Nau Hôr 28 - Nau Brah Ndu Ngơi 2023

¹ Bunuyh djơh nchuăt du nđâp lah mâu geh bunuyh hăn tĭng păng, Ƀiălah bunuyh sŏng srăng dăng ktang nâm bu yau mŭr.

² Lah ntŭk n'gor uh ah Pôri geh âk kôranh; Ƀiălah rnơm du huê bunuyh gĭt vât jêh ri gĭt rbăng, Bri dak mra nâp jŏ jong.

³ Bunuyh o ach tŭn jot phung rêh ni Nâm bu dak mih ntâng pih kloh lĕ yan kăch roih.

⁴ Phung chalơi nau vay tâm rnê ma phung djơh, Bi ma phung mât prăp nau vay tâm rdâng đah khân păng.

⁵ Phung ntŭp păng nơm tâm nau mhĭk, mâu gĭt rbăng nau sŏng srăng, Ƀiălah mbu nơm tĭng joi Brah Yêhôva gĭt rbăng lĕ rngôch nau.

⁶ Ueh lơn jêng bunuyh o ach rêh tâm nau sŏng Rlau lơn jêng nơm ndrŏng ƀiălah tĭng trong kue kuăt.

⁷ Mbu nơm djôt prăp nau vay jêng du huê kon blau mĭn, Bi ma nơm ƀư băl đah phung blă blơ ƀư bêk mbơ̆ păng nơm.

⁸ Mbu nơm ăn bu manh sa kao jâk ƀiălah drăp ndơ păng gay n'hao ntop âk, Jêng prăp bun ndơ nây ăn ma bunuyh geh nuih n'hâm yô̆ nđach ma phung o ach.

⁹ Mbu nơm nsêt tôr mâu ŭch iăt ôh nau vay, Nau mbơh sơm bơh bunuyh nây khư ma nau tâm rmot.

¹⁰ Mbu nơm ƀư ăn bunuyh sŏng vĭ tâm trong tih mhĭk, Păng nơm nây ro mra tŭp tâm ntu păng hŏ kuyh; Ƀiălah bunuyh mâu geh nau bu dơi nduyh ôh ma dơn nau ueh lăng.

¹¹ Bunuyh ndrŏng kơp êng păng nơm jêng blau mĭn, Ƀiălah bunuyh o ach geh nau gĭt rbăng mra gĭt rah vah bunuyh nây.

¹² Lah bunuyh sŏng srăng lĕ dơi jêh, pôri dơi geh nau chrêk rmah toyh, Nôk phung djơh mhĭk hao jêh, lĕ rngôch bunuyh du krap da dê.

¹³ Mbu nơm pôn mo nau tih păng nơm mâu mra geh ôh nau chăt jêng, Ƀiălah mbu nơm mbơh păng jêh ri chalơi păng mra dơi geh nau yô̆ nđach.

¹⁴ Bunuyh klach yơk ma Kôranh Brah dơi geh nau ueh uĭn ƀaƀơ; Bi ma nơm dăng nuih n'hâm mra tŭp tâm nau rêh ni.

¹⁵ Phung djơh chiă uănh phung ndĭt trơi Tâm ban yau mŭr rđuh ngrông, mâu lah kau hăn tĭng kăp mpa sa.

¹⁶ Phung kôranh chiă uănh mâu geh nau gĭt vât knŏng rvê nau tŭn jot, Ƀiălah bunuyh tâm rmot sa ndơ bu mâu tâm di mra dơi rêh jŏ năm.

¹⁷ Phung khan rnon mham ma du huê bunuyh Mra nchuăt du ăn tât khĭt, Lơi ăn bu kơl păng!

¹⁸ Mbu nơm gŭ ngao ma nau sŏng mra dơi geh nau tâm rklaih, Bi ma nơm hăn tĭng trong kue mra tŭp ƀât lât.

¹⁹ Mbu nơm kai neh mir mra bêng ndơ sông sa, Ƀiălah mbu nơm hăn tĭng bunuyh ƀlao mra bêng ma nau ndĭt trơi.

²⁰ Bunuyh răp jăp mra geh âk nau ueh lăng, Ƀiălah phung ndal ir ŭch ƀư ndrŏng mâu klaih ôh nau tâm rmal.

²¹ Gŭ nding jêng nau mâu ueh ôh; Yorlah du glo ƀănh dơi ƀư nau tih đŏng.

²² Bunuyh geh măt ndơm kơnh ndal ir nchuăt tĭng drăp ndơ, Mâu gĭt ôh nau pưt mâu tŏng mra tât kêng păng.

²³ Mbu nơm nduyh du huê bunuyh, pakơi taơ mra geh nau yô̆ Rlau lơn jêng phung dŏng mpiăt ngơi njĭp.

²⁴ Mbu nơm ntŭng ndơ mbơ̆ mâu lah mê̆ păng nơm, Jêh ri ngơi pô aơ: “Mâu di jêng tih ôh,” Nơm nây jêng băl đah nơm ƀư rai.

²⁵ Phung kơnh ndrăp ndơ ƀư nau tâm djrel, Ƀiălah bunuyh rnơm nsing ma Brah Yêhôva mra dơi geh nau geh jêng.

²⁶ Mbu nơm rnơm nsing ma nuih n'hâm păng nơm jêng nơm rluk; Bi ma nơm gŭ ngao ma nau blau mĭn mra dơi geh nau tâm rklaih.

²⁷ Mbu nơm ăn ma bunuyh o ach mâu mra pưt ôh, Bi ma nơm nhêp măt mâu gĭt yô̆ bu mra geh âk nau rak rtăp.

²⁸ Lah phung ƀai hao chiă uănh, lĕ rngôch bunuyh du krap da dê, Ƀiălah nôk khân păng roh rai, phung sŏng srăng bĭk rơ̆ tay.