Nau Kơp Bunuyh 18 - Nau Brah Ndu Ngơi 2023

Nau kan kôranh ƀư brah jêh ri phung Lêvi

¹ Brah Yêhôva lah ma Y-Arôn: “May, phung kon bu klâu may, ndŭl mpôl may ndrel ma may mra anh lĕ nau tih tât ma Ntŭk Kloh Ueh; bi ma may, phung kon bu klâu may nđâp ma may mra anh lĕ nau tih tât ma nau pah kan kôranh ƀư brah.

² Ăn njŭn đŏng phung oh nâu may tâm noi deh Lêvi, jêng noi deh chô yau may, gay khân păng hăn văch ma may jêh ri kâp kơl ma may tâm nôk may jêh ri phung kon bu klâu may dơi pah kan panăp Ngih Bok Nau Tâm Rnglăp.

³ Khân păng mra kơl kan may jêh ri ƀư lĕ kan di ma Ngih Bok, ƀiălah khân păng mâu dơi hăn dăch ma ndơ dŏng tâm Ntŭk Kloh Ueh mâu lah ma nơng ƀư brah ôh, klach lah khân păng jêh ri may khĭt.

⁴ Pônây khân păng mra tâm rnglăp đah may gay djôt kan chiă uănh ma Ngih Bok Nau Tâm Rƀŭn jêh ri ƀư nau kan tâm Ngih Bok; jêh ri mâu hôm geh nơm êng dơi văch dăch ôh.

⁵ Khân may mra djôt kan chiă uănh nau kan prăp ma Ntŭk Kloh Ueh jêh ri nơng ƀư brah, gay nau ji nuih mâu tât ta phung Israel.

⁶ Aơ, Gâp nơm hŏ săch jêh phung oh nâu khân may jêng phung Lêvi tă bơh ta nklang phung ƀon lan Israel jêh ri ăn ma khân păng, yorlah khân may hŏ nhhơr jêh ma Brah Yêhôva gay pah kan tâm Ngih Bok Nau Tâm Rƀŭn.

⁷ Ƀiălah may jêh ri phung kon bu klâu may njrăng pah kan kôranh ƀư brah khân may ma lĕ rngôch nau di ma nơng ƀư brah jêh ri ndơ tâm trôm bok nching. Gâp ăn ma may ƀư nau pah kan kôranh ƀư brah nâm bu du ndơ ăn. Bunuyh êng văch dăch pah kan nây bu mra nkhĭt păng.”

Nau dơi phung kôranh ƀư brah jêh ri phung Lêvi

⁸ Brah Yêhôva lah ma Y-Arôn: “Aơ, Gâp ăn jêh ma may mât uănh lĕ ndơ nhhơr Gâp, jêng lĕ rngôch ndơ ƀư brah kloh ueh phung ƀon lan Israel hŏ nhhơr jêh. Gâp ăn jêh lĕ ndơ nhhơr nây ma may jêh ri ma phung kon bu klâu may nâm jêng kô̆ ma nau pah kan ndơ ƀư brah di tĭng vay n'ho ro.

⁹ Aơ jêng ndơ may tă bơh lĕ ndơ dŭt kloh ueh jêh mâu geh su ôh, phung ƀon lan Israel nhhơr ma Gâp: Lĕ rngôch ndơ nhhơr khân may, ndơ ƀư brah rnih môi, ndơ ƀư brah chuai nau tih, ndơ ƀư brah chuai geh nau tih. Lĕ ndơ dŭt kloh ueh nây prăp ma may jêh ri ma phung kon bu klâu may.

¹⁰ May sa hom ndơ nây nâm du ndơ dŭt kloh ueh; lĕ rngôch bunuyh bu klâu dơi sa ndơ nây jêh ri ndơ nây mra jêng du ndơ kloh ueh ma may.

¹¹ Lĕ ndơ nhhơr nây đŏng mra jêng ndơ may: Jêng ndơ ƀư brah jêh ri lĕ rngôch ndơ nhhơr phung ƀon lan Israel nhhơr ryeng pa tê̆ ryeng pa djaơ, Gâp ăn ma may jêh ri ma phung kon bu klâu may, phung kon bu ur may nâm du nau vay n'ho ro. Lĕ rngôch phung geh nau kloh tâm ngih may mra dơi sa lĕ ndơ nây.

¹² Gâp ăn ma may lĕ ndơ nhhơr bôk yan phung ƀon lan Israel nhhơr ma Brah Yêhôva, jêng lĕ kô̆ nâm dak ngi, ndrănh krăk ƀâu jêh ri ba ueh ngăn ngên.

¹³ Lĕ rngôch kao play dak bôk tă tâm neh phung ƀon lan Israel nhhơr ma Brah Yêhôva mra jêng ndơ may. Lĕ rngôch phung geh nau kloh tâm ngih may mra dơi sa lĕ ndơ nây.

¹⁴ Lĕ rngôch moh ndơ phung Israel nhhơr jêh mra jêng ndơ may.

¹⁵ Lĕ rngôch kon bôk rah bơh bunuyh mâu lah mpô mpa rong, jêng ndơ phung ƀon lan Israel nhhơr ma Brah Yêhôva, mra jêng ndơ may. Ƀiălah may mra tâm chuai tay kon bôk rah bơh bunuyh jêh ri kon bôk rah bơh mpô mpa mâu kloh.

¹⁶ Ma rnoh chuai tay, may mra chuai tay lĕ kon ntơm bơh du khay leo klơ jêh ri tâm nal rnoh jêng prăm jât prăm gram prăk, tĭng nâm sêkel tâm ntŭk kloh ueh; du sêkel jêng bar jât gêra.

¹⁷ Ƀiălah may mâu mra tâm chuai tay ôh kon bôk rah bơh ndrôk me mâu lah bơh biăp me mâu lah be me; khân păng jêng lĕ ndơ kloh ueh. May mra nsrih mham khân păng ta klơ nơng ƀư brah jêh ri gŭch ngi khân păng jêng ndơ ƀư brah ăn ŭnh sa nhhơr geh n'hôl ƀâu kah ƀư maak nuih n'hâm ma Brah Yêhôva.

¹⁸ Puăch khân păng mra jêng ndơ may, tâm ban đŏng ntang ntơh nhhơr ryeng pa tê̆ ryeng pa djaơ jêh ri nglik pa ma prăp ma may.

¹⁹ Lĕ rngôch ndơ nhhơr kloh ueh phung ƀon lan Israel nhhơr ma Brah Yêhôva, Gâp ăn ma may, ma phung kon bu klâu may jêh ri phung kon bu ur may nâm du nau vay n'ho ro. Nĕ jêng du nau tâm rnglăp ma boh n'ho ro tanăp Brah Yêhôva prăp ma may jêh ri noi deh may.”

²⁰ Brah Yêhôva lah ma Y-Arôn: “May mâu mra geh drăp ndơn ôh tâm n'gor nây jêh ri đŏng mâu geh moh kô̆ ta nklang phung ƀon lan nây; Gâp nơm jêng kô̆ prăp ma may jêh ri jêng drăp ndơn may ta nklang phung ƀon lan Israel.

²¹ Bi ma kon sau Lêvi, aơ Gâp hŏ ăn ma lĕ rngôch pi kô̆ tâm jât bơh phung Israel, jêng drăp ndơn gay plơ̆ ma nau kan khân păng ƀư, kan khân păng ƀư tâm Ngih Bok Nau Tâm Rƀŭn.

²² Ntơm bơh aơ tât ô klak, phung ƀon lan Israel mâu dơi văch dăch ôh Ngih Bok Nau Tâm Rƀŭn, klach lah khân păng geh nau tih jêh ri khĭt.

²³ Ƀiălah phung Lêvi mra pah kan tâm Ngih Bok Nau Tâm Rƀŭn jêh ri khân păng mra anh nau tih khân păng. Khân păng mâu mra geh drăp ndơn ôh ta nklang phung ƀon lan Israel. Nĕ jêng du nau vay dăp n'ho ro tâm lĕ rngôch rô̆.

²⁴ Yorlah Gâp hŏ ăn jêh ma phung Lêvi lĕ kô̆ tâm jât tă bơh phung ƀon lan Israel, jêng ndơ ƀư brah nhhơr ma Brah Yêhôva, jêng drăp ndơn. Yor ri Gâp hŏ ntăm jêh ma khân păng pô aơ: ‘Khân păng mâu mra geh drăp ndơn ta nklang phung ƀon lan Israel.’”

²⁵ Jêh nây Brah Yêhôva lah ma Y-Môis:

²⁶ “Ăn may lah ma phung Lêvi pô aơ: ‘Tơlah khân may dơn tă bơh phung ƀon lan Israel kô̆ tâm jât Gâp hŏ ăn ma khân may jêng drăp ndơn, ăn khân may sŏk du kô̆ tâm jât bơh kô̆ tâm jât nây jêng ndơ ƀư brah nhhơr ma Brah Yêhôva.

²⁷ Ndơ ƀư brah khân may nhhơr mra dơi kơp ma khân may nâm ba ƀlê ntŭk mprah ba jêh ri nâm ndrănh krăk ƀâu rmeh ler bơh ntŭk păt ndrănh.

²⁸ Pôri, tâm lĕ kô̆ tâm jât khân may dơn tă bơh phung ƀon lan Israel, sŏk hom du kô̆ tâm jât jêng ndơ nhhơr ma Brah Yêhôva jêh ri jao ndơ nhhơr Brah Yêhôva ma Y-Arôn kôranh ƀư brah.

²⁹ Tâm lĕ rngôch ndơ nhhơr bu ăn ma khân may, khân may sŏk hom lĕ rngôch kô̆ dŭt ueh tă bơh lĕ rngôch ndơ nhhơr prăp ma nau kloh ueh gay nhhơr ma Brah Yêhôva.’

³⁰ May đă đŏng ma phung Lêvi pô aơ: ‘Tơlah khân may nhhơr kô̆ dŭt ueh bơh kô̆ tâm jât, mra dơi kơp ma khân may jêng phung Lêvi nâm play kao bơh ntŭk mprah ba jêh ri nâm play kao bơh ntŭk păt ndrănh.

³¹ Khân may jêh ri phung tâm ngih khân may dơi sa lĕ ndơ nhhơr nây tâm moh ntŭk khân may ŭch, yorlah nây jêng nau nkhôm ma nau pah kan tâm Ngih Bok Nau Tâm Rƀŭn.

³² Yorlah nau nây, tơlah khân may nhhơr kô̆ dŭt ueh, khân may mâu mra anh nau tih, mâu ƀư đŏng ƀơ̆ ôh lĕ ndơ kloh ueh phung ƀon lan Israel, jêh ri khân may mâu mra khĭt.’”