Nau Hôr 22 - Nau Brah Ndu Ngơi 2023

¹ Nau lư n'găr ueh khlay lơn ma prăk ndơ âk, Bi nau yô̆ khlay lơn prăk mah.

² Phung ndrŏng jêh ri bunuyh o ach tâm mâp ndrel da dê; Brah Yêhôva hŏ rhăk njêng lĕ bar.

³ Bunuyh blau ngăn saơ lor nau mhĭk jêh ri du krap, Ƀiălah phung rluk hăn rduh ran tât jêh ri dơn nau mhĭk.

⁴ Nau nkhôm ăn nau dêh rhêt jêh ri klach yơk ma Brah Yêhôva Jêng nau ndrŏng, nau bu yơk jêh ri nau rêh.

⁵ Tâm trong bunuyh djơh mhĭk geh lok jêh ri dăk bu sân; Mbu nơm mât njrăng huêng păng nơm mra der ngai bơh păng.

⁶ Nti hom ăn kon se jê̆ trong păng mra tĭng, Gay nôk kêng ranh, mâu lĕ păng chalơi bơh trong nây.

⁷ Bunuyh ndrŏng chiă uănh phung o ach, Mbu nơm manh dăn jêng dĭk ma nơm ăn manh.

⁸ Mbu nơm srih nau mâu di nanê̆ mra rek nau rêh ni, Jêh ri mâng rvĕ nau ji nuih păng mra đoh.

⁹ Bunuyh geh nau blau yô̆ mra geh nau ueh uĭn, Yorlah păng tâm pă ndơ sông sa păng nơm ăn ma phung o ach.

¹⁰ Mprơh hom phung mưch, pôri nau tâm rlăch mra du tâm ban lĕ; Nau tâm rlăch jêh ri nau suai rak mra mâu hôm.

¹¹ Mbu nơm rŏng ma nuih n'hâm kloh rsang jêh ri bâr mbung blau yô̆, Mra dơi jan jiăng ma hađăch.

¹² Măt Brah Yêhôva mât mray bunuyh geh nau blau mĭn, Ƀiălah Păng ăn roh lơi nau phung ƀai.

¹³ Bunuyh ƀlao lah: “Geh yau mŭr gŭ padih ri! Gâp mra khĭt ta nklang trong!”

¹⁴ Trôm mbung bu ur văng tĭr jêng du mlâm ntu jru; Mbu nơm Brah Yêhôva ji nuih mra tŭp ta nây.

¹⁵ Nau rluk mâl kât tâm nuih n'hâm kon se, Ƀiălah mâng rvĕ nau ntĭm mra ƀư ăn nau nây du ngai ma păng.

¹⁶ Phung tŭn jot bunuyh o ach gay ƀư ndrŏng ăn păng nơm, Nâm bu drăp blŏl ăn ma bunuyh ndrŏng, Njŭn leo nau ndĭt trơi da dê.

Nau ngơi bunuyh blau mĭn

¹⁷ Rkêng tôr iăt hom nau bunuyh blau mĭn ngơi, Mĭn rvê hom tâm nau blau mĭn gâp.

¹⁸ Yorlah may mra maak lah may prăp păng tâm nuih n'hâm, Jêh ri rgum păng tâm bâr mbung may.

¹⁹ Nar aơ gâp hŏ ntĭm ăn may gĭt vât lĕ nau nây, Gay ma may geh nuih n'hâm rnơm nsing ma Brah Yêhôva.

²⁰ Mâu di hĕ gâp hŏ nchih ăn ma may Pe jât nau ngơi sâm nti jêh ri nau blau mĭn nây hĕ?

²¹ Ŭch ntĭm ma may lĕ nau di jêh ri nau nanê̆ ngăn, Gay may sŏk nau nanê̆ ngăn dĭng plơ̆ lah ma nơm njuăl may hăn.

²² Lơi tŭn jot ôh bunuyh o ach yorlah khân păng ndĭt trơi, Mâu lĕ tŭn jot bunuyh rêh ni ta mpông ƀon;

²³ Yorlah Brah Yêhôva mra koh dŏng nau rplay ngơi khân păng, Jêh ri sŏk rhuăt nau rêh phung pit ntŭng ndô ndơ khân păng.

²⁴ Lơi jan mĭt jiăng ndrel bunuyh vay ji nuih, Ăt lơi hăn ndrel ma phung djơh janh,

²⁵ Klach lah may nti tĭng ndô̆ trong păng, Jêh ri huêng may mra geh dăk bu sân.

²⁶ Lơi jêng du ai ndrel ma phung ton ƀư nau tâm rnglăp, Mâu lah jêng nơm dơn râng rnon bu;

²⁷ Tơlah may mâu geh ôh ndơ dơi ntrok, Khân păng sŏk gre may dôl bê̆ch!

²⁸ Lơi ta trơn ôh lĕ jrŏng n'har neh ơm kăl e Phung chô yau may hŏ ndâk.

²⁹ May saơ lĕ mbu moh gơih tâm nau kan păng pah? Bunuyh nây mra pah kan phung hađăch, Mâu di ôh mra pah kan ma bunuyh ƀon lan.