Nau Hôr 26 - Nau Brah Ndu Ngơi 2023

¹ Nâm bu pler tâm yan ta vai, mâu lah mih tâm yan rek, Nau bu yơk mâu tâm di ôh ăn ma bunuyh rluk,

² Nâm bu sĭm srai mpăr, nâm bu rlêng mpăr her, Nau rak rtăp mâu geh kô̆ tâm ban lĕ, păng mâu mra tât ôh.

³ Mâng rvĕ ma seh, gang thao prăp ma seh bri, Bi mâng rpăt prăp ma ndŭr kơi phung rluk.

⁴ Lơi plơ̆ lah nau bunuyh rluk nâm nau rluk păng, Klach lah may nơm jêng tâm ban ma păng đŏng.

⁵ Plơ̆ sĭt lah hom ma bunuyh rluk tâm di đah nau rluk păng, Klach lah păng mĭn pô aơ păng nơm blau mĭn.

⁶ Mbu nơm nsing ma bunuyh rluk ndơ̆ nau nkoch ma bu, Tâm ban ma kăl jâng păng nơm jêh ri nhêt nau rai yot.

⁷ Nâm bu jâng bunuyh kuet tơng glơt mâu blau dŏng, Nau ngơi hôr tâm trôm mbung phung rluk tâm ban pônây lĕ.

⁸ Yơk ma phung rluk Nâm bu chalơi găr lŭ khlay ta mbŭch lŭ.

⁹ Nau ngơi hôr tâm trôm mbung phung rluk Nâm bu du mlâm lok tôt tâm ti bunuyh nhŭl ndrănh.

¹⁰ Mbu nơm jă bunuyh rluk kan nkhôm jêh ri bu năch hăn trong, Tâm ban ma tahan pănh na ƀư rmanh lĕ rngôch bunuyh.

¹¹ Bunuyh rluk plơ̆ ƀư tay nau rluk păng nơm Nâm bu so hŏ hok jêh nây plơ̆ ler tay.

¹² May saơ lĕ mbu moh bunuyh blau mĭn kơp êng tĭng măt păng nơm đŏng? Bunuyh rluk hôm e geh nau kâp gân rlau ma păng.

¹³ Bunuyh ƀlao lah: “Geh yau mŭr ta trong! Geh du mlâm yau mŭr tâm trong ƀon!”

¹⁴ Bunuyh ƀlao rlĭ rlang ta klơ sưng bê̆ch păng Nâm bu mpông rvah tâm lăk lê,

¹⁵ Bunuyh ƀlao nto ti păng nơm tâm ngan, Ji hŏt ngăn gay nsiăm păng tât trôm mbung.

¹⁶ Bunuyh ƀlao mĭn êng păng nơm blau mĭn lơn Rlau pơh bunuyh dơi plơ̆ lah ma nau di.

¹⁷ Nơm ji nuih ma nau tâm djrel mâu tât ôh ma păng Tâm ban ma bunuyh kuăn tôr so nchuăt nsong.

¹⁸ Bunuyh brŭt su ma ŭnh, Pănh hăr, ƀư nau khĭt,

¹⁹ Tâm ban phung ndơm bunuyh chiau meng păng nơm, Jêh ri lah: “Gâp pâl dơm ya!”

²⁰ Ŭnh nhhât yor mâu tŏng long; Mâu geh bunuyh dăng nkoch bri, nau tâm djrel kŏ nsrŭng đŏng.

²¹ Su sa ônh ăn sa ônh hit rnga, sĭnh long gay ŭnh sa hit, Bunuyh mơng tâm djrel ƀư nau tâm rlăch tâm ban pônây.

²² Nau nơm nkoch bri nsak nâm bu ndơ sa kah, Lăp tât ta proch khŭng.

²³ Bâr mbung duh nđơr ƀiălah nuih n'hâm mhĭk Tâm ban ma yăng neh mbĭr prăk padih.

²⁴ Bunuyh tâm rmot n'hi ngơi nau ueh padih mbung, Ƀiălah tâm trôm nuih n'hâm nchră nau ndơm;

²⁵ Lah păng ngơi kah njŭng lơi ta rnơm, Yorlah tâm nuih n'hâm păng geh pơh ntil nau tâm rmot.

²⁶ Nđâp lah nau tâm rmot dơi nkŭm kŭp tâm dâng nau ndơm, Nau djơh mhĭk păng mra mpơl tâm nklang phung tâm rƀŭn.

²⁷ Mbu nơm kuyh ntu mra tŭp tâm ntu nây; Mbu nơm rlă lŭ, lŭ plơ̆ tŭn tay.

²⁸ Mpiăt mƀruh tâm rmot ma phung păng ƀư mhĭk, Jêh ri trôm mbung ngơi njĭp n'hi ƀư nau rai yot.