Nau Hôr 8 - Nau Brah Ndu Ngơi 2023

Nau kuăl ma nau blau mĭn

¹ Mâu di hĕ nau blau mĭn hŏ kuăl, Mâu di hĕ nau gĭt rbăng hŏ ngơi nteh?

² Nau blau mĭn dâk ta klơ lĕ yôk prêh, Ta meng trong ƀon, ntŭk lĕ rdjŭm trong.

³ Êp meng mpông pêr, ta ntŭk lăp ƀon; Kêng mpông, nau blau mĭn kuăl ktang:

⁴ “Hơi kon bunuyh, gâp kuăl khân may, Jêh ri bâr gâp kuăl rle mpeh ma phung kon bunuyh!

⁵ Phung bunuyh rluk nti hom ăn gĭt nau blau; Phung rluk nti ăn gĭt nau blau mĭn.

⁶ Iăt hom, yorlah gâp mra ngơi lĕ nau khlay, Mbung gâp mra ngơi nau di.

⁷ Yorlah bâr mbung gâp mra mbơh nau ngăn, Bi mbung gâp tâm rmot ma nau ngơi mƀruh.

⁸ Lĕ nau gâp ngơi jêng sŏng da dê, Mâu geh ôh ntil nau mƀruh kue kuăt.

⁹ Lĕ rngôch rah vah da dê ăn ma mbu nơm gĭt rbăng, Jêh ri sŏng ăn ma mbu nơm dơi joi nau blau mĭn âk.

¹⁰ Dơn hom nau gâp ntĭm nti ueh lơn ma dơn prăk, Sŏk dơn nau blau mĭn rlau lơn ma mah ngăn;

¹¹ Yorlah nau blau mĭn geh rnoh khlay lơn ma lŭ khlay, Lĕ rngôch ndơ khlay mâu dơi ban rnoh khlay păng.

¹² Gâp jêng nau blau mĭn gŭ ndrel ma nau blau lơn, Gâp dơi joi nau blau lơn jêh ri nau blau njrăng.

¹³ Nau klach yơk ma Brah Yêhôva jêng nau tâm rmot đah nau mhĭk; Gâp tâm rmot đah nau sưr n'hao êng nơm, Trong nau mhĭk jêh ri mbung ngơi kue.

¹⁴ Nau blau nchră jêh ri nau gĭt rbăng tâm gâp da dê, Gâp jêng nau gĭt mĭn; nau ktang tă tâm gâp.

¹⁵ Tă bơh gâp, lĕ phung hađăch chiă uănh, Jêh ri lĕ phung kôranh chiă uănh ntrŭnh nau vay sŏng.

¹⁶ Tă bơh gâp, lĕ phung kôranh chiă uănh jêh ri phung ndrŏng gĭt nau blau chiă uănh, Lĕ rngôch chiă uănh ma nau sŏng srăng da dê.

¹⁷ Gâp rŏng ma phung rŏng ma gâp, Phung tĭng joi gâp ma lĕ nuih n'hâm mra mâp gâp.

¹⁸ Nau ndrŏng jêh ri nau lư n'găr, Geh jêng jŏ jong jêh ri nau sŏng srăng gŭ ndrel gâp da dê.

¹⁹ Kao play gâp jêng ueh lơn mah, rlau lơn ma mah kloh, Kao play gâp khlay rlau lơn prăk chrêk.

²⁰ Gâp chuat tĭng tâm trong nau sŏng srăng, Gŭ tâm trong di,

²¹ Gay ăn drăp ndơ ma phung rŏng ma gâp, Jêh ri ƀư bêng lĕ jay drăp khlay khân păng.

Nau kan bơh blau mĭn tâm nau rhăk njêng

²² Brah Yêhôva hŏ njêng gâp ntơm saơm lor lơn tĭng nau blau Păng, Ntơm bơh rnôk kăl e, lor ma lĕ rngôch nau Păng ndâk.

²³ Bu hŏ njêng Gâp ntơm bơh kăl e dŭt ngăn, Ntơm saơm, êlor geh rplay neh.

²⁴ Rnôk ê hŏ geh brŏng jru, ê hŏ geh tu dak hoch. Pôri gâp hŏ geh jêh.

²⁵ Êlor lĕ yôk dơi njêng, Jêh ri geh lĕ dor prêh, hŏ geh gâp;

²⁶ Êlor ma Brah Yêhôva rhăk njêng neh ntu, Lĕ mir jêh ri ndruyh neh lor lơn ta rplay neh.

²⁷ Dôl Păng rhăk njêng lĕ ndâr trôk Jêh ri dơm đôr ta klơ brŏng jru, gâp hŏ gŭ ta nây.

²⁸ Lah Păng ƀư nâp ndâr tŭk prêh ta klơ, Ƀư ăn lĕ tu dak tâm dâng brŏng jru hoch,

²⁹ Tâm nal n'har ăn dak mƀŭt, Gay ma dak mâu ler ôh bơh n'har Păng nal jêh, Jêh ri nôk Păng njêng mbon rplay neh,

³⁰ Pôri gâp gŭ kêng Păng nâm bu du huê nơm mon. Ăp nar gâp jêng nau maak ma Păng, Jêh ri hâk răm ƀaƀơ tanăp măt Păng.

³¹ Gâp răm maak ndrel ma neh ntu geh bunuyh gŭ n'hanh Păng Jêh ri hâk maak ndrel ma phung kon bunuyh.

³² Pôri aƀaơ, hơi phung kon, iăt hom gâp! Ueh maak ngăn ma phung djôt prăp tĭng ndô̆ trong gâp.

³³ Iăt hom nau ntĭm nti jêh ri rêh blau mĭn; Lơi ta chalơi păng ôh.

³⁴ Ueh maak ngăn bunuyh iăt nau gâp, Rngeh ăp nar ta mpông pêr gâp Jêh ri gŭ kâp kêng meng mpông lăp ngih gâp.

³⁵ Yorlah mbu nơm dơi joi gâp dơi saơ nau rêh, Jêh ri dơi dơn nau yô̆ Brah Yêhôva.

³⁶ Ƀiălah mbu nơm ngơi djơh ma gâp jêng ƀư mhĭk ma huêng păng nơm; Lĕ rngôch phung tâm rmot ma gâp jêng rŏng ma nau khĭt.”