Nau Kơp Bunuyh 12 - Nau Brah Ndu Ngơi 2023

Y-Arôn jêh ri H'Miriam tâm rdâng đah Y-Môis

¹ H'Miriam jêh ri Y-Arôn ngơi kek Y-Môis yorlah bu ur Êthiôpi păng hŏ nđăp jêh yorlah păng hŏ nđăp jêh du huê bu ur Êthiôpi ƀư ur păng.

² Bar hê lah pô aơ: “Brah Yêhôva knŏng lah ma Y-Môis dơm hĕ? Mâu di Păng ngơi đŏng ma he?” Brah Yêhôva tăng nau nây.

³ Y-Môis jêng du huê bunuyh hêt rhôi, hêt rhôi lơn ma lĕ rngôch bunuyh ta neh ntu.

⁴ Ƀât lât Brah Yêhôva lah ma Y-Môis, ma Y-Arôn jêh ri ma H'Miriam pô aơ: “Lĕ pe nuyh văch hom Ngih Bok Nau Tâm Rƀŭn.” Jêh ri lĕ pe khân păng hăn tât da dê.

⁵ Brah Yêhôva jŭr tâm meh ndâr tŭk jêh ri gŭ ta mpông Ngih Bok Nau Tâm Rƀŭn, jêh nây kuăl Y-Arôn jêh ri H'Miriam. Nôk bar hê khân păng hăn tât,

⁶ Păng lah: “Iăt hom nau Gâp. Tơlah geh du huê nơm mbơh lor gŭ tâm nklang khân may Gâp jêng Brah Yêhôva mra tâm mpơl ma păng tâm nau tâm saơ Jêh ri Gâp ngơi ma păng tâm nau mbơi.

⁷ Ƀiălah ma oh mon Gâp, păng jêng Y-Môis mâu geh pônây ôh. Păng răp jăp tâm lĕ ngih Gâp.

⁸ Gâp ngơi đah păng mbung ndrăng mbung ma nau rah vah, mâu geh nau ngơi ndâp Jêh ri păng saơ rup Brah Yêhôva. Mâm khân may mâu klach ƀiălah ngơi kek đah oh mon Gâp jêng Y-Môis?”

⁹ Nau Brah Yêhôva ji nuih hit hao ma bar hê khân păng jêh ri Păng du bơh khân păng.

H'Miriam geh ji phŭng

¹⁰ Tơlah ndâr tŭk du bơh tă bơh Ngih Bok Nau Tâm Rƀŭn, ta aơ H'Miriam geh phŭng, nglang nâm bu pler. Y-Arôn rle uănh ma H'Miriam jêh ri saơ păng geh ji phŭng jêh.

¹¹ Y-Arôn lah ma Y-Môis: “Hơi, kôranh gâp, lơi tâm rmal hên yorlah nau tih hên hŏ ƀư tih tâm nau rluk.

¹² Lơi ta ăn bu ur nâm bu du huê bunuyh hŏ rai jêh du n'gul nglay săk tơlah păng luh du bơh ndŭl me.”

¹³ Y-Môis nter ma Brah Yêhôva pô aơ: “Hơi Brah Ndu! Dăn ƀư bah an ma păng!”

¹⁴ Brah Yêhôva lah ma Y-Môis: “Tơlah mbơ̆ păng soh jêh dak diu tra muh măt păng, mâu hĕ păng mra prêng dôl tâm pơh nar? Ăn bu krŭng păng padih rmlak tahan dôl pơh nar, jêh nây păng mra dơi bu njŭn tay tâm rmlak tahan.”

¹⁵ Pônây, bu krŭng H'Miriam padih rmlak tahan dôl pơh nar. Phung ƀon lan mâu hŏ hăn du luh ôh kŏ tât H'Miriam dơi dơn lăp rmlak tahan.

¹⁶ Jêh nau nây phung ƀon lan dâk hăn tă bơh Hasêrôt jêh ri ndâk ngih bok tâm bri rdah Paran.