Nau Kơp Bunuyh 17 - Nau Brah Ndu Ngơi 2023

Mâng jra Y-Arôn luh kao

¹ Brah Yêhôva lah ma Y-Môis:

² “Lah hom ma phung ƀon lan Israel pô aơ: Ăp ndŭl mpôl leo chê̆ hom du mlâm mâng jra, ntĭt jêng jât ma bar mâng jra. Nchih hom amoh ăp kôranh chiă uănh ta mâng jra păng.

³ Nchih đŏng amoh Y-Arôn ta mâng Lêvi, yorlah mra geh du mlâm mâng jra ma ăp kôranh ndŭl mpôl.

⁴ Ăn may dơm mâng jra nây tâm Ngih Bok Nau Tâm Rƀŭn tanăp Hip Nau Tâm Rnglăp, ntŭk Gâp tâm mâp đah may.

⁵ Tơlah mâng jra bunuyh Gâp săch, mâng păng mra luh kao. Kơt nĕ, Gâp mra ƀư mlo lĕ nau ngơi ƀrôk phung ƀon lan Israel tâm rdâng đah may.”

⁶ Y-Môis ngơi ma phung ƀon lan Israel, jêh ri lĕ rngôch kôranh tĭng nâm ndŭl mpôl khân păng djôt leo chê̆ ma păng ăp nơm du mâng jra, jêng jât ma bar mlâm mâng jra. Mâng jra Y-Arôn gŭ ndrel ma lĕ mâng jra êng.

⁷ Y-Môis dơm lĕ rngôch mâng jra nây tanăp Brah Yêhôva tâm Ngih Bok Nau Tâm Rnglăp.

⁸ Ôi taơ, tơlah Y-Môis lăp tâm Ngih Bok Nau Tâm Rnglăp saơ ta mâng jra Y-Arôn, mpeh phung Lêvi hŏ chăt nse, mâu knŏng chăt nse ƀiălah ăt luh du kao jêh ri luh play amandê dŭm.

⁹ Y-Môis sŏk lĕ rngôch mâng jra padih tanăp Brah Yêhôva jêh ri leo lĕ rngôch mâng jra ma phung ƀon lan Israel uănh. Khân păng uănh da dê jêh ri ăp nơm sŏk tay mâng jra khân păng nơm.

¹⁰ Brah Yêhôva lah ma Y-Môis: “Sŏk tay hom mâng jra Y-Arôn dơm tay panăp Hip Nau Tâm Rnglăp gay prăp jêng du nau tâm mbên mbơh ma nau tâm rdâng. Ăn may ƀư mlo lĕ nau ngơi ƀrôk khân păng tâm rdâng đah Gâp, klach lah khân păng khĭt.”

¹¹ Y-Môis ƀư di tĭng nâm nau Brah Yêhôva hŏ ntĭnh jêh ma păng nơm.

¹² Phung ƀon lan Israel lah ma Y-Môis: “Aơ hên khĭt, hên rai lôch, hên rai lôch lĕ ro!

¹³ Mbu hăn dăch ma Ngih Bok Brah Yêhôva mra khĭt. Mâm lĕ rngôch hên mra khĭt lĕ ƀơh?”