Nau Hôr 4 - Nau Brah Ndu Ngơi 2023

Nau mbơ̆ ntĭm nti

¹ Hơi phung kon, iăt hom nau mbơ̆ ntĭm nti, Rkêng tôr iăt hom gay ma khân may geh nau blau mĭn;

² Yorlah gâp ăn ma khân may du nau nti ueh ngăn; Lơi ta chalơi ôh lĕ nau gâp nti.

³ Lah hôm kon se jê̆, gâp jêng kon bu klâu ma mbơ̆ gâp, Knŏng du huê kon dul dĭng mê̆ gâp rŏng hâu ngăn.

⁴ Mbơ̆ gâp geh nti pô aơ: “Nuih n'hâm may kah gĭt hom lĕ nau gâp Djôt prăp hom nau vay ntăm bơh gâp, ri mơ may mra dơi rêh.

⁵ Joi hom nau blau mĭn jêh ri nau gĭt rbăng, Lơi ta chuêl jêh ri lơi chalơi ôh lĕ nau bơh bâr mbung gâp;

⁶ Lơi ta chalơi nau blau mĭn pôri nau blau mĭn mra mât mray may; Rŏng hom ma nau blau mĭn pôri nau blau mĭn mra king n'gang may.

⁷ Nau blau mĭn jêng du ntil nau khlay rlau lơn, joi hom nau blau mĭn; Dŏng hom ma lĕ ndơ may geh gay rvăt nau gĭt rbăng.

⁸ Yơk hom ma nau blau mĭn pôri nau blau mĭn mra n'hao may, Tâm krêp hom đah nau blau mĭn pôri nau blau mĭn djôt leo nau bu yơk tât ma may.

⁹ Nau blau mĭn mra ndô ta klơ bôk may du rvang kao ueh reh, Ăn ma may du mlâm đon hađăch nau chrêk rmah.”

Nau ntĭm prăp trong sŏng nau di

¹⁰ Hơi kon gâp, iăt hom jêh ri sŏk dơn lĕ nau gâp ngơi, Pôri năm khay may gŭ rêh mra dơi ntop âk lơn.

¹¹ Gâp hŏ nti jêh may tâm trong blau mĭn, Njŭn leo may trong sŏng nau di.

¹² Lah may hăn, nhuat jâng may mâu mra bâp khan ôh, Nôk may nchuăt, mâu lĕ chêh prah.

¹³ Kuăn hom ăn nâp nau ntĭm nti, lơi ta mƀơk ôh, Ăn djôt prăp, yorlah păng jêng nau rêh may.

¹⁴ Lơi ta lăp tâm trong phung ƀai, Lơi ta hăn tĭng trong phung mhĭk.

¹⁵ Der ngai hom trong nây, lơi hăn rgăn ta păng; Dâk hăn hom, let panăp.

¹⁶ Yorlah khân păng mâu nhêp măt tơlah ê hŏ ƀư nau mhĭk; Mâu đăp bê̆ch tơlah ê hŏ ƀư tŭp ma du huê bunuyh.

¹⁷ Khân păng sa piăng let ma nau djơh mhĭk Jêh ri nhêt ndrănh ma nau janh ƀai.

¹⁸ Ƀiălah trong phung sŏng srăng ang nâm bu nar nchrat ang, Nau ang lơ hâu kŏ tât nar nklang bôk.

¹⁹ Bi ma trong phung djơh mhĭk bêng ma nau ngo klĕng; Khân păng mâu gĭt ôh păng nơm chêh prah moh yor!

²⁰ Hơi kon gâp, gơih mĭn hom bơh nau gâp nti, Rkêng tôr iăt moh nau gâp lah.

²¹ Lĕ nau ngơi nây lơi ta ăn du ngai ôh đah măt may, Djôt prăp hom tâm nuih n'hâm may mro mrăng.

²² Yorlah nau nây jêng nau rêh ma mbu nơm dơi joi păng, Jêng nau dăng ktang ma lĕ săk jăn khân păng.

²³ Mât njrăng hom nuih n'hâm may ăn ueh rlau lơn, Yorlah lĕ tu nau rêh luh tă bơh păng.

²⁴ May chalơi hom mbung mpiăt tih mhĭk, Jêh ri der ngai bâr mbung mƀruh nchơt.

²⁵ Ăn bar đah măt may uănh hom mpeh panăp, Rsâng măt may uănh sŏng rlet panăp may.

²⁶ Rli hom ăn lâng trong jâng may, Gay lĕ trong may dơi jêng nâp ktang.

²⁷ Lơi teng ôh pa ma mâu lah pa chiau; Ăn jâng may der hom bơh ntŭk nau mhĭk.