Nau Hôr 6 - Nau Brah Ndu Ngơi 2023

Nau dơn râng ma phung chiau meng

¹ Hơi kon gâp, tơlah may ƀư nau dơn râng an ma nơm chiau meng may, Tơlah may yơr ti ƀư nau ton đah phung bu năch,

² Pôri bu lĕ kât jêh may yorlah nau ngơi bơh mbung may hŏ ton, Jêh ri lĕ khan jêh yorlah nau ngơi tă bơh bâr may hŏ ngơi jêh.

³ Pôri hơi kon gâp, yorlah may hŏ tŭp jêh tâm ti phung chiau meng, Ƀư hom nau aơ gay ma tâm rklaih êng may nơm: Hăn hom, ma nau ntrŭnh săk jêh ri bonh ma phung chiau meng may!

⁴ Lơi ăn bar đah măt may bê̆ch, Mâu lah rsâng măt may mƀrêh;

⁵ Tâm rklaih hom may nơm nâm bu yơng klaih bơh ti bunuyh nchron, Nâm bu sĭm klaih bơh ti bunuyh ndơm dăk.

Nau nti tă bơh phung ngonh

⁶ Hơi nơm ƀlao, văch uănh hom phung ngonh, Mêt uănh mâm nau păng gŭ rêh gay nti nau blau.

⁷ Nđâp lah păng mâu geh ôh kôranh, Nơm pah kan toyh mâu lah nơm chiă uănh,

⁸ Păng gĭt đŏng prăp nkrem mpa sa ăn păng nơm tâm yan ta vai, Jêh ri nchuăn bun lơi ndơ sa tâm yan rek ba.

⁹ Hơi bunuyh ƀlao, ndah nâm jŏ may hôm gŭ bê̆ch mro? Ndah nâm jŏ may kah rngăl?

¹⁰ Bê̆ch du ƀât lât, mƀrêh măt du ƀât lât, Ut ti lâng bê̆ch du ƀât lât,

¹¹ Pônây nau ndĭt trơi mra tât ma may nâm bu du huê bunuyh ntŭng, Nau ndĭt trơi mra rduh lơh may nâm bu du huê bunuyh ntŭng geh ndơ tâm lơh.

Mrô nal ma bunuyh mƀruh nchơt

¹² Bunuyh dơm dam, bunuyh mhĭk ƀai; Jêng bunuyh gŭ sa dơm mâu pah kan, mbung ngơi mƀruh ndơm,

¹³ Păng ntơ̆ măt, nkêh jâng, Jêh ri sŏk nglau ti gay vơch tâm nal;

¹⁴ Nuih n'hâm bêng nau kue, păng tâm nchră ma nau mhĭk, Ăp tơ̆ joi nau tâm djrel ƀaƀơ.

¹⁵ Yor nây, nau rêh ni mra tât ma păng ma nau ndal; Tâm ƀât lât, păng mra rai roh ro mâu hôm dơi bah ôh.

Lĕ nau Brah Yêhôva tâm rmot

¹⁶ Geh prao ntil Yêhôva ji nuih Jêh ri pơh ntil păng tâm rmot:

¹⁷ Măt sưr rlau, mpiăt nchơt, Ti ƀư pling mham bunuyh mâu geh nau tih,

¹⁸ Nuih n'hâm ŭch tâm nchră ma nau mhĭk, Jâng gơnh nchuăt ran ƀư nau janh,

¹⁹ Nơm nkoch mƀruh jêh ri ngơi nau nchơt, Nơm joi nau tâm djrel ndrăng oh nâu.

Nau mbơh ma nau văng tĭr

²⁰ Hơi kon gâp, djôt prăp hom nau mbơ̆ may ntăm, Lơi ta chalơi ôh lĕ nau mê̆ may nti.

²¹ Nchih prăp hom păng ƀaƀơ tâm nuih n'hâm may Jêh ri văn păng ta trô ko may.

²² Lah may chuat hăn, păng mra njŭn leo may; Dôl may bê̆ch, păng mra mât njrăng may; Jêh ri tơlah may kah rngăl, păng mra nkoch bri đah may.

²³ Yorlah nau vay ntăm jêng ŭnh kađen, nau vay jêng nau ang, Jêh ri nau nduyh lah ntĭm nti jêng trong hăn ma nau rêh,

²⁴ Gay mât may klaih bơh bu ur djơh mhĭk Jêh ri klaih bơh nau njŭng bu ur văng tĭr.

²⁵ Nuih n'hâm may lơi ta kơnh nau ueh păng, Lơi ăn ôh rsâng măt păng ndơm may.

²⁶ Yorlah bu dơi nkhôm ma bu ur văng tĭr rnoh knŏng du glo piăng let dơm, Bi ma bu ur lâm sai ƀư roh nđâp ma huêng dŭt khlay.

²⁷ Geh lĕ nơm dơi ăn ŭnh tâm săk, Kho ao păng mâu dơi ôh ŭnh sa?

²⁸ Geh lĕ nơm chuat hăn ta klơ ŭnh rnga Ƀiălah mâu ôh dô jâng păng?

²⁹ Nơm gŭ ndrel ma ur phung chiau meng păng tâm ban pônây lĕ; Ma mbu nơm pah ta păng mâu mra klaih ôh bơh nau tâm rmal.

³⁰ Bu mâu mưch ôh ma du huê nơm ntŭng Lah păng ntŭng gay hơm ndŭl nau ji ngot.

³¹ Nđâp lah pônây, tơlah bu ban, păng mra ntrok pơh tơ̆ âk lơn; Jêh ri păng mra ăn lĕ ndơ păng geh tâm vâl păng.

³² Ƀiălah bunuyh tâm lâm jêng nơm roh nau mĭn; Mbu nơm ƀư pônây, ƀư rai êng huêng păng nơm.

³³ Bunuyh nây mra geh nau sôt jêh ri djôt nau bêk prêng, Nau bêk prêng nây mâu dơi jut ôh.

³⁴ Yorlah sai mra ntôn ji nuih hâu ngăn, Nôk plơng har mâu hôm geh djê̆ ro nau yô̆.

³⁵ Păng mâu mra dơn ôh lĕ drăp khlay bu jan dôih, Nđâp lah may ăn âk ma păng kŏ mâu dơn đŏng.