Nau Hôr 27 - Nau Brah Ndu Ngơi 2023

¹ Lơi ntưih ôh ma nar ôi taơ, Yorlah may mâu gĭt ôh nar ôi taơ mra moh nau tât.

² Ăn bu êng rnê ma may, Trôm mbung may lơi ƀư ôh nâm bu pônây; Ăn bunuyh padih rnê may, Mbung may lơi ôh rnê êng may nơm.

³ Lŭ jêng jâk, choih jâk tâm ban đŏng, Ƀiălah nau ji nuih phung rluk hôm jâk lơn ma bar ntil nây.

⁴ Nau ji nuih jêng nau janh djơh ngăn, jêh ri nau ji nuih nâm bu dak bŭk, Ƀiălah mbu moh dơi dơn tanăp nau mâu nach?

⁵ Du nau nduyh tra năp măt Jêng rlau lơn đah nau rŏng pôn ndâp.

⁶ Mĭt jiăng ƀư sôt rmanh yor nau rŏng nanê̆ ngăn, Jêng rlau lơn đah nơm rlăng chŭm ma nau ndơm.

⁷ Phung hơm jêh jot lơi dak sŭt tâm dâng jâng khân păng nơm, Ƀiălah moh ndơ tăng ăt jêng njŭng đah bunuyh ji ngot ji hir.

⁸ Phung nsong ngai đah ntŭk gŭ păng nơm, Tâm ban ma sĭm mpăr aơ ri tă bơh rsuăn păng.

⁹ Dak ƀâu kah jêh ri ndơ ƀâu kah ƀư răm maak nuih n'hâm bunuyh, Nau nkah tă tâm nuih n'hâm mĭt jiăng ăt rdơ̆ rbăn nâm bu pônây đŏng.

¹⁰ Lơi ta chalơi mĭt jiăng may mâu lah mĭt jiăng mbơ̆ may; Tâm nar uh ah, lơi hăn tât ta ngih oh nâu may, Yor oh nâu gŭ ngai Mâu ban ôh đah oh nâu chiau meng gŭ dăch.

¹¹ Hơi kon gâp, blau mĭn hom jêh ri ƀư maak nuih n'hâm gâp, Gay gâp dơi tâm plơng đah nơm ƀư prêng gâp.

¹² Bunuyh blau ngăn saơ lor nau mhĭk jêh ri du krap; Bi phung rluk hăn rduh ran tât jêh ri dơn nau mhĭk.

¹³ Sŏk hom ao păng yorlah păng hŏ dơn râng ăn bunuyh mâu bên, Mât hom ndơ păng nchăm yor păng dơn râng ăn bu ur bu năch.

¹⁴ Mbu nơm kah rngăl ơm ngơi nteh ăn nau ueh uĭn ma mĭt jiăng, Nau ngơi ăn nau ueh uĭn nây mra kơp jêng nau rak rtăp.

¹⁵ Ngih truh mro tâm nar mih ntâng Jêh ri du huê bu ur vay mơng tâm djrel, lĕ bar jêng tâm ban da dê;

¹⁶ Mbu nơm ŭch buay king bu ur nây Tâm ban buay sial, jêh ri nâm bu ti ma djôt dak ngi ôlive.

¹⁷ Tâm ban ma loih tôl mplanh ndrăng loih, Tâm ban lĕ, kon bunuyh tôl muh măt mĭt jiăng păng.

¹⁸ Mbu nơm mât mray tơm rvi mra sa play păng, Jêh ri mbu nơm pah kan ma kôranh păng mra geh nau yơk.

¹⁹ Muh măt chrâng tâm dak kơt nây lĕ, Nuih n'hâm bunuyh ndrăng bunuyh nâm bu pônây lĕ.

²⁰ Găr măt kon bunuyh mâu blau dĭl, Nâm bu ƀon phung khĭt jêh ri brŏng jru mâu blau bêng.

²¹ Glah rlong prăk, năk rlong mah, Bi ma nau tâm rnê rlong kon bunuyh.

²² Nđâp lah may sŏk rnai juh bunuyh rluk tâm mpăl juh nsum ndrel phe, Pôri nau rluk kŏ mâu chalơi lĕ bơh păng.

²³ Ăn gĭt năl nanê̆ ngăn nau rêh phung biăp may, Jêh ri mât mray ueh lĕ mpô mpa rong.

²⁴ Yorlah nau ndrŏng mâu gŭ mro mrăng, Jêh ri đon hađăch kŏ mâu lĕ hôm tât n'ho ro.

²⁵ Gơ̆ kro roh hêt, gơ̆ nse chăt luh hon tay, Bu pĕ biăp ta klơ yôk.

²⁶ Rsau biăp mra ăn ao kho ma may, Be nkuăng jêng rnoh rvăt mir.

²⁷ Dak toh be geh tŏng gay ƀư ndơ sông sa ăn may, Ăn ma bunuyh tâm ngih may Jêh ri gay mât lĕ phung oh mon bu ur may.