Nau Hôr 7 - Nau Brah Ndu Ngơi 2023

Nau ndơm tâm nau văng tĭr njŭn leo nau khĭt

¹ Hơi kon gâp, djôt prăp hom nau gâp ngơi Jêh ri sŏk prăp tâm nuih n'hâm may nau vay ntăm bơh gâp.

² Tông hom nau vay ntăm bơh gâp pôri may mra dơi rêh, Jêh ri prăp hom nau gâp ntĭm nti nâm bu găr măt may.

³ Kât nâp hom păng ta nglau ti may, Nchih nsêr păng tâm trôm nuih n'hâm may.

⁴ Lah hom ma nau blau mĭn: “Păng jêng oh nur gâp,” Jêh ri bu ntơ nau gĭt rbăng jêng phung mpôl băl may;

⁵ Gay ma păng mât may bơh bu ur văng tĭr, Bơh bu ur bu năch ngơi nau njŭng kah.

⁶ Yorlah ta mpông bloh ngih gâp, Gâp n'gơr uănh ta mpông bloh,

⁷ Jêh ri saơ tâm phung rluk, Tâm nklang phung mom ndăm, Geh du huê bu klâu hôm mom mâu geh ôh nau blau mĭn.

⁸ Păng hăn rgăn ta njônh trong dăch kêng ngih bu ur văng tĭr; Jêh nây hăn let ma ngih bu ur nây,

⁹ Dôl ngo nsrŭp măng lĕ nhâp nar, Mâu lah klong măng dôl ngo klĕng.

¹⁰ Ri, bu ur luh vơt nơm nây, Nsoh nkrơ̆ nâm bu du huê bu ur văng tĭr, nuih n'hâm bêng ma nau plăch rlăm.

¹¹ Nây jêng bu ur vay ngơi drơu drơu, mâu blau bêk, Bar đah jâng păng mâu đăp ôh gŭ tâm ngih;

¹² Lah gŭ tâm trong sâng, geh tơ̆ ntŭk tăch drăp, Gŭ kâp moch bu tâm ăp njônh trong.

¹³ Bu ur nây kuăn rdâng nơm nây jêh ri chŭm păng, Ma nau mâu bêk, lah đah nơm nây pô aơ:

¹⁴ “Gâp hŏ nhhơr jêh ndơ nhhơr ƀư brah ma nau đăp mpăn, Nar aơ gâp mplơ̆ lôch jêh lĕ nau ton.

¹⁵ Yor ri gâp luh ta aơ vơt chuă may, Gâp hŏ tĭng joi may jêh ri dơi mâp jêh.

¹⁶ Gâp hŏ lăk jêh ta klơ sưng bê̆ch Bok phôi Êjipt âk ntil dak sut,

¹⁷ Gâp hŏ djrah jêh ntŭk bê̆ch Đah dak si tăng, alôê jêh ri ma sinamôn.

¹⁸ Văch hom, he mra ƀư mpay ma nau rŏng ăn tât ang ôi; Ăn he maak răm ndrel ma he nơm đah nau rŏng.

¹⁹ Yorlah sai gâp mâu gŭ ôh tâm ngih; Păng hŏ hăn rŏ trong ngai ngăn,

²⁰ Djôt leo dŭng prăk ndrel ma păng, Tât nôk bŏng khay mơ păng plơ̆ sĭt ta ngih.”

²¹ Bu ur nây dŏng lĕ nau ngơi ueh ndơm nơm nây, Ƀư păng tŭp nuih n'hâm yor ma nau ngơi njĭp.

²² Păng gơnh ro tĭng bu ur nây, Nâm bu du mlâm ndrôk leo tât ntŭk bu gŭch, Nâm bu du huê bunuyh rluk bu nkông hăn dơn nau tâm rmal;

²³ Kŏ tât du chiông hăr sŏr ta klơm nơm nây, Nâm bu sĭm gơnh tŭp tâm nhuăl, Ƀiălah păng mâu năn gĭt ôh nau nây jêng dăk nhŭp kât nau rêh păng nơm!

²⁴ Pôri aƀaơ hơi phung kon gâp, rkêng tôr iăt hom, Klâng rvê hom tât ma nau gâp nti lah.

²⁵ Nuih n'hâm may lơi rle ôh mpeh trong bu ur nây; Lơi ta hăn vĭ nhhơt tâm trong păng.

²⁶ Yorlah bu ur nây hŏ ƀư âk bunuyh tŭp tâm nau ndơm, Jêh ri âk ngăn bunuyh yor ma păng bu geh nau rai lôch.

²⁷ Ngih bu ur nây jêng trong lăp tâm ƀon phung khĭt, Njŭr leo tâm jrô nau khĭt.