Nau Hôr 24 - Nau Brah Ndu Ngơi 2023

¹ Lơi keh nach ôh đah phung mhĭk, Mâu lĕ ŭch gŭ ndrel ma khân păng.

² Yorlah nuih n'hâm khân păng knŏng mĭn ma nau janh ƀai, Jêh ri mbung khân păng ngơi nau ƀư mhĭk.

³ Ma nau blau mĭn, mpông ngih dơi ndâk njêng Jêh ri dơi nâp yor nau gĭt rbăng.

⁴ Bơh nau blau mĭn, ăp jrô prăp bêng ndơ da dê Drăp ndơ khlay jêh ri ueh ngăn.

⁵ Bunuyh blau geh nau dăng n'hâm suan, Jêh ri bunuyh geh nau gĭt mĭn hao lơ hô âk lơn.

⁶ Ăn may rnơm ma blau mĭn gay tâm lơh, Tă geh âk bunuyh tâm kơl nchră mra geh nau dơi.

⁷ Nau blau mĭn prêh ngai ngăn ma bunuyh rluk; Ntŭk mpông ƀon, păng mâu nanh hă mbung ôh.

⁸ Mbu nơm mĭn plăch ŭch ƀư nau mhĭk Bu mra kơp păng jêng bunuyh mƀruh.

⁹ Nau mĭn rluk jêng nau tih; Bunuyh mưch bu mra tâm rmot.

¹⁰ Tơlah may rdja nuih tâm nar rêh ni, Pôri n'hâm suan may lĕ huơi ngăn jêh!

¹¹ Tâm rklaih hom phung bu njŭn tât nau khĭt; Jêh ri rklaih phung nhuat hăn ndĭt ndiu tât ntŭk bu nkhĭt.

¹² Tơlah may lah: “Ri, hên mâu gĭt ôh nau aơ,” Pôri Nơm njing nuih n'hâm may mâu di hĕ sek uănh lĕ nau nây? Jêh ri Nơm mât mray huêng may mâm dĭng mâu gĭt? Păng mra mplơ̆ ma ăp nơm tĭng nâm moh kan khân păng ƀư?

¹³ Hơi kon gâp, sa hom dak sŭt yorlah păng jêng kah ngăn; Dak tă bơh mpơng sŭt njŭng ngăn ma trôm mbung may.

¹⁴ Ăn gĭt hom pô aơ nau blau mĭn đah huêng may tâm ban pônây đŏng; Tơlah may dơi joi nau blau mĭn nanê̆ mra geh du nar kăndơ̆. Jêh ri nau may kâp gân mâu mra jêng roh hêng ôh.

¹⁵ Hơi phung ƀai, lơi ta grem kâp ntŭk gŭ phung sŏng srăng; Lơi ƀư rai ôh ntŭk păng gŭ rlu.

¹⁶ Yorlah bunuyh sŏng srăng nđâp lah păng cha lôt pơh tơ̆ hôm dơi dâk đŏng, Bi ma phung djơh mhĭk mra ngâm tâm nau mhĭk.

¹⁷ Lơi ta răm rhơn ôh lah phung rlăng may prah cha lôt, Dôl păng lĕ bu n'glưh, nuih n'hâm may lơi ta hâk răm,

¹⁸ Klach lah Brah Yêhôva mâu maak ôh ma nau nây, Jêh ri nau ji nuih Păng klaih bơh nơm nây đŏng.

¹⁹ Lơi hao ji nuih ôh yor phung ƀư mhĭk, Lơi keh nach ma phung janh ƀai;

²⁰ Yorlah phung ƀư ƀai mâu ôh geh nar kăndơ̆, Jêh ri ŭnh kađen phung janh ƀai mra nhhât.

²¹ Hơi kon gâp, klach yơk hom ma Brah Yêhôva jêh ri yơk ma hađăch; Lơi tâm rnglăp ôh đah phung tâm rdâng,

²² Yorlah nau mhĭk tât ndal tâm khân păng, Jêh ri mbu nơm dơi gĭt nau rêh ni mra tât tă bar ding?

Du nau hôr êng êng đŏng

²³ Nau aơ tâm ban lĕ jêng nau phung blau mĭn ngơi: Tâm nau phat dôih, Gŭ nding jêng nau mâu ueh ôh.

²⁴ Mbu nơm lah ma phung ƀai pô aơ: “May jêng bunuyh sŏng srăng,” Phung ƀon lan mra rak rtăp, jêh ri lĕ bri dak mra tâm rmot ma păng.

²⁵ Ƀiălah bu nơm nduyh phung ƀai mra geh nau maak nuih n'hâm, Jêh ri nau ueh lăng mra nkhŭt klơ khân păng.

²⁶ Mbu nơm plơ̆ lah ma nau di, Nâm bu chŭm ta toh yoi.

²⁷ Đăp mpăn hom nau kan padih may, Jêh ri ndrăp lor lĕ nau kan tâm mir may; Jêh nây ndâk hom ngih may.

²⁸ Lơi ta phong nchroh ma nơm chiau meng may, Mâu lĕ sŏk bâr mbung may ma nau ndơm mƀruh.

²⁹ Lơi lah ôh: “Gâp mra ƀư ma păng nâm bu păng hŏ ƀư ma gâp; Gâp mra har plơng ma ăp nơm tĭng nâm nau păng hŏ ƀư.”

Mrô ơm nal ma phung ƀlao

³⁰ Gâp geh hăn rgăn jêh mir bunuyh ƀlao, Jêh ri dăch đang krăk ƀâu bơh phung kƀah nau gĭt vât;

³¹ Ri, tơm lok hon âk ngăn, Gơ̆ nkâm bêng lam neh, Bi mpêr đah lŭ rlâm tŭp jêng rngot njăp.

³² Gâp treng uănh jêh ri gay nuih n'hâm mĭn rvê, Gâp hŏ saơ jêh ri dơn nau ntĭm nti aơ:

³³ Bê̆ch du ƀât lât, mƀrêh măt du ƀât lât, Ut ti lâng bê̆ch du ƀât lât,

³⁴ Pônây nau ndĭt trơi mra tât ma may nâm bu bunuyh ntŭng, Jêh ri nau o ach tât ma may nâm bu du huê bunuyh geh ndơ tâm lơh.