Nau Kơp Bunuyh 14 - Nau Brah Ndu Ngơi 2023

Phung ƀon lan tâm rdâng jêh ri geh nau tâm rmal

¹ Lĕ rngôch phung tâm rƀŭn nter huy; phung ƀon lan nhĭm nhhiăng tâm măng nây.

² Lĕ rngôch phung ƀon lan Israel njang mbung đah Y-Môis jêh ri Y-Arôn; lĕ rngôch phung tâm rƀŭn lah ma bar hê: “Ueh lơn hên khĭt tâm n'gor bri Êjipt mâu lah khĭt tâm bri rdah aơ!

³ Mâm Yêhôva njŭn leo hên mŭt ta n'gor aơ gay ăn hên khĭt ma đao? Phung ur kon hên mra jêng ndơ khân păng sŏk gro. Bi ma hên, mâu ueh hĕ ăn ma hên plơ̆ sĭt rlet ma n'gor bri Êjipt?”

⁴ Jêh nây lah ndrăng khân păng: “Ăn he săch du huê kôranh jêh ri plơ̆ sĭt tay ma Êjipt.”

⁵ Y-Môis jêh ri Y-Arôn chon mon chŭn muh măt ta neh tanăp lĕ rngôch phung ƀon lan Israel tâm rƀŭn.

⁶ Y-Yôsuê, kon bu klâu Y-Nun, jêh ri Y-Kalep, kon bu klâu Y-Jêphunê, jêng bar hê tâm lĕ phung hăn n'hut uănh jêh n'gor, nkhêk bok ao khân păng nơm.

⁷ Bar hê bunuyh lah đah ma lĕ rngôch phung ƀon lan Israel tâm rƀŭn: “N'gor hên hŏ hăn n'hut uănh jêng du n'gor ueh ngăn.

⁸ Tơlah Yêhôva maak đah he, Păng mra njŭn he lăp tâm n'gor nây jêh ri ăn ma he du n'gor bêng ma dak toh jêh ri dak sŭt.

⁹ Knŏng geh du nau jêng khân may mâu ƀư nau tâm rdâng ôh đah Yêhôva jêh ri lơi ta klach ôh ma phung ƀon lan tâm n'gor bri nây, yorlah khân păng mra jêng ndơ sông sa ma he. Bu sŏk lơi jêh nau king tă bơh khân păng, ƀiălah Brah Yêhôva gŭ ndrel ma he. Lơi klach ôh ma khân păng!”

¹⁰ Nôk nây lĕ rngôch phung tâm rƀŭn ŭch klŭp khân păng ma lŭ, ƀiălah nau chrêk rmah Brah Yêhôva tâm mpơl tanăp măt phung ƀon lan Israel.

¹¹ Brah Yêhôva lah ma Y-Môis pô aơ: “Ndah hŏ jŏ phung ƀon lan aơ mưch Gâp jêh ri ndah nâm jŏ khân păng mâu mra chroh ôh ma Gâp, nđâp lah Gâp hŏ ƀư jêh âk nau mbên khlay ta nklang khân păng?

¹² Gâp mra nkhŭt khân păng ma nau ji tưp jêh ri ƀư rai khân păng, ƀiălah Gâp mra ƀư ma may jêng du phung ƀon lan toyh lơn jêh ri ktang lơn ma khân păng.”

¹³ Y-Môis ngơi lah ma Yêhôva pô aơ: “Phung ƀon lan Êjipt mra tăng nau nây, yorlah Kôranh Brah hŏ dŏng nau brah djôt leo jêh phung ƀon lan aơ luh bơh Êjipt,

¹⁴ jêh ri khân păng mra mbơh nau nây ma phung ƀon lan n'gor khân păng nơm. Hơi Brah Yêhôva, phung ƀon lan Êjipt hŏ gĭt jêh ma Kôranh Brah gŭ ta nklang Phung ƀon lan Israel jêh ri tâm mpơl jêh ăn khân păng saơ. N'gâng tŭk Kôranh Brah gŭ ta klơ phung ƀon lan aơ jêh ri May hăn panăp khân păng, tâm n'gâng tŭk dôl nar jêh ri tâm meh n'gâng ŭnh dôl măng.

¹⁵ Tơlah Kôranh Brah nkhĭt lơi lĕ phung ƀon lan aơ nâm bu nkhĭt du huê bunuyh, lĕ bri dak hŏ tăng jêh nkoch ma Kôranh Brah mra lah:

¹⁶ ‘Brah Yêhôva mâu dơi ôh njŭn phung ƀon lan aơ ma mŭt ta n'gor Păng hŏ sơm ton ăn jêh ma khân păng; yor nây Păng hŏ nkhĭt khân păng tâm bri rdah.’

¹⁷ Yor ri, aƀaơ gâp dăn nau brah Brah Yêhôva mpơl tâm nau chrêk rmah nâm Kôranh Brah hŏ ntăm jêh pô aơ:

¹⁸ ‘Brah Yêhôva mâu gơnh nuih ôh, Jêh ri ndrŏng ma nuih n'hâm yô̆ nđach, Yô̆ an nau tih jêh ri nau tâm rdâng, Ƀiălah mâu kơp nơm geh nau tih ôh jêng mâu geh nau tih, Jêh ri rmal ma phung kon sau kŏ tât pe puăn rô̆ nuyh Yorlah nau tih phung chô yau.’

¹⁹ Gâp dăn ma Kôranh Brah yô̆ an nau tih ma phung ƀon lan aơ tĭng nâm nau yô̆ nđach toyh Kôranh Brah, tĭng nâm Păng hŏ yô̆ an jêh âk tơ̆ ma khân păng ntơm bơh du tă bơh Êjipt tât ma aƀaơ ri.”

²⁰ Brah Yêhôva lah: “Gâp hŏ yô̆ an jêh ma khân păng tĭng nâm nau may dăn.

²¹ Ƀiălah, Gâp sŏk nau rêh jêh ri nau chrêk rmah bêng ma lam n'gor Gâp jêng Brah Yêhôva gay sơm ton pô aơ:

²² lĕ rngôch phung saơ jêh nau chrêk rmah jêh ri nau mbên khlay Gâp hŏ ƀư jêh tâm n'gor Êjipt jêh ri tâm bri rdah, ƀiălah hŏ rlong uănh jêh Gâp jât tơ̆, tâm ban đŏng mâu tông bâr Gâp ôh,

²³ mâu mra du huê bunuyh tâm khân păng mra saơ n'gor Gâp sơm ton jêh gay ăn ma phung chô yau khân păng. Mâu geh du huê ôh mưch ma Gâp mra saơ n'gor nây.

²⁴ Ƀiălah yorlah oh mon Gâp jêng Y-Kalep mâu geh du nau mĭn đah khân păng, ƀiălah păng hăn tĭng Gâp ma lĕ nuih n'hâm răp jăp, Gâp mra njŭn păng lăp tâm n'gor păng lĕ hăn n'hut uănh jêh; noi deh bunuyh mra dơi n'gor nĕ jêng drăp ndơn.

²⁵ Yorlah phung ƀon lan Amalek jêh ri phung ƀon lan Kanaan gŭ tâm lĕ rlŭng, Yorlah ôi taơ khân may rle plơ̆ tay jêh ri hăn mŭt tâm bri rdah, mpeh ma Dak Mƀŭt Chăng.”

²⁶ Brah Yêhôva lah ma Y-Môis jêh ri ma Y-Arôn:

²⁷ “Ndah hŏ jŏ phung tâm rƀŭn janh ƀai aơ ăt njang mbung đah Gâp? Gâp hŏ tăng jêh nau phung ƀon lan Israel njang mbung, ngơi ƀrôk Gâp.

²⁸ Lah hom ma khân păng, ‘Brah Yêhôva lah: Gâp sŏk nau rêh Gâp gay ngơi pô aơ Gâp mra ƀư ma khân may di nâm nau Gâp hŏ tăng jêh khân may njang mbung:

²⁹ Săk jăn khân may khĭt mra cha lôt tâm bri rdah aơ. Lĕ rngôch hŏ kơp dơi jêh ntơm bơh bar jât năm leo klơ, jêng phung ngơi ƀrôk jêh đah Gâp,

³⁰ mâu mra dơi lăp ôh tâm n'gor Gâp hŏ ton jêh ăn ma khân may, knŏng Y-Kalep kon bu klâu Y-Jêphunê jêh ri Y-Yôsuê, kon bu klâu Y-Nun.

³¹ Khân may lah pô aơ phung kon jê̆ khân may phung rlăng mra sŏk gro, ƀiălah Gâp mra njŭn phung kon jê̆ nây lăp tâm n'gor jêh ri khân păng mra maak dơn n'gor khân may hŏ tâm rmot jêh.

³² Bi khân may mra chalơi săk jăn khân may khĭt tâm bri rdah aơ.

³³ Phung kon khân may mra rmăk biăp tâm bri rdah dôl puăn jât năm, jêh ri mra anh nau rmal yor nau tih mâu răp jăp khân may kŏ tât nôk nơm nglĕ dŭt tâm phung khân may khĭt jêh tâm bri rdah.

³⁴ Khân may hăn n'hut uănh ndah âk nar, jêng puăn jât nar, pôri khân may mra anh nau rmal yorlah nau tih khân may nơm dôl puăn jât năm, ăp nar ntrok ma du năm. Dôl nây khân may mra gĭt nau rmal Gâp.

³⁵ Gâp, Brah Yêhôva hŏ ngơi jêh: N'hêl nanê̆ Gâp mra ƀư lĕ nau nây ma lĕ rngôch phung tâm rƀŭn janh ƀai aơ. Phung gŭ tâm rnglăp ndrel đah ndrăng khân păng gay tâm rdâng đah Gâp, yor ri khân păng mra rai jêh ri mra khĭt tâm bri rdah nây.’”

³⁶ Phung bunuyh Y-Môis prơh hăn jêh ăn hăn n'hut uănh n'gor nây jêh ri plơ̆ sĭt jêh nsônh ăn lĕ rngôch phung tâm rƀŭn njang mbung yorlah nkoch bri nau mhĭk ma neh ton,

³⁷ khân păng geh nau rmal ma du nau tât jêh ri hŏ khĭt tanăp Yêhôva.

³⁸ Ƀiălah tâm phung hăn n'hut uănh n'gor knŏng geh Y-Yôsuê, kon bu klâu Y-Nun, jêh ri Y-Kalep, kon bu klâu Y-Jêphunê, hôm e rêh.

³⁹ Y-Môis nkoch tay lĕ nau ngơi aơ ma lĕ rngôch phung ƀon lan Israel jêh ri phung ƀon lan nhhiăng nhĭm hâu ngăn.

⁴⁰ Khân păng dâk ơm ôi hăn hao n'gơn yôk jêh ri lah: “Hên mra hăn tât ntŭk Brah Yêhôva hŏ ton jêh yorlah hên ƀư tih jêh.”

⁴¹ Ƀiălah Y-Môis lah: “Mâm khân may rlau nau ntăm Brah Yêhôva? Nau nây mâu mra dơi jêng ôh.

⁴² Lơi ta hăn hao tât ta nây, klach lah phung rlăng khân may dơi lơh khân may, yorlah Brah Yêhôva mâu hôm gŭ ta nklang khân may ôh.

⁴³ Nĕ, phung ƀon lan Amalek jêh ri phung Kanaan dôl gŭ panăp măt khân may; khân may mra khĭt ma măt đao khân păng. Yorlah khân may hŏ mâu gŭ răp jăp Brah Yêhôva, pôri Păng mâu mra gŭ ndrel ôh ma khân may.”

⁴⁴ Ƀiălah khân păng rôih ko ăt hăn hao n'gơn yôk nđâp Hip Nau Tâm Rnglăp Yêhôva tâm ban đŏng Y-Môis mâu ŭch ăn luh ôh tă bơh rmlak tahan.

⁴⁵ Phung ƀon lan Amalek jêh ri phung Kanaan gŭ tâm n'gor klơ dor yôk hăn trŭnh tâm lơh rai Phung ƀon lan Israel jêh ri tĭng khân păng tât ta Hôrma.