Nau Hôr 9 - Nau Brah Ndu Ngơi 2023

Nau jă kuăl bơh blau mĭn jêh ri nau rluk mâl

¹ Nau blau mĭn ndâk jêh ngih păng nơm, Trah jêh ăn păng nơm pơh mlâm meh,

² Ƀư puăch mpô mpa, tâm pot ndrănh krăk ƀâu, Ndrăp sưng sông sa lĕ rơm ndrăp jêh.

³ Jêh ri đă lĕ oh mon bu ur luh hăn. Tă bơh ntŭk prêh tâm ƀon, nau blau mĭn dat kuăl:

⁴ “Mbu nơm rluk mâl, lăp hom ta aơ!” Bi ma phung mâu geh nau gĭt vât, nau blau mĭn lah:

⁵ “Văch hom sa piăng let gâp Jêh ri nhêt ndrănh gâp hŏ tâm pot jêh.

⁶ Chalơi hom nau rluk mra dơi rêh, Jêh ri chuat hom tĭng trong nau gĭt rbăng.”

Lĕ nau ngơi hôr vay dŏng

⁷ Mbu nơm nkra nti bunuyh mưch mra sŏk dơn nau bêk prêng ma păng nơm; Jêh ri mbu nơm nduyh bunuyh janh ƀai mra sŏk dơn nau ƀơ̆ ƀơch.

⁸ Lơi ta nduyh ôh ma bunuyh mưch klach lah păng tâm rmot ma may; Nduyh hom ma bunuyh blau mĭn păng mra rŏng ma may.

⁹ Ăn hom nau ƀŭn lap ma bunuyh blau mĭn, păng mra blau mĭn lơn; Sâm nti hom ma bunuyh sŏng srăng, păng mra ntop nau gĭt blau lơn.

¹⁰ Nau klach yơk ma Brah Yêhôva, nây jêng tơm ma nau blau mĭn, Nau gĭt năl Nơm Kloh Ueh, nây jêng nau gĭt rbăng.

¹¹ Yor ma gâp, lĕ nar may rêh mra dơi ntop âk lơn, Jêh ri mra ntop năm may gŭ rêh.

¹² Tơlah may blau mĭn jêng khlay ma may nơm, Tơlah may dăng mưch jêng du huê may nơm mra dơn mbăk play mhĭk.

Nau jă kuăl jêh ri nau ton brŭt ndrăng

¹³ Phung bu ur nkhơng brŭt rluk vay rsĭk dăng ngơi, Rluk mâl, mâu gĭt vât du ntil ndơ.

¹⁴ Păng gŭ panăp bôk mpông ngih păng nơm, Klơ rnơl gŭ ntŭk prêh tâm ƀon,

¹⁵ Gay jă mphâk phung prot dâng lơ, Jêng bunuyh hăn sŏng tâm trong păng,

¹⁶ Jêh ri lah: “Mbu moh rluk, lăp hom ta aơ!” Păng lah đŏng ma nơm mâu geh nau gĭt mĭn pô aơ:

¹⁷ “Dak nhêt ntŭng jêng njŭng ngăn, Sa ndơ djah kah ngăn!”

¹⁸ Khân păng mâu gĭt ôh nây jêng ntŭk phung khĭt, Bu năch păng jă trŭnh ntŭk jru da dê jêng ƀon phung khĭt.