Nau Hôr 3 - Nau Brah Ndu Ngơi 2023

Nau ntĭm ƀư tĭng nau blau mĭn

¹ Hơi kon gâp, lơi ta chuêl ôh nau gâp ntĭm nti, Nuih n'hâm may djôt prăp hom nau vay ntăm bơh gâp;

² Yorlah păng mra ăn may dơi ntop âk năm gŭ rêh, Jêh ri dơi geh nau geh jêng lư n'găr.

³ Lơi ta ăn nau ueh jêh ri nau nanê̆ ngăn chalơi may; Văn hom păng ta trô ko may, Nchih păng tâm trôm nuih n'hâm may.

⁴ Pôri tanăp măt Brah Ndu jêh ri kon bunuyh, May mra dơi joi nau ueh uĭn jêh ri nau blau mĭn ngăn.

⁵ Rnơm nsing hom ma Brah Yêhôva ma lĕ nuih n'hâm, Lơi nsing ôh tâm nau gĭt mĭn may nơm.

⁶ Kah gĭt hom ma Păng tâm lĕ trong may hăn, Păng yơh mra ƀư lâng tâm lĕ trong may hăn.

⁷ Lơi ta kơp nau blau mĭn tĭng măt may nơm ôh; Klach yơk hom ma Brah Yêhôva jêh ri du hom bơh nau mhĭk.

⁸ Pônây klŏ may mra dơi bah Jêh ri nting may dơi dăng.

⁹ Sŏk hom drăp ndơ jêh ri kao play yan dak bôk Gay tâm rnê Brah Yêhôva;

¹⁰ Ri mơ, jay prăp may mra bêng ba ƀlê, Jêh ri ntu păt ndrănh may mra bêng ler ndrănh mhe.

¹¹ Hơi kon gâp, lơi tâm rmot ôh nau Brah Yêhôva nduyh nkra, Lơi ta rngot nuih n'hâm dôl păng nduyh nkra.

¹² Yorlah Brah Yêhôva nkra ma mbu nơm Păng rŏng, Nâm bu du huê mbơ̆ ma đah kon bu klâu păng rŏng.

Drăp ndơ ngăn

¹³ Ueh maak ngăn ma bunuyh dơi joi nau blau mĭn Jêh ri dơi dơn nau gĭt rbăng!

¹⁴ Yorlah ueh lơn geh nau blau mĭn ma đah geh prăk rêl, Kao play păng khlay lơn ma mah.

¹⁵ Nau blau mĭn khlay lơn ma lŭ chrêk, Mâu geh ôh ndơ khlay may ŭch dơi tâm rđĭl ban đah păng.

¹⁶ Ti ma nau blau mĭn djôt kuăn nau rêh jong, Bi ti chiau geh nau ndrŏng kuăng jêh ri lư n'găr.

¹⁷ Lĕ trong bơh nau blau mĭn jêng trong răm maak, Lĕ rngôch trong păng jêng trong đăp mpăn da dê.

¹⁸ Nau blau mĭn jêng tơm si nau rêh ăn ma mbu nơm djôt kuăn păng; Mbu nơm djôt prăp păng dơi geh nau ueh lăng da dê.

Nau blau mĭn Brah Ndu tâm nau rhăk njêng

¹⁹ Brah Yêhôva dŏng nau blau mĭn n'gân mbon rplay neh; Yor tă nau gĭt rbăng njêng lĕ ndâr trôk.

²⁰ Ma nau gĭt mĭn Păng, lĕ brŏng jru pơk n'hôl dak, Jêh ri tŭk rchuăl ăn truh dak ngom.

Nau đăp mpăn ngăn

²¹ Hơi kon gâp, djôt prăp hom nau blau mĭn ngăn jêh ri nau blau njrăng, Lơi ăn păng du ngai đah măt may,

²² Păng mra jêng nau rêh ma huêng may, Jêng ndơ nkrơ̆ ăn trô ko may.

²³ May mra chuat hăn dơi nâp tâm trong may, Jêh ri jâng may mâu chêh prah.

²⁴ Lah may lâng bê̆ch, mâu geh ôh ntil ndơ klach; Ngăn yơh, may mra bê̆ch jêh ri dơi hăk bê̆ch đăp mpăn.

²⁵ Lơi klach ôh nau krit toyh tât ndal, Mâu lĕ klach nau ƀư rai ma phung mhĭk;

²⁶ Yorlah Brah Yêhôva jêng ntŭk may rnơm nsing, Păng mra mât jâng may klaih bơh dăk sân.

²⁷ Lơi ta dun ôh ƀư nau ueh ăn ma mbu nơm khư dơi dơn nau nây, Lah ti may dơi ƀư nau nây.

²⁸ Tơlah may geh ndơ nơm chiau meng ŭch ma ndơ nây, Lơi lah ôh: “Hăn hom jêh ri plơ̆ tay, ôi taơ gâp mra ăn ma may.”

²⁹ Lơi dĭng tâm nchră ƀư mhĭk ma bunuyh chiau meng may ôh, Yorlah bunuyh dôl gŭ rêh ueh mpăn kêng may.

³⁰ Lơi dĭng tâm pĭt ôh đah bu, Tơlah bunuyh nây mâu geh ôh nau ƀư mhĭk ma may.

³¹ Lơi keh nach ôh đah nơm djơh janh, Mâu đŏng tĭng ndô̆ trong păng;

³² Yorlah Brah Yêhôva tâm rmot ma bunuyh kue, Ƀiălah Păng njêng mĭt jiăng đah bunuyh sŏng.

³³ Nau Brah Yêhôva rak rtăp gŭ tâm ngih phung ƀai, Ƀiălah Păng ăn nau ueh uĭn ma ngih nơm sŏng srăng.

³⁴ Kôranh Brah mưch ma phung vay mưch, Ƀiălah Păng ăn nau yô̆ ma phung dêh rhêt.

³⁵ Bunuyh blau mĭn mra dơi dơn nau chrêk rmah, Bi phung rluk n'hao êng păng nơm mra geh nau bêk prêng.