Nau Kơp Bunuyh 13 - Nau Brah Ndu Ngơi 2023

Jât bar n'hut uănh

¹ Brah Yêhôva lah ma Y-Môis:

² “Prơh hom bunuyh hăn n'hut uănh n'gor Kanaan, n'gor Gâp mra ăn ma phung ƀon lan Israel. Ăp ndŭl mpôl mra prơh du huê bunuyh hăn, jêng du tâm phung kôranh chiă uănh khân păng.”

³ Pôri Y-Môis prơh khân păng hăn tă bơh bri rdah Paran, tĭng nâm Yêhôva ntĭnh. Lĕ rngôch khân păng jêng kôranh ma phung ƀon lan Israel.

⁴ Aơ jêng amoh khân păng: Ndŭl mpôl Ruben, geh Y-Samua, kon bu klâu Y-Sakur;

⁵ ndŭl mpôl Simêôn, geh Y-Saphat, kon bu klâu Y-Hôri;

⁶ ndŭl mpôl Yuđa, geh Y-Kalep, kon bu klâu Y-Jêphunê;

⁷ ndŭl mpôl Isakar, geh Y-Igal, kon bu klâu Y-Yôsep;

⁸ ndŭl mpôl Êphraim, geh Y-Hôsêa, kon bu klâu Y-Nun;

⁹ ndŭl mpôl Benjamin, geh Y-Palti, kon bu klâu Y-Raphu;

¹⁰ ndŭl mpôl Sabulôn, geh Y-Gadiel, kon bu klâu Y-Sôdi;

¹¹ ndŭl mpôl Yôsep (jêng ndŭl mpôl Manasê) geh Y-Gadi, kon bu klâu Y-Susi;

¹² ndŭl mpôl Dan, geh Y-Amiêl, kon bu klâu Y-Gêmali;

¹³ ndŭl mpôl Aser, geh Y-Sêthur, kon bu klâu Y-Mikel;

¹⁴ ndŭl mpôl Naptali, geh Y-Nahbi, kon bu klâu Y-Vôsi;

¹⁵ ndŭl mpôl Gat, geh Y-Gêuel, kon bu klâu Y-Maki.

¹⁶ Nĕ jêng amoh phung bunuyh Y-Môis prơh hăn n'hut uănh n'gor. Y-Môis ntơ amoh ma Y-Hôsêa, kon bu klâu Y-Nun, jêng Y-Yôsuê.

¹⁷ Nôk Y-Môis prơh khân păng hăn n'hut uănh n'gor Kanaan, Y-Môis ntĭnh pô aơ: “Hăn hom tât ta Nêgep, hăn bri leo klơ dor yôk,

¹⁸ jêh ri uănh mâm n'gor jêng, phung ƀon lan gŭ ta nây ktang mâu lah ra ai, djê̆ mâu lah âk,

¹⁹ n'gor khân păng ueh mâu lah mhĭk, lĕ ƀon khân păng gŭ jêng ntŭk mâm nau, geh mpir ƀon nâp mâu lah knŏng jêng lĕ rmlak tahan, mâu geh pêr mâu lah mpir;

²⁰ neh jêng ngăn mâu lah mâu jêng, geh tơm si mâu lah mâu. Ăn janh nuih, jêh ri djôt sĭt djê̆ play tơm si bơh n'gor nây.” Nôk nây jêng bôk yan play krăk ƀâu.

²¹ Pônây khân păng hăn hao jêh ri n'hut uănh n'gor ntơm bơh bri rdah Sin kŏ tât ta Rêhôp, dăch Hamat.

²² Khân păng hăn hao Nêgep, tât ta ƀon Hêbron jêng ntŭk geh Y-Ahiman, Y-Sêsai jêh ri Y-Talmai, kon sau Y-Anak. Ƀon Hêbron ndâk lor pơh năm ma ƀon Sôan tâm bri Êjipt.

²³ Khân păng tât ta n'hor dak Êskôl, ta nây khân păng nkăp du n'gĭng tơm krăk ƀâu geh du rkŭm play krăk ƀâu jêh ri bar hê dŏng mâng gay tung. Khân păng djôt sĭt đŏng lĕ play pom gra nat jêh ri play rvi.

²⁴ Bu ntơ ntŭk nây jêng n'hor dak Êskôl yor geh rkŭm krăk ƀâu phung Israel hŏ nkăp jêh ta nây.

Nau ngơi nkoch tay ma nau n'hut uănh

²⁵ Khân păng hăn n'hut uănh n'gor tâm puăn jât nar jêh ri plơ̆ sĭt.

²⁶ Phung hăn n'hut uănh tât ma Y-Môis, Y-Arôn jêh ri ma lĕ rngôch phung Israel tâm rƀŭn tâm bri rdah Paran ta Kadês jêh ri nkoch tay lĕ nau ma bar hê khân păng jêh ri ma lĕ rngôch phung tâm rƀŭn iăt jêh ri khân păng mpơl ăn uănh kao play tă bơh n'gor nây.

²⁷ Khân păng nkoch ăn ma Y-Môis pô aơ: “Hên hăn tât jêh ma n'gor khân may hŏ prơh hên hăn. Nây jêng du n'gor bêng ma dak toh jêh ri dak sŭt; aơ jêng kao play tă bơh n'gor nây.

²⁸ Ƀiălah, phung ƀon lan gŭ tâm n'gor nây jêng ktang, ƀon jêng toyh nâp ngăn jêh ri dĭ ngăn. Hên saơ đŏng phung kon sau Y-Anak gŭ ta nây.

²⁹ Phung Amalek gŭ ta Nêgep; phung Hitit, phung Jêbusit jêh ri phung Amôrit gŭ tâm n'gor klơ dor yôk; jêh ri phung Kanaan gŭ dăch dak mƀŭt jêh ri njŏ tĭng kơh dak krong Yurdan.”

³⁰ Nôk nây ro, Y-Kalep ƀư ma phung ƀon lan gŭ rklăk hom, dôl khân păng ngơi ƀrôk đah Y-Môis, jêh ri păng lah: “Ăn he hăn hao hom jêh ri pit sŏk n'gor nây, yorlah he dơi tâm lơh.”

³¹ Ƀiălah khân may hăn ndrel ma Y-Kalep jêh ri lah: “He mâu dơi hăn hao tâm lơh ôh ma phung ƀon lan nây, yorlah khân păng jêng ktang lơn ma he.”

³² Khân păng nkoch tay ma phung ƀon lan Israel ma n'gor khân păng hăn n'hut uănh jêh jêng mâu ueh, jêh ri lah pô aơ: “N'gor hên hŏ hăn n'hut uănh jêh jêng du n'gor sa rvăn phung ƀon lan păng nơm. Lĕ rngôch phung bunuyh hên saơ lĕ tâm n'gor nây jêng phung juat toyh.

³³ Hên saơ phung juat toyh nây, jêng phung kon sau Y-Anak, jêng phung ƀon lan toyh juat gŭ ta nây. Hên saơ hên nơm nâm bu krah ndrach jêh ri khân păng saơ hên kơt nây đŏng.”