng ƀơ̆ ƀơch tât kêng măng.

²² Ăp moh ndơ nơm ƀơ̆ pah jêh mra jêng ƀơ̆; mbu nơm hôm pah ndơ nây mra jêng ƀơ̆ tât kêng măng.’”