Nau Hôr 23 - Nau Brah Ndu Ngơi 2023

¹ Lah may gŭ sông sa ndrel du huê kôranh chiă uănh, Njrăng hom ma bunuyh gŭ tanăp măt may;

² Tơlah may ơm kơnh sa, Dơm hom du mlâm pêh ta trô ko may.

³ Lơi ta kơnh ôh ndơ sông sa kah bơh păng, Yorlah nây jêng ndơ sông sa bu ndơm.

⁴ Lơi ƀư jêr ôh may nơm gay ƀư ndrŏng; Lơi hôm nau nsing ma nau gĭt mĭn may nơm.

⁵ Dôl may treng uănh tâm nau ndrŏng kuăng, di lĕ păng hŏ mpăr roh jêh? Nanê̆ păng chăt nting năr nâm bu klang ƀŭng, Jêh ri rpuh nting năr mpăr leo klơ trôk prêh.

⁶ Lơi sa ôh ndơ sông sa bơh bunuyh geh măt uănh ma nau djơh mhĭk, Mâu lĕ kơnh ma ndơ sông sa kah păng;

⁷ Yorlah ntil nau păng mĭn tâm nuih n'hâm rĭ mơ jêng săk păng ngăn. Păng lah ma may: “sông sa nhêt hom!” Ƀiălah păng mâu geh ôh nuih n'hâm ngăn đah may.

⁸ Du mbâr may hŏ sa, may mra hok lĕ ro, Jêh ri mpŭng gar nau may hŏ ngơi ueh.

⁹ Lơi ngơi ôh tâm tôr bunuyh rluk, Yorlah păng mra mưch ma nau ngơi blau mĭn may ngơi.

¹⁰ Lơi ta trơn ôh jrŏng n'har neh ơm kăl e, Jêh ri lơi ta in ôh mir phung kon đơi;

¹¹ Yorlah Nơm Tâm Chuai khân păng jêng Nơm geh nau brah, Mra koh dŏng nau phong dôih bơh khân păng tâm rdâng đah may.

¹² Ăn gơih hom lĕ nuih n'hâm ma nau ntĭm nti, Jêh ri rkêng tôr iăt lĕ nau blau mĭn âk.

¹³ Lơi chalơi ôh nau nti kon se jê̆; Nđâp lah dong păng đah mâng rvĕ, păng mâu mra khĭt ôh.

¹⁴ Lah may dong păng đah mâng rvĕ, Jêng tâm rklaih huêng păng klaih bơh ƀon phung khĭt.

¹⁵ Hơi kon gâp, tơlah nuih n'hâm may blau mĭn, Pôri nuih n'hâm gâp mra răm maak đŏng;

¹⁶ Di ngăn, tâm nuih n'hâm gâp mra răm rhơn Lah mbung may ngơi nau sŏng.

¹⁷ Nuih n'hâm may lơi keh nach đah phung tih, Ƀiălah ăp nar klach yơk hom ma Brah Yêhôva.

¹⁸ Yorlah n'hêl nê̆ mra geh du nau dăch dŭt ma nau ueh, Jêh ri nau kâp gân may mâu mra roh hêng ôh.

¹⁹ Hơi kon gâp, iăt hom jêh ri dơi jêng blau mĭn, Rle hom nuih n'hâm may lăp tâm trong di.

²⁰ Lơi tâm rnglăp ôh ndrel ma phung dăng nhêt ndrănh, Mâu lah ndrel phung kơnh sa;

²¹ Yorlah mơng nhêt ndrănh jêh ri kơnh sa mra jêng ndĭt trơi, Bi ma phung lêt bê̆ch mro mra nsoh n'gut ndơ sat rơch.

²² Iăt hom nau mbơ̆ hŏ deh jêh may, Lơi mưch rmot ôh ma mê̆ may lah păng lĕ ranh jêh.

²³ Rvăt hom nau ngăn, nau blau mĭn, nau ntĭm nti, jêh ri nau gĭt rbăng, Lơi ta tăch lơi ôh!

²⁴ Mbơ̆ bunuyh sŏng srăng mra geh răm maak toyh; Mbu nơm geh kon blau mĭn mra răm maak ma păng.

²⁵ Ăn mbơ̆ jêh ri mê̆ may dơi răm rhơn, Jêh ri păng hŏ deh jêh may dơi maak răm.

²⁶ Hơi kon gâp, nhhơr hom nuih n'hâm may ma gâp, Jêh ri măt may maak rŏng hom tâm trong gâp;

²⁷ Yorlah bu ur văng tĭr jêng du ntu jru Jêh ri bu ur ka n'hong jêng du ntu dak huêt.

²⁸ Păng dâk moch nâm bu du huê nơm ntŭng, Ƀư lơ hâu ntop âk nơm mâu geh răp jăp tâm kon bunuyh.

Nau djơh tă bơh ndrănh

²⁹ Mbu nơm geh nau rêh ni? Mbu nơm nter lah? Mbu nơm tâm rlăch? Mbu nơm lŭng nter? Mbu nơm rmanh mâu geh kô̆? Mbu nơm geh măt chăng?

³⁰ Nây jêng phung grem êp kêng ndrănh, Hăn chiăm ndrănh bu tâm lŭk.

³¹ Lơi ta uănh ndrănh lah păng lĕ chăng jêh, Nôk păng rsang tâm kachok Jêh ri hoch nơih pơih.

³² Nglĕ dŭt, păng kăp nâm bu bêh, Luh kăch nâm bu kăch bêh khu.

³³ Măt may mra uănh ma phung bu ur văng tĭr, Jêh ri nuih n'hâm may mra ngơi nau tih mhĭk.

³⁴ Nanê̆, may mra nâm bu bunuyh lâng bê̆ch ta nklang blat dak mƀŭt, Nâm bu phung bê̆ch ta klơ chiông jrŏng meh kumpăn.

³⁵ May mra ngơi pô aơ: “Bu dong gâp ƀiălah gâp mâu ji ôh! Bu mbang gâp ƀiălah gâp mâu dơi gĭt! Lah gâp kah rngăl, Gâp mra plơ̆ joi nhêt tay đŏng.”