Nau Kơp Bunuyh 10 - Nau Brah Ndu Ngơi 2023

Bar mlâm nŭng ma prăk

¹ Brah Yêhôva lah ma Y-Môis:

² “May ƀư hom bar mlâm nŭng ma prăk bu chiăr n'hơ jêh ri dŏng khân păng gay kuăl rgum phung tâm rƀŭn jêh ri ntăm ma lĕ rmlak tahan hăn du luh.

³ Tơlah lĕ bar tơ̆ bu uh nŭng, lĕ rngôch phung tâm rƀŭn mra tâm rƀŭn tanăp măt may ta ntŭk lăp Ngih Bok Nau Tâm Rƀŭn.

⁴ Tơlah bu uh knŏng du mlâm nŭng, phung kôranh jêng phung kôranh chiă uănh lĕ Israel ndŭl mpôl mra tâm rƀŭn tanăp măt may.

⁵ Tơlah khân may uh nŭng ăn nteh huy pôri phung rmlak tahan gŭ mpeh luh nar mra hăn du luh.

⁶ Tơlah khân may uh nŭng nteh huy tal bar, phung rmlak tahan gŭ mpeh rđŭng mra hăn du luh. Bu mra uh nŭng nteh huy ndah jŏ phung rmlak tahan ăn hăn du luh.

⁷ Tơlah tâm rƀŭn phung tâm rƀŭn, ăn khân may uh nŭng, ƀiălah mâu mra uh nteh huy ôh.

⁸ Phung kon bu klâu Y-Arôn jêng phung kôranh ƀư brah mra uh lĕ nŭng nây. Nĕ jêng nau vay nal n'ho ro ma khân may tâm lĕ rngôch rnôk.

⁹ Nôk tâm n'gor geh tâm lơh jêh ri ăn khân may hăn du luh tâm lơh tâm rdâng đah phung rlăng tŭn jot khân may, pôri khân may mra uh nŭng ăn hăn tâm lơh. Nôk nây taơ, Brah Yêhôva Brah Ndu khân may mra kah gĭt ma khân may jêh ri rklaih ma khân may luh bơh phung rlăng.

¹⁰ Tâm lĕ nar răm maak, tâm lĕ yan nau rƀŭn toyh jêh ri ta nar bôk khay, ăn khân may uh nŭng tâm nôk nhhơr lĕ ndơ ƀư brah gŭch jêh ri ndơ ƀư brah ma nau đăp mpăn. Tanăp Brah Ndu khân may, bâr nŭng mra dŏng gay nkah khân may kah gĭt pô aơ Gâp jêng Brah Yêhôva Brah Ndu khân may.”

Rnôk gŭ njưh tâm bri rdah ( 10:11 – 21:35 ) Phung ƀon lan Israel ntơm nau hăn trong

¹¹ Tâm nar bar jât khay bar năm tal bar, ndâr tŭk hao leo klơ tă bơh Ngih Bok Nau Tâm Rnglăp.

¹² Tă bơh bri rdah Sinai, phung ƀon lan Israel hăn nsong kŏ tât nôk ndâr tŭk nsrŭng gŭ tâm bri rdah Paran.

¹³ Aơ jêng tơ̆ tal nguay phung ƀon lan Israel hăn du luh tĭng nâm nau Brah Yêhôva ntĭnh ma Y-Môis.

¹⁴ N'ha kơ ma rmlak tahan Yuđa hăn du luh lor, tĭng ăp ndŭl mpôl. Y-Nahsôn, kon bu klâu Y-Aminadap, kôranh phung tahan Yuđa.

¹⁵ Y-Nêthanel, kon bu klâu Y-Suar, kôranh ma phung tahan phung ndŭl mpôl Isakar.

¹⁶ Y-Êliap, kon bu klâu Y-Hêlôn, kôranh ma phung tahan ndŭl mpôl Sabulôn.

¹⁷ Rnôk nây bu hŏ rơih jêh Ngih Bok, jêh nây phung kon sau Y-Gersôn jêh ri phung kon sau Y-Mêrari, tung Ngih Bok hăn du luh.

¹⁸ Jêh nĕ, n'ha kơ rmlak tahan Ruben hăn du luh, tĭng ăp ndŭl mpôl. Y-Êlisur, kon bu klâu Y-Sêdur, kôranh ma phung tahan Ruben.

¹⁹ Y-Sêlumiel, kon bu klâu Y-Surisadai, kôranh ma phung tahan ndŭl mpôl Simêôn.

²⁰ Y-Êliasap, kon bu klâu Y-Dêuel, kôranh ma phung tahan ndŭl mpôl Gat.

²¹ Rnôk nây phung Kôhat tung lĕ ndơ kloh ueh hăn du luh. Bu ndâk jêh Ngih Bok lor ma khân păng tât.

²² N'ha kơ rmlak tahan Êphraim hăn du luh, tĭng ndŭl mpôl. Y-Êlisama, kon bu klâu Y-Amihut, kôranh ma phung tahan Êphraim.

²³ Y-Gamaliel, kon bu klâu Y-Pêdasur, kôranh ma phung tahan ndŭl mpôl Manasê.

²⁴ Y-Abidan, kon bu klâu Y-Gidêôni, kôranh ma phung tahan ndŭl mpôl Benjamin.

²⁵ Nglĕ dŭt, n'ha kơ rmlak tahan Dan hăn du luh, tĭng ăp ndŭl mpôl, nâm khân păng jêng phung gak pakơi lĕ rngôch rmlak tahan êng. Y-Ahiêser, kon bu klâu Y-Amisadai, kôranh ma phung tahan Dan.

²⁶ Y-Pagiel, kon bu klâu Y-Ôkran, kôranh ma phung tahan ndŭl mpôl Aser.

²⁷ Y-Ahira, kon bu klâu Y-Ênan, kôranh ma phung tahan ndŭl mpôl Naptali.

²⁸ Nĕ jêng mbor phung ƀon lan Israel hăn du luh tĭng ăp ndŭl mpôl khân păng nơm.

²⁹ Y-Môis lah ma Y-Hôbap, kon bu klâu Y-Rêuel, du huê Madian jêng nâu ur Y-Môis pô aơ: “Hên hăn tât ta n'gor Brah Yêhôva lah jêh: ‘Gâp mra ăn n'gor nây ma khân may.’ Dăn may hăn ndrel ma hên, hên mra ƀư ueh ma may, yorlah Brah Yêhôva ton jêh ăn nau ueh uĭn ma phung Israel.”

³⁰ Y-Hôbap ơh nau: “Gâp mâu mra hăn ôh, ƀiălah gâp mra plơ̆ sĭt n'gor gâp jêng n'gor phung che gâp.”

³¹ Y-Môis lah tay: “Gâp vơl dăn ma may lơi ta chalơi hên ôh, yorlah may gĭt ta ntŭk tâm bri rdah hên dơi ndâk ngih bok jêh ri may mra jêng nâm bu măt ma hên.

³² Tơlah may hăn ndrel ma hên, hên mra pă ma may lĕ rngôch nau ueh Brah Yêhôva mra ăn ma hên.”

³³ Pôri phung ƀon lan Israel hăn ntơm bơh yôk Brah Yêhôva tâm pe nar hăn trong. Hip Nau Tâm Rnglăp Brah Yêhôva hăn panăp phung ƀon lan tâm pe nar hăn trong gay joi du ntŭk rlu ma khân păng.

³⁴ Nôk nar tơlah phung ƀon lan Israel trơn rmlak tahan hăn du luh, ndâr tŭk Brah Yêhôva gŭ ta klơ khân păng.

³⁵ Tơlah Hip Nau Tâm Rnglăp trơn, Y-Môis lah pô aơ: “Ơ Brah Yêhôva, dăn dâk hăn gay ƀư ma phung rlăng May chah rai pru pra, Jêh ri ƀư ma phung tâm rmot ma May nchuăt du panăp May!”

³⁶ Tơlah Hip Nau Tâm Rnglăp gŭ rlu, Y-Môis lah pô aơ: “Ơ Brah Yêhôva, plơ̆ sĭt hom Ndrel âk ngăn phung ƀon lan Israel!”