Nau Hôr 30 - Nau Brah Ndu Ngơi 2023

Nau hôr jêh ri nau mbơh sơm Y-Agur

¹ Nau Y-Agur kon bu klâu Y-Yakê, nau nơm nây ngơi ma Y-Ithiêl, jêh ri ma Y-Ukal.

² Nanê̆, gâp rluk lơn ma bunuyh êng, Gâp mâu geh ôh nau gĭt rbăng kon bunuyh.

³ Gâp mâu hŏ geh nti nau blau mĭn, Jêh ri mâu hŏ nti nau blau mĭn bơh Nơm Kloh Ueh.

⁴ Mbu nơm hŏ hao klơ trôk jêh jŭr tay? Mbu nơm hŏ rgum sial tâm mpang ti? Mbu nơm hŏ nklâm dak tâm ao? Mbu nơm ndâk n'har neh ntu? Mâm amoh Nơm nây, Jêh ri amoh săk kon bu klâu Nơm nây? Tơlah may gĭt, nkoch hom!

⁵ Lĕ nau Brah Ndu Ngơi dơi geh nau rlong da dê; Păng jêng khêl ma bunuyh rnơm nsing tâm Păng.

⁶ Lơi ntop ôh tâm nau ngơi Păng, Klach lah Păng nduyh may, Jêh ri bu kơp may jêng bunuyh ngơi mƀruh!

⁷ Gâp dăn ma Kôranh Brah bar ntil nau; Dăn Păng lơi ta dun ôh êlor gâp khĭt:

⁸ Dăn ăn nau mhĭk jêh ri nau mƀruh du ngai đah gâp; Lơi ăn gâp o ach mâu lah kuăng ndrŏng, Dăn ăn gâp ndơ sông sa tŏng ma dŏng;

⁹ Klach lah dôl rmeh ler, gâp dun Kôranh Brah, Ngơi pô aơ: “Brah Yêhôva jêng mbu nơm?” Mâu lah dôl gâp o ach mra hăn ntŭng, Jêh ri ƀư ƀơ̆ amoh Brah Ndu ma gâp đŏng.

¹⁰ Lơi ta ngơi nchơt ma oh mon ndrel kôranh păng, Klach lah păng rak rtăp jêh ri may mra geh nau tih đŏng.

¹¹ Geh ntil bunuyh rak rtăp mbơ̆ păng nơm Mâu lĕ ăn nau ueh uĭn ma mê̆ păng nơm.

¹² Geh phung bunuyh mĭn păng nơm kloh rsang, Ƀiălah mâu hŏ rao kloh nau ƀơ̆ ƀơch păng.

¹³ Geh phung bunuyh geh măt nau sưr, Jêh ri n'gô măt n'hao êng mâm ƀư!

¹⁴ Geh phung bunuyh geh sêk hơr nâm bu đao, Găm hơr nâm bu pêh. Gay rvăn roh lĕ bunuyh ndĭt trơi bơh neh, Jêh ri lĕ bunuyh rêh ni bơh kon bunuyh.

¹⁵ Glu geh bar hê kon bu ur, Khân păng nter: “Ăn hom, ăn hom!” Geh pe ntil ndơ mâu blau mpay ôh, Jêh ri puăn ntil ndơ mâu ŭch lah: “Tŏng jêh!”

¹⁶ Nây jêng: Ƀon Phung Khĭt, ndŭl băt bă kon, Neh kroh dak, jêh ri ŭnh, Mâu prot lah: “Tŏng jêh!”

¹⁷ Măt mưch ma mbơ̆, Mưch ma nau tông bâr mê̆, Mra geh phung nđak tâm rlŭng chôk rloch, Jêh ri klang kon sa păng.

¹⁸ Geh pe ntil khlay ngăn ma gâp, Jêh ri puăn ntil nau gâp mâu dơi gĭt rbăng ôh:

¹⁹ Trong klang mpăr klơ trôk, Trong bêh hung ta klơ lŭ, Trong Kumpăn nchuăt ta nklang dak mƀŭt, Jêh ri trong nau rŏng ta nklang bu klâu bu ur.

²⁰ Aơ jêng nau rêh bu ur văng tĭr, Jêh sa, jut mbung, Jêh ri lah: “Gâp mâu mâp geh ƀư nau tih ôh!”

²¹ Geh pe ntil ƀư ăn rplay neh mpât n'gơ, Jêh ri puăn ntil nau păng ƀư mâu dơi dơn ôh:

²² Ntơ dĭk dơi hao jêng hađăch, Bunuyh rluk dơi hơm ngăn ma ndơ sông sa,

²³ Bu ur bu mưch dơi sŏk sai, Jêh ri du huê oh mon bu ur ntrok kôranh bu ur păng.

²⁴ Geh puăn mpô mpa jê̆ ta neh ntu, Ƀiălah nkhơng blau mĭn ngăn:

²⁵ Ngonh nđâp lah jêng mpa mâu geh n'hâm suan, Ƀiălah gĭt rvê prăp nkrem ndơ sông sa tâm yan ta vai;

²⁶ Rpai bri nđâp lah jêng mpa mâu geh n'hâm suan, Ƀiălah gĭt ƀư ntŭk gŭ tâm rkâp lŭ;

²⁷ Krah ndrach nđâp lah mâu geh hađăch, Ƀiălah mpăr n'hoch tĭng mbŭch;

²⁸ Bŭl ka bu nto ti dơi nhŭp, Ƀiălah gŭ tâm ngih hađăch.

²⁹ Geh pe ntil mpa blau hăn ueh ngăn, Geh puăn mpa nhuat chuat rnam ngăn:

³⁰ Yau mŭr dăng lơn tâm lĕ rngôch mpô mpa, Mâu rŭch plơ̆ ôh đah dĭng lĕ mpa êng.

³¹ Iăr nkuăng ntoch trô ko, be nkuăng; Jêh ri hađăch ndrel ma tahan.

³² Tơlah may geh rluk ƀiălah n'hao may nơm, Mâu lah tơlah may geh nchră ntil nau mhĭk, Sŏk hom ti rdêp trôm mbung.

³³ Mpet dak toh ƀư jêng dak toh kŏt, Jêh ri tŭr trôm muh ƀư ma hoch mham; Tâm ban pônây đŏng, nsônh nau ji nuih jêng nau tâm djrel.