Nau Hôr 31 - Nau Brah Ndu Ngơi 2023

Nau ntĭm nti mê̆ hađăch Y-Lêmuêl

¹ Nau hađăch Y-Lêmuêl, lĕ nau mê̆ păng nti ma păng.

² Hơi kon gâp! Hơi kon bơh ndŭl proch gâp hŏ ntreo! Hơi kon bơh nau gâp mbơh sơm dăn! Moh nau gâp mra ngơi đah may?

³ Lơi ăn mbung n'hâm suan may ma bu ur, Lơi tĭng trong ƀư ăn hađăch rai yot.

⁴ Hơi Y-Lêmuêl, mâu ueh ôh ăn ma phung hađăch, Mâu ueh ôh ăn hađăch nhêt ndrănh, Mâu lah phung kôranh ôp: “Mbah ntŭk ndrănh?”

⁵ Klach lah nôk nhêt nhŭl, khân păng chuêl nau vay ntăm, Ƀiălah hăn rlơ̆ đah nau di ăn phung rêh ni.

⁶ Djôt leo hom ndrănh ăn ma phung dăch khĭt, Jêh ri ndrănh ăn phung geh nuih n'hâm rngot ngăn;

⁷ Ăn khăn păng nhêt hom jêh ri chuêl lĕ nau o ach khân păng, Mâu hôm kah gĭt ôh tât ma nau rêh ni khân păng.

⁸ Hă hom trôm mbung sâm ngơi an ma bunuyh mlo, Jêh ri koh dŏng ăn phung bu chalơi.

⁹ Hă hom trôm mbung may, phat dôih ma nau sŏng, Mât an nau di ma phung o ach rêh ni.

Rnê ma bu ur gĭt mleh

¹⁰ Mbu nơm mra dơi joi du huê ur gĭt mleh? Nau khlay păng rlau lơn ma lŭ rsang.

¹¹ Nuih n'hâm sai păng rnơm nsing ma păng, Sai păng mâu mra pưt kao play ôh.

¹² Du bông nau rêh păng ƀư ăn sai păng dơi geh jêng, Mâu ôh ƀư nau mhĭk.

¹³ Păng rvê joi rsau biăp jêh ri brai mhay, Jêh ri răm maak pah kan ma ti.

¹⁴ Păng nâm bu phung kumpăn tăch ndơ, Tă bơh n'gor ngai rdeng sĭt ndơ sông sa.

¹⁵ Păng kah rngăl bê̆ch dôl trôk hôm e ngo, Ăn ndơ sông sa ma bunuyh tâm ngih vâl, Jêh ri jao nau kan ăn ma phung oh mon bu ur păng.

¹⁶ Păng treng uănh ma du lôk mir jêh ri rvăt mir nây; Geh jêng tă bơh kan ti păng nơm, păng njêng du đang krăk ƀâu.

¹⁷ Păng rêt rse bŭt gơih pah kan Jêh ri ƀư ăn bar nting tur dăng.

¹⁸ Păng saơ nau pah kan păng dơi geh jêng; Bri măng ŭnh kađen păng mâu ôh nhhât.

¹⁹ Păng pah ti ta khâng ruy brai, Jêh ri lĕ nglau ti păng vư̆ng tanh bok mro.

²⁰ Păng pơk huy ti ăn ndơ kơl phung o ach, Nto ti vơt phung rêh ni.

²¹ Păng mâu klach ôh bunuyh tâm ngih vâl ji kăt nôk nđik pler, Yorlah lĕ rngôch khân păng nsoh ao rsau biăp chăng rhưch.

²² Păng ƀư êng lĕ phôi nah; Kho ao păng ƀư đah bok mhay rhên dak sut chăng.

²³ Ntŭk mpông ƀon, sai păng dơi lư n'găr Dơi gŭ ndrel ma kôranh bu ranh tâm n'gor.

²⁴ Păng ƀư kho ao đah bok mhay djôt tăch; Ăn rse vân bŭt ma nơm tăch drăp.

²⁵ Păng geh nau dăng n'hâm suan jêh ri nau bu yơk; Gơm rum lah mĭn tât nar kăndơ̆.

²⁶ Trôm mbung păng mbơh ngơi nau blau mĭn, Mpiăt păng ntĭm nti nau rŏng bu.

²⁷ Păng mât uănh lĕ rngôch nau kan tâm ngih vâl, Mâu geh ôh nau ƀlao.

²⁸ Phung kon păng dâk mbơh ăn ma păng dơi geh nau ueh lăng; Sai păng tâm ban lĕ tâm rnê ma păng pô aơ:

²⁹ “Geh âk bu ur pah kan ma nau gơih ngăn, Ƀiălah păng rlau lơn ma lĕ rngôch.”

³⁰ Ray nkrơ̆ jêng nau ndơm, nau ueh jêng dơm dam; Ƀiălah mbu moh bu ur klach yơk ma Brah Yêhôva mra geh nau tâm rnê.

³¹ Ăn hom ma păng kao play bơh ti păng, Jêh ri gay lĕ kan păng pah tâm rnê ma păng ta mpông ƀon.