Nau Kơp Bunuyh 15 - Nau Brah Ndu Ngơi 2023

Nau vay ma lĕ ndơ ƀư brah êng

¹ Brah Yêhôva lah ma Y-Môis:

² “Lah hom ma phung ƀon lan Israel pô aơ: ‘Tơlah khân may lăp tâm n'gor Gâp ăn ma khân may gŭ,

³ jêh ri nôk khân may nhhơr ma Brah Yêhôva ndrôk mâu lah biăp nâm bu du ndơ ƀư brah nhhơr ma ŭnh sa, geh n'hôl ƀâu kah ma Brah Yêhôva, mâu lah ndơ ƀư brah gŭch, mâu lah mpa ƀư brah gay ƀư nanê̆ nau ton mâu lah ndơ ƀư brah ma nau ŭch, mâu lah ndơ ƀư brah tâm lĕ yan nau rƀŭn,

⁴ nhhơr hom ma Brah Yêhôva du ndơ ƀư brah rnih môi ma bar lit rnih môi tâm pach đah du lit dak ngi.

⁵ Ăp mlâm biăp dŏng ma ndơ ƀư brah gŭch mâu lah ndơ ƀư brah êng, may nhhơr hom du lit ndrănh ƀư ndơ nhhơr nhêt.

⁶ Tơlah mpa ƀư brah jêng mlâm biăp nkuăng ăn may nkra prăp ma du ndơ ƀư brah rnih môi tâm pot đah puăn lit rnih môi pach đah rlau du lit dak ngi,

⁷ jêh ri dŏng rlau du lit ndrănh ma ndơ nhhơr nhêt, geh n'hôl ƀâu kah nhhơr ma Brah Yêhôva.

⁸ Nôk nhhơr du mlâm ndrôk kon ma ndơ ƀư brah gŭch, mâu lah jêng ndơ ƀư brah ƀư nanê̆ nau ton, mâu lah jêng ndơ ƀư brah ma nau đăp mpăn ma Brah Yêhôva

⁹ nhhơr hom ndrel ma ndrôk kon du ndơ ƀư brah rnih môi ma prao lit rnih môi pach đah bar lit dak ngi

¹⁰ jêh ri nhhơr bar lit ndrănh ma ndơ nhhơr nhêt. Nĕ jêng ndơ ƀư brah ăn ŭnh sa nhhơr n'hôl ƀâu kah ma Brah Yêhôva.

¹¹ Bu ăt mra ƀư tâm ban pônây ma ăp mlâm ndrôk nkuăng, ăp mlâm biăp nkuăng, ăp mlâm biăp kon nkuăng mâu lah be kon.

¹² Tĭng nâm rnoh mpa ƀư brah mra nhhơr gay ndrăp lor tĭng nâm nau nây ma ăp mlâm.

¹³ Ăp nơm dơi deh tâm n'gor mra ƀư tâm ban pônây dôl nhhơr du ndơ ƀư brah ăn ŭnh sa, geh n'hôl ƀâu kah ma Brah Yêhôva.

¹⁴ Tơlah du huê bu năch gŭ njưh ƀât lât ndrel ma khân may mâu lah geh du huê gŭ ta nklang khân may ntơm bơh rô̆ nây tât rô̆ ri, ăn ŭnh sa nhhơr du ndơ ƀư brah, geh n'hôl ƀâu kah ma Brah Yêhôva ăn ƀư di ngăn tâm ban nau khân may hŏ ƀư.

¹⁵ Tâm phung tâm rƀŭn, knŏng geh du nau vay dăp nsum gay dŏng ma khân may jêh ri ma lĕ phung gŭ njưh ƀât lât ta nklang khân may. Nây jêng du nau vay dăp n'ho ro tâm lĕ rngôch rô̆. Khân may jêh ri phung gŭ njưh ƀât lât da dê du ai tâm ban tanăp Brah Yêhôva.

¹⁶ Mra geh du nau vay jêh ri du nau vay nal du ai tâm ban ma khân may jêh ri ma nơm gŭ njưh ƀât lât tâm nklang khân may.’”

¹⁷ Brah Yêhôva ngơi đŏng ma Y-Môis:

¹⁸ “Lah hom ma phung ƀon lan Israel: ‘Ndah jŏ khân may tât tâm n'gor Gâp mra njŭn khân may lăp

¹⁹ jêh ri khân may sa piăng let n'gor nây, ăn khân may nhhơr hom du ndơ nhhơr tĭng nau yơr hao ma Brah Yêhôva.

²⁰ Ntơm bơh rnih pach lor lơn, ăn khân may ƀư du mlâm du ƀănh jê̆ jêh ri nhhơr tĭng nau yơr hao. Khân may nhhơr hom nâm nhhơr du ndơ nhhơr bơh ntŭk mprah ba.

²¹ Ntơm bơh rô̆ aơ tât rô̆ ri, khân may nhhơr hom tĭng nau yơr hao ma Brah Yêhôva du ndơ nhhơr ma rnih pach lor lơn phung kon.’”

Ndơ ƀư brah ma nau tih mâu ŭch ƀư

²² “‘Nôk khân may lăn ƀư tih, mâu ƀư tĭng ndô̆ ôh lĕ rngôch nau vay Brah Yêhôva ntăm hŏ ngơi jêh ma Y-Môis,

²³ jêng lĕ rngôch nau Brah Yêhôva hŏ dŏng Y-Môis ntĭnh ntăm jêh ma khân may ntơm bơh nar Brah Yêhôva ăn jêh lĕ nau vay ntăm aơ jêh ri bơh nĕ pakơi taơ tâm lĕ rngôch rô̆,

²⁴ tơlah phung tâm rƀŭn lăn ƀư tih jêh ƀiălah mâu gĭt ôh, lĕ phung tâm rƀŭn mra nhhơr du mlâm ndrôk nkuăng rah dŏng ma ndơ ƀư brah gŭch geh n'hôl ƀâu kah nhhơr ma Brah Yêhôva, ndrel ma ndơ ƀư brah rnih môi jêh ri ndơ nhhơr nhêt jêh ri du mlâm be nkuăng jêng ndơ ƀư brah chuai nau tih.

²⁵ Kôranh ƀư brah mra ƀư nau rƀŭn chuai nau tih ma lĕ rngôch phung ƀon lan Israel tâm rƀŭn; khân păng mra geh nau yô̆ an yorlah nĕ jêng nau tih mâu ŭch ƀư jêh ri phung tâm rƀŭn hŏ njŭn leo jêh tât tanăp Brah Yêhôva du ndơ ƀư brah, jêng du ndơ ƀư brah ăn ŭnh sa nhhơr ma Brah Yêhôva, nđâp ma ndơ ƀư brah chuai nau tih khân păng vĭ.

²⁶ Lĕ rngôch phung Israel tâm rƀŭn jêh ri phung bu năch gŭ njưh ƀât lât ta nklang khân păng mra dơi yô̆ an nau tih yorlah lĕ rngôch phung ƀon lan ƀư tih jêh da dê yor nau vĭ nây.

²⁷ Ƀiălah tơlah knŏng du huê bunuyh lĕ lăn ƀư tih ma nau mâu mra ŭch ôh, ăn păng nhhơr du mlâm be me geh du năm jêng ndơ ƀư brah chuai nau tih.

²⁸ Kôranh ƀư brah mra ƀư nau rƀŭn chuai nau tih ma bunuyh ƀư nau tih vĭ tanăp Brah Yêhôva; tơlah lĕ ƀư nau rƀŭn chuai nau tih ma bunuyh nây, jêh nây păng mra geh nau yô̆ an.

²⁹ Knŏng geh du nau vay nsum dŏng ma ăp mbu nơm ƀư tih mâu ŭch ƀư, nđâp lah phung ƀon lan Israel mâu lah bunuyh bu năch gŭ njưh ƀât lât ta nklang khân păng.

³⁰ Ƀiălah mbu ŭch ƀư tih, gĭt lah bunuyh ƀon lan gŭ tâm n'gor mâu lah phung gŭ njưh ƀât lât, bunuyh nây ngơi sưr ma Brah Yêhôva jêh ri bu mra nsot lơi păng bơh phung ƀon lan Păng.

³¹ Yorlah păng tâm rmot ma nau Brah Yêhôva ngơi, ƀư tih nau vay Păng ntăm, pôri bu nsot lơi păng; nau tih păng mra nkhŭt ma păng nơm.’”

Nau vay ma nau ƀư tih nar Saƀat

³² Dôl phung ƀon lan Israel gŭ tâm bri rdah, bu saơ du huê bunuyh dônh long tâm nar saƀat.

³³ Phung saơ păng gŭ dônh long njŭn leo păng ma Y-Môis jêh ri Y-Arôn, jêh ri ma lĕ rngôch phung tâm rƀŭn.

³⁴ Bu krŭng păng, yorlah ê hŏ nanê̆ ôh moh bu mra ƀư ma păng.

³⁵ Brah Yêhôva lah ma Y-Môis: “Bu mra nkhĭt păng. Ăn lĕ rngôch phung tâm rƀŭn klŭp lŭ ta păng ta padih rmlak tahan.”

³⁶ Tâm ban pônây, lĕ rngôch phung tâm rƀŭn njŭn păng luh padih rmlak tahan jêh ri klŭp lŭ nkhĭt păng; bunuyh khĭt di nâm Brah Yêhôva hŏ ntĭnh jêh ma Y-Môis.

Nau vay ma grong ao

³⁷ Brah Yêhôva lah tay ma Y-Môis:

³⁸ “Ngơi hom ma phung ƀon lan Israel jêh ri ntăm ma khân păng: ‘Ntơm bơh rô̆ nây tât rô̆ ri, ƀư hom du mlâm grong ta bôl n'har ao khân păng nơm; ta ăp grong jĭm ntĭr du rse sut chăng.

³⁹ Ăn khân may anh mlâm grong nây gay dôl uănh saơ păng, khân may kah gĭt ma lĕ rngôch nau vay Brah Yêhôva ntăm gay tông tĭng, jêh ri mâu tĭng ndô̆ ôh nau nuih n'hâm jêh ri măt khân may nơm, jêng nau ƀư ma khân may ƀư nau văng tĭr.

⁴⁰ Pônây, khân may mra kah gĭt tay jêh ri ƀư tĭng kơt lĕ rngôch nau vay ntăm bơh Gâp jêh ri tâm ban pônây khân may mra prăp êng jêng kloh ueh ma Brah Ndu khân may.

⁴¹ Gâp nơm jêng Brah Ndu khân may, Nơm hŏ njŭn khân may du luh jêh tă bơh n'gor bri Êjipt, gay jêng Brah Ndu khân may. Gâp jêng Yêhôva Brah Ndu khân may.’”