Nau Kơp Bunuyh 1 - Nau Brah Ndu Ngơi 2023

Ndrăp lor hăn du luh ( 1:1 – 10:10 ) Kơp rnoh bunuyh

¹ Nar năng nguay khay bar năm tal bar, jêh phung ƀon lan Israel luh bơh Êjipt, Brah Yêhôva ngơi ma Y-Môis ta Ngih Bok Nau Tâm Rƀŭn tâm bri rdah Sinai pô aơ:

² “Kơp hom rnoh bunuyh tâm phung Israel tâm rƀŭn tĭng ăp noi deh jêh ri ndŭl mpôl khân păng, nchih amoh lĕ rngôch nơm bu klâu

³ ntơm bơh bar jât năm leo klơ, jêng lĕ rngôch bunuyh tâm phung Israel mra dơi hăn tâm lơh. May jêh ri Y-Arôn mra kơp khân păng tĭng nâm ăp phung.

⁴ Tâm ăp mpôl bunuyh ăn geh du huê bunuyh mra kâp kơl khân may; nơm nây jêng bunuyh ƀư kôranh ndŭl mpôl.

⁵ Aơ jêng amoh săk phung mra kâp kơl khân may: Ndŭl mpôl Ruben geh Y-Êlisur, kon bu klâu Y-Sêdur;

⁶ ndŭl mpôl Simêôn geh Y-Sêlumiel, kon bu klâu Y-Surisadai;

⁷ ndŭl mpôl Yuđa geh Y-Nahsôn, kon bu klâu Y-Aminadap;

⁸ ndŭl mpôl Isakar geh Y-Nêthanel, kon bu klâu Y-Suar;

⁹ ndŭl mpôl Sabulôn geh Y-Êliap, kon bu klâu Y-Hêlôn;

¹⁰ kon sau Y-Yôsep, jêng ndŭl mpôl Êphraim, geh Y-Êlisama kon bu klâu Y-Amihut; ndŭl mpôl Manasê geh Y-Gamaliel, kon bu klâu Y-Pêdasur;

¹¹ ndŭl mpôl Benjamin geh Y-Abidan, kon bu klâu Y-Gidêôni;

¹² ndŭl mpôl Dan geh Y-Ahiêser, kon bu klâu Y-Amisadai;

¹³ ndŭl mpôl Aser geh Y-Pagiel, kon bu klâu Y-Ôkran;

¹⁴ ndŭl mpôl Gat geh Y-Êliasap, kon bu klâu Y-Dêuel;

¹⁵ ndŭl mpôl Naptali Y-Ahira, kon bu klâu Y-Ênan.”

¹⁶ Nĕ jêng phung bunuyh dơi kuăl bơh phung tâm rƀŭn, jêng phung kôranh chiă uănh ma noi deh tă bơh chô yau mbơ̆ khân păng jêh ri jêng phung kôranh chiă uănh ma mpôl Israel.

¹⁷ Y-Môis ndrel Y-Arôn dơn phung bunuyh hŏ săch,

¹⁸ jêh ri kuăl rgum phung tâm rƀŭn tât ta nar năng nguay khay bar. Khân păng nchih amoh băl mpôl ăp bunuyh tĭng ăp ndŭl mpôl jêh ri rnăk vâl ntơm bơh bar jât năm leo klơ.

¹⁹ Pônây Y-Môis kơp rnoh bunuyh ta bri rdah Sinai, tĭng nâm nau Brah Yêhôva hŏ ntĭnh ntăm jêh:

²⁰ Kon sau Ruben jêng kon bu klâu bôk rah ma Israel, tĭng nâm noi deh khân păng, dơi nchih amoh ăp bunuyh tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm ndŭl mpôl Ruben mra dơi hăn nau tâm lơh,

²¹ kơp dơi puăn rmưn prao rbăn prăm rhiăng nuyh.

²² Kon sau Simêôn, tĭng nâm mpôl khân păng, dơi nchih săk tĭng mpôl bunuyh jêh ri rnăk vâl, lĕ bu klâu ntơm bar jât năm leo klơ, lĕ rngôch noi deh Simêôn mra dơi hăn nau tâm lơh,

²³ dơi kơp prăm rmưn sĭn rbăn pe rhiăng nuyh.

²⁴ Kon sau Gat, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Gat mra dơi hăn nau tâm lơh,

²⁵ dơi kơp puăn rmưn prăm rbăn prao rhiăng prăm jât nuyh.

²⁶ Kon sau Yuđa, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Yuđa mra dơi hăn nau tâm lơh,

²⁷ dơi kơp pơh rmưn puăn rbăn prao rhiăng nuyh.

²⁸ Kon sau Isakar, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Isakar mra dơi hăn nau tâm lơh,

²⁹ dơi kơp prăm rmưn puăn rbăn puăn rhiăng nuyh.

³⁰ Kon sau Sabulôn, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Sabulôn mra dơi hăn nau tâm lơh,

³¹ dơi kơp prăm rmưn pơh rbăn puăn rhiăng nuyh.

³² Kon sau Yôsep, rnha jêng kon sau Êphraim, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm ndŭl mpôl Êphraim mra dơi hăn nau tâm lơh,

³³ dơi kơp puăn rmưn prăm rhiăng nuyh.

³⁴ Kon sau Manasê, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Manasê mra dơi hăn nau tâm lơh,

³⁵ dơi kơp pe rmưn bar rbăn bar rhiăng nuyh.

³⁶ Kon sau Benjamin, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Benjamin mra dơi hăn nau tâm lơh,

³⁷ dơi kơp pe rmưn prăm rbăn puăn rhiăng nuyh.

³⁸ Kon sau Dan, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Dan mra dơi hăn nau tâm lơh,

³⁹ dơi kơp prao rmưn bar rbăn pơh rhiăng nuyh.

⁴⁰ Kon sau Aser, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh noi deh Aser mra dơi hăn nau tâm lơh,

⁴¹ dơi kơp puăn rmưn du rbăn prăm rhiăng nuyh.

⁴² Kon sau Naptali, tĭng nâm noi deh khân păng, dơi nchih amoh săk tĭng ăp ndŭl mpôl jêh ri rnăk vâl, jêng lĕ rngôch bu klâu ntơm bơh bar jât năm leo klơ tâm noi deh Naptali mra dơi hăn nau tâm lơh,

⁴³ dơi kơp prăm rmưn pe rbăn puăn rhiăng nuyh.

⁴⁴ Nĕ jêng phung, Y-Môis, Y-Arôn jêh ri jât ma bar kôranh chiă uănh Israel hŏ kơp jêh; ăp kôranh ndŭl mpôl kơp ma ndŭl mpôl khân păng nơm.

⁴⁵ Kơt nây, lĕ rngôch bunuyh ƀon lan Israel hŏ kơp jêh tĭng nâm noi deh, ntơm bơh bar jât năm leo klơ, jêng lĕ rngôch bunuyh Israel dơi hăn nau tâm lơh,

⁴⁶ rnoh kơp jêng prao rsen pe rbăn prăm rhiăng prăm jât nuyh.

Noi deh Lêvi

⁴⁷ Ƀiălah phung Lêvi tĭng noi deh chô yau khân păng nơm mâu dơi kơp ôh nsum ma phung ndŭl mpôl êng.

⁴⁸ Yor Brah Yêhôva geh lah ma Y-Môis pô aơ:

⁴⁹ “May lơi kơp ndŭl mpôl Lêvi jêh ri mâu đŏng kơp ôh rnoh bunuyh nsum đah phung ƀon lan Israel,

⁵⁰ ƀiălah ntĭm hom ma phung Lêvi chiă uănh Ngih Bok Nau Tâm Rnglăp, lĕ rngôch ndơ dŏng jêh ri lĕ rngôch ndơ dŏng prăp tâm Ngih Bok nây. Khân păng mra trơn Ngih Bok jêh ri lĕ rngôch ndơ ta nây, tâm ban đŏng mât uănh jêh ri ndâk ngih bok gŭ jŭm Ngih Bok.

⁵¹ Ăp tơ̆ ngih bok trơn ntŭk pôri phung Lêvi mra rơih păng jêh ri tơlah tât ntŭk ndâk tay Ngih Bok, khân păng mra ndâk păng. Tơlah bunuyh êng hăn dăch mra nkhĭt.

⁵² Phung ƀon lan Israel mra ndâk ngih bok khân păng tĭng nâm ăp phung; ăp nơm gŭ tâm ngih bok êng khân păng nơm jêh ri ndâk hom tâm dâng n'ha kơ khân păng nơm.

⁵³ Ƀiălah phung Lêvi mra ndâk ngih bok gŭ jŭm Ngih Bok Nau Tâm Rnglăp gay nau ji nuih mâu nkhŭt ta phung ƀon lan Israel tâm rƀŭn. Phung Lêvi mra djôt kan chiă uănh Ngih Bok Nau Tâm Rnglăp.

⁵⁴ Phung ƀon lan Israel ƀư di tĭng lĕ nau Brah Yêhôva hŏ ntĭnh ntăm jêh Y-Môis.”