Nau Hôr 5 - Nau Brah Ndu Ngơi 2023

Nkah der bu ur văng tĭr

¹ Hơi kon gâp, gơih mĭn hom tât nau blau mĭn gâp, Rkêng tôr iăt hom nau gĭt rbăng gâp;

² Gay ma may dơi mât nau blau njrăng, Jêh ri mbung may djôt prăp nau blau mĭn âk.

³ Yorlah mbung bu ur văng tĭr luh njŭng dak sŭt, Mbung mpiăt păng mbĭr lơn ma dak ngi;

⁴ Ƀiălah nglĕ dŭt, păng tăng nâm bu tơm si tăng, Hơr nâm bu mpiăt đao bar đah măt.

⁵ Bar đah jâng nơm văng tĭr hăn lăp nau khĭt; Lĕ nhuat păng trŭnh rlet ƀon phung khĭt.

⁶ Păng mâu ŭch hăn tât ma trong nau rêh; Lĕ trong păng nhhơt jêh ƀiălah păng mâu gĭt lĕ.

⁷ Pôri aƀaơ, hơi phung kon, iăt hom nau gâp; Lơi ta chalơi lĕ nau bơh mbung gâp.

⁸ Mât hom trong may bah ngai ma păng, Lơi hăn dăch ôh trong lăp ngih păng;

⁹ Klach lah may ăn nau kloh ueh may ma phung êng Jêh ri jao năm khay gŭ rêh may ma nơm mhĭk djơh.

¹⁰ Klach lah phung bu năch mra dơi hơm ngăn ma drăp ndơ may, Jêh ri n'hâm suan may mra lăp ngih phung bu năch.

¹¹ Tât nglĕ dŭt, may mra nter, Lah săk jăn may hŏ djoh jêh.

¹² May mra kuăl huy: “Mâm gâp hŏ rmot ma nau ntĭm nti, Jêh ri nuih n'hâm gâp mưch ma nau nduyh!

¹³ Mâm gâp mâu tông bâr nai nti, Jêh ri mâu lĕ ŭch rkêng tôr iăt nau bunuyh ntĭm nti gâp!

¹⁴ Gâp dơn ma lĕ rngôch ntil nau mhĭk Ta nklang phung ƀon lan jêh ri phung tâm rƀŭn.”

¹⁵ Nhêt hom dak bơh ntu may dơ prăp, Jêh ri dak hoch bơh ndrâm ntu may.

¹⁶ Di lĕ gay ăn tu dak may hoch ler luh padih, Jêh ri lĕ n'hor dak may hoch ntŭk trong sâng?

¹⁷ Prăp hom khân păng knŏng êng ma may nơm, Lơi dĭng tâm pă ndrel ma phung bu năch.

¹⁸ Ăn tu dak may geh nau ueh uĭn; Hâk răm hom ndrel ur may nơm nđăp nôk druh ndăm;

¹⁹ Nâm bu jun me tâm rŏng jêh ri yơng ueh reh ngăn, Ntang ntơh păng ƀư ăn may mpay ƀaƀơ, Jêh ri nau rŏng păng ƀư may hâk răm mro mrăng.

²⁰ Hơi kon gâp, moh may rŏng ma bu ur văng tĭr, Jêh ri ut rơ u phung bu ur bu năch?

²¹ Yorlah lĕ trong kon bunuyh hăn gŭ panăp măt Brah Yêhôva, Păng rli lâng lĕ rngôch trong hăn khân păng.

²² Phung mhĭk mra tŭp tâm nau tih păng nơm, Jêh ri rse nau tih chăp păng nơm.

²³ Păng mra khĭt yor mâu iăt nau ntĭm nti, Jêh ri nhhơt trong yor nau brŭt ndrăng ir.