Nau Kơp Bunuyh 16 - Nau Brah Ndu Ngơi 2023

Nau tâm rdâng bơh Y-Kôra, Y-Dathan jêh ri Y-Abiram

¹ Y-Kôra, kon bu klâu Y-Ishar, sau Y-Kôhat, se Y-Lêvi, têk Y-Dathan jêh ri Y-Abiram, phung kon bu klâu Y-Êliap, jêh ri Y-Ôn, kon bu klâu Y-Pêlet, phung sau Y-Ruben,

² dâk tâm rdâng đah Y-Môis. Nđâp ma khân păng geh bar rhiăng prăm jât nuyh phung kôranh tâm phung Israel tâm rƀŭn, jêng lĕ kôranh phung tâm rƀŭn, jêng phung bu hŏ săch jêh jêh ri phung lư n'găr;

³ khân păng tâm rƀŭn ndrel tâm rdâng đah Y-Môis jêh ri Y-Arôn. Khân păng phong: “Khân may ƀư jêh rmeh ir! Yorlah lĕ rngôch phung tâm rƀŭn jêng kloh ueh jêh ri Brah Yêhôva dôl gŭ ta nklang khân păng. Pôri, mâm khân may n'hao êng khân may nơm ta klơ lơn phung tâm rƀŭn Brah Yêhôva?”

⁴ Y-Môis tăng nau nây păng chŭn muh măt ta neh,

⁵ jêh ri păng lah ma Y-Kôra jêh ri ma lĕ rngôch phung hăn tĭng păng: “Ôi taơ, Brah Yêhôva mra tâm mpơl mbu nơm jêng phung Păng jêh ri mbu nơm jêng kloh ueh, jêh ri Păng mra ƀư ăn nơm nây hăn dăch Păng; nơm Păng săch mra ăn hăn dăch Păng.

⁶ Ơ Y-Kôra, ƀư hom nau aơ: May jêh ri lĕ rngôch phung hăn tĭng may, djôt hom khăl gŭch ƀâu kah;

⁷ ôi taơ, panăp Brah Yêhôva, dơm hom ŭnh tâm khăl gŭch ƀâu kah jêh ri dơm ndơ ƀâu kah tâm nây. Mbu Brah Yêhôva mra săch mra jêng nơm kloh ueh. Hơi phung kon sau Lêvi, găp hŏ tŏng jêh!”

⁸ Y-Môis lah đah Y-Kôra: “Iăt hom, hơi phung kon bu klâu Lêvi!

⁹ Brah Ndu phung Israel hŏ prăp êng jêh khân may bơh phung Israel tâm rƀŭn, jêh ri djôt leo khân may hăn dăch Păng, gay ƀư kan tâm Ngih Bok Brah Yêhôva, jêh ri pah kan tanăp phung tâm rƀŭn. Nau pah kan ma khân păng jêng jê̆ lĕ?

¹⁰ Păng ăn may jêh ri lĕ rngôch phung kon sau Lêvi hăn dăch Păng, ƀiălah khân may joi pah kan ma kôranh ƀư brah lĕ?

¹¹ Yor ri, may jêh ri lĕ rngôch phung hăn tĭng ma may rgum gay ŭch tâm rdâng đah Brah Yêhôva! Mbu Y-Arôn jêng kŏ tât khân may ngơi ƀrôk tâm rdâng đah păng?”

¹² Y-Môis prơh bu hăn kuăl Y-Dathan jêh ri Y-Abiram, phung kon bu klâu Y-Êliap, ƀiălah bar hê khân păng lah: “Hên mâu hăn văch ôh!

¹³ Di lĕ jêng du nau jê̆ nau may hŏ njŭn leo hên du luh bơh n'gor bêng ma dak toh jêh ri dak sŭt, gay khĭt tâm bri rdah, gay njêng may nơm kôranh hên?

¹⁴ Rlau lơn ma nĕ, may mâu njŭn hên lăp ôh tâm du n'gor bêng ma dak toh jêh ri dak sŭt, mâu lĕ ŭch ăn ma hên mir mâu lah đang krăk ƀâu jêng drăp ndơn. May ŭch rloch găr măt Phung ƀon lan aơ ƀơh? Hên mâu mra hăn hao ôh!”

¹⁵ Y-Môis ji nuih ngăn jêh ri lah ma Brah Yêhôva: “Dăn Kôranh Brah lơi dơn ma ndơ ƀư brah khân păng nhhơr. Gâp mâu nhŭp du mlâm seh bri ôh tă bơh khân păng jêh ri gâp mâu mâp ƀư nau mhĭk ôh ma du huê nuyh tâm khân păng.”

¹⁶ Y-Môis lah ma Y-Kôra: “Ôi taơ, may jêh ri lĕ rngôch phung hăn tĭng may, jêh ri Y-Arôn, hăn hom tâm mâp ma Brah Yêhôva.

¹⁷ Ăn ăp nơm djôt khăl gŭch ƀâu kah jêh ri dơm ndơ ƀâu kah tâm nây, jêh nây ăp nơm khân may nhhơr khăl gŭch ƀâu kah păng nơm tanăp Brah Yêhôva, jêng bar rhiăng prăm jât mlâm khăl gŭch ƀâu kah. May jêh ri Y-Arôn, geh hom khăl gŭch ƀâu kah.”

¹⁸ Pôri ăp nơm khân păng sŏk khăl gŭch ƀâu kah dơm ŭnh tâm nây jêh ri dơm ndơ ƀâu kah tâm nây, jêh nây khân păng dâk ta mpông Ngih Bok Nau Tâm Rƀŭn ndrel ma Y-Môis jêh ri Y-Arôn.

¹⁹ Y-Kôra tâm rƀŭn lĕ rngôch phung ƀon lan tâm rdâng đah Y-Môis jêh ri Y-Arôn ta mpông Ngih Bok Nau Tâm Rƀŭn. Nau chrêk rmah Brah Yêhôva tâm mpơl ma lĕ rngôch phung tâm rƀŭn.

²⁰ Brah Yêhôva lah ma Y-Môis jêh ri Y-Arôn:

²¹ “Tâm nkhah hom khân may nơm luh bơh phung tâm rƀŭn aơ, Gâp mra ƀư rai khân păng ƀât lât dơm.”

²² Bar hê khân păng chŭn muh măt ta neh jêh ri lah: “Ơ Kôranh Brah jêng Brah Ndu ăn n'hâm ma lĕ rngôch nglay săk! Knŏng geh du huê bunuyh ƀư tih, ƀiălah May ji nuih nđâp ma lĕ rngôch bunuyh tâm rƀŭn lĕ?”

²³ Brah Yêhôva lah ma Y-Môis:

²⁴ “Lah hom ma phung tâm rƀŭn du ngai bơh ntŭk ngih Y-Kôra, Y-Dathan jêh ri Y-Abiram.”

²⁵ Y-Môis dâk hăn ma Y-Dathan jêh ri Y-Abiram; phung kôranh bu ranh phung Israel hăn tĭng păng.

²⁶ Păng lah ma phung tâm rƀŭn: “Aƀaơ, du ngai hom tă bơh ngih bok phung janh ƀai aơ, jêh ri lơi pah moh ndơ prăp ma khân păng, klach lah khân may mra khĭt yorlah nau tih khân păng.”

²⁷ Pôri khân păng du ngai bơh ntŭk Y-Kôra, Y-Dathan jêh ri Y-Abiram. Y-Dathan jêh ri Y-Abiram luh dâk ta mpông ngih bok khân păng ndrel ma phung ur, phung kon sau khân păng.

²⁸ Y-Môis lah: “Yor nau aơ, khân may mra gĭt năl ma Brah Yêhôva geh njuăl gâp ƀư lĕ kan aơ, jêh ri mâu di tĭng nâm gâp nơm ŭch ôh.

²⁹ Tơlah phung aơ khĭt nâm bu lĕ rngôch bunuyh êng, mâu lah tơlah khân păng dơn ndrel nâm bu lĕ rngôch bunuyh pôri Brah Yêhôva mâu mra njuăl ôh gâp hăn.

³⁰ Ƀiălah tơlah Brah Yêhôva ƀư du nau mhe; tơlah neh hă mbung păng jêh ri rvăn khân păng ndrel ma lĕ rngôch ndơ prăp ma khân păng, jêh nây tơlah khân păng hôm dôl rêh ƀiălah hăn jŭr tâm ƀon phung khĭt, pôri khân may mra gĭt ma phung aơ hŏ ngơi jêh sưr ma Brah Yêhôva.”

³¹ Lah Y-Môis ngơi nau aơ lĕ lôch jêh, neh tâm dâng jâng khân păng đang luh,

³² hă mbung păng rvăn khân păng, phung bunuyh tâm ngih jêh ri lĕ rngôch bunuyh hăn tĭng Y-Kôra ndrel ma drăp ndơ khân păng.

³³ Pôri khân păng dôl hôm e rêh nđâp lĕ rngôch ndơ prăp ma khân păng hăn jŭr tâm ƀon phung khĭt; neh njĭr tay jêh ri khân păng rai lôch tă bơh nklang phung tâm rƀŭn.

³⁴ Lĕ rngôch phung Israel gŭ jŭm nchuăt du dôl tăng bâr khân păng nter, nchuăt du, yorlah khân păng lah: “Njrăng hom klach lah neh rvăn he đŏng!”

³⁵ Jêh nây du chiông ŭnh luh tă bơh Brah Yêhôva su bar rhiăng prăm jât nuyh hŏ nhhơr ndơ ƀâu kah.

³⁶ Brah Yêhôva lah ma Y-Môis:

³⁷ “Lah hom ma Y-Êlêasar, kon bu klâu Y-Arôn kôranh ƀư brah, ăn păng sŏk khăl gŭch ƀâu kah bơh ntŭk ŭnh sa, jêh ri nkhŭt ŭnh tâm lĕ khăl gŭch ƀâu kah ăn ngai, yorlah khăl gŭch ƀâu kah nây jêng kloh ueh.

³⁸ Bi lĕ khăl gŭch ƀâu kah phung bunuyh ƀư tih jêh ri kŏ tât roh nau rêh khân păng; pôri ăn bu chiăr jêng lĕ pŏk n'hơ gay nkŭm nơng ƀư brah, yorlah lĕ khăl gŭch ƀâu kah nây hŏ nhhơr panăp Brah Yêhôva jêh ri jêng kloh ueh jêh. Pôri khân păng jêng du ndơ tâm mbên ma phung ƀon lan Israel.”

³⁹ Pônây Y-Êlêasar kôranh ƀư brah sŏk lĕ khăl gŭch ƀâu kah ma kông tă bơh phung ŭnh sa nôk nhhơr jêh; jêh ri đă ƀư jêng lĕ pŏk ƀư chiăr n'hơ gay nkŭm nơng ƀư brah.

⁴⁰ Nau aơ nkah ăn gĭt ma phung ƀon lan Israel pô aơ mâu geh ôh du huê nơm, knŏng noi deh Arôn, dơi vay hăn dăch gay gŭch ndơ ƀâu kah tanăp Brah Yêhôva; lah mâu, bunuyh nây mra jêng nâm bu Y-Kôra jêh ri phung ndrel ma păng, di nâm nau Brah Yêhôva hŏ ntăm jêh ma Y-Môis.

⁴¹ Ôi taơ, lĕ rngôch phung ƀon lan Israel tâm rƀŭn ngơi ƀrôk tâm rdâng đah Y-Môis jêh ri Y-Arôn. Khân păng lah: “Khân may hŏ nkhĭt jêh ri phung ƀon lan Brah Yêhôva!”

⁴² Tơlah phung ƀon lan dôl tâm rƀŭn ŭch tâm rdâng đah Y-Môis jêh ri Y-Arôn, phung tâm rƀŭn uănh ma Ngih Bok Nau Tâm Rƀŭn, saơ ndâr tŭk nkŭm Ngih Bok jêh ri nau chrêk rmah Brah Yêhôva tâm mpơl.

⁴³ Y-Môis jêh ri Y-Arôn tât panăp Ngih Bok Nau Tâm Rƀŭn,

⁴⁴ jêh ri Brah Yêhôva lah ma Y-Môis:

⁴⁵ “Du ngai hom tă bơh phung tâm rƀŭn aơ, Gâp mra ƀư rai khân păng ƀât lât dơm.” Ƀiălah bar hê khân păng chŭn muh măt ta neh,

⁴⁶ jêh nây Y-Môis lah ma Y-Arôn: “Sŏk hom khăl gŭch ƀâu kah may, dơm ŭnh tă bơh nơng ƀư brah tâm nây jêh ri dơm ndơ ƀâu kah tâm nây, djôt leo gơnh gơnh ma phung tâm rƀŭn gay ƀư nau rƀŭn chuai nau tih ma khân păng, yorlah nau ji nuih tă bơh Brah Yêhôva jêh ri nau tât mhĭk ntơm jêh.”

⁴⁷ Y-Arôn ƀư tĭng nâm Y-Môis lah jêh jêh ri păng nchuăt ta nklang phung tâm rƀŭn. Aơ, nau mhĭk hŏ ntơm jêh ta nklang phung ƀon lan. Y-Arôn nhhơr ndơ ƀâu kah jêh ri ƀư nau rƀŭn chuai nau tih ma phung ƀon lan.

⁴⁸ Păng dâk ta vah vang phung khĭt jêh ri phung rêh, jêh ri nau tât mhĭk dơi nsrŭng ro.

⁴⁹ Geh jât puăn rbăn pơh rhiăng phung khĭt yorlah nau mhĭk aơ, mâu kơp rnoh bunuyh khĭt tâm nau Y-Kôra.

⁵⁰ Y-Arôn plơ̆ sĭt ma Y-Môis ta mpông Ngih Bok Nau Tâm Rƀŭn jêh ri nau tât mhĭk dơi nsrŭng.