Nau Hôr 21 - Nau Brah Ndu Ngơi 2023

¹ Nuih n'hâm hađăch tâm ti Brah Yêhôva nâm bu n'hor dak hoch; Păng ŭch ƀư nkêng nkăng ntŭk mpeh tĭng nau Păng ŭch.

² Lĕ rngôch trong bơh kon bunuyh sŏng da dê tĭng măt păng nơm, Ƀiălah Brah Yêhôva mêt uănh nuih n'hâm.

³ Ƀư tĭng nau sŏng srăng jêh ri nau di Dơi ƀư maak ma Brah Yêhôva ueh lơn jêng nhhơr mpa ƀư brah.

⁴ Măt n'hao êng nơm, nuih n'hâm sưr rlau, Jêh ri ŭnh kađen phung mhĭk jêng nau tih da dê.

⁵ Lĕ nau mĭn bunuyh gơih nanê̆ njŭn tât ma nau rmeh ler, Bi ma lĕ rngôch nơm ndal ir knŏng nchuăt tât ma nau pưt kƀah.

⁶ Drăp ndơ geh tă nau ngơi mƀruh dĭng dơi geh Jêng nau dơm dam gơnh roh, jêng dăk sân phung joi nau khĭt.

⁷ Nau djơh janh bơh phung mhĭk mra ƀư rai khân păng, Yorlah khân păng mâu ŭch ƀư nau sŏng srăng.

⁸ Trong bunuyh ƀư tih jêng kue kuăt, Ƀiălah kan bunuyh kloh rsang jêng sŏng.

⁹ Ueh lơn gŭ du njônh ta klơ chor ngih Ueh lơn jêng gŭ nsum du ngih ndrel ma bu ur mơng tâm djrel.

¹⁰ Nuih n'hâm phung janh ŭch nau mhĭk; Păng mâu yô̆ nđach ma phung chiau meng păng.

¹¹ Lah phung mưch lĕ tâm rmal, bunuyh rluk mra jêng blau mĭn; Lah geh nau bu ntĭm nti, bunuyh blau mĭn lơ ntop lơn nau blau mĭn âk.

¹² Nơm sŏng srăng mêt uănh ngih phung mhĭk; Jêng Nơm nklơ̆ lĕ phung mhĭk tâm nau rêh ni.

¹³ Phung nsêt tôr mâu ŭch iăt ôh nau kuăl nter bơh bunuyh o ach, Dôl phung nây kuăl nter ăt mâu geh lĕ nơm plơ̆ sĭt lah.

¹⁴ Ndơ ăn ma nau ndâp ƀư rthi nau ji nuih, Ndơ blŏl ma nau ndâp ƀư ăn djoh nau hâu ji nuih.

¹⁵ Lah ƀư nau di jêng nau maak ăn ma phung sŏng srăng, Ƀiălah jêng nau klach ăn ma phung ƀư mhĭk.

¹⁶ Bunuyh vĭ nhhơt bơh trong gĭt mĭn Mra gŭ tâm mpôl phung khĭt.

¹⁷ Mbu nơm nđơr ir nau pâl rlưn nanê̆ mra o ach; Bi nơm rŏng ma ndrănh ndrel dak ngi ôlive mâu mra ƀư ndrŏng.

¹⁸ Phung djơh mra jêng rnoh chuai ăn ma bunuyh sŏng srăng, Jêh ri bunuyh mƀruh rlăm ntrok ntŭk ma bunuyh sŏng.

¹⁹ Ueh lơn gŭ du ntŭk rngơt rklăk Ma đah gŭ ndrel du huê bu ur mơng tâm djrel jêh ri vay ji nuih.

²⁰ Drăp ndơ khlay jêh ri dak ngi hôm e tâm ngih bunuyh blau mĭn, Ƀiălah bunuyh rluk sa lơi lĕ rngôch.

²¹ Mbu nơm tĭng joi nau sŏng srăng jêh ri nau ueh Mra dơi joi nau rêh, nau sŏng srăng jêh ri nau yơk.

²² Bunuyh blau mĭn rduh lơh ƀon toyh phung janh ktang Jêh ri ƀư rai pôih nâp khân păng rnơm nsing.

²³ Mbu nơm mât mbung mpiăt păng Jêng mât huêng păng nơm klaih bơh nau rêh ni.

²⁴ “Mưch” jêng ntơ phung n'hao êng nơm, nau sưr, Păng gŭ ngao ma nau mƀruh tĭng nau mơng sưr rlau păng.

²⁵ Nau kơnh bơh bunuyh ƀlao ŭch nkhĭt păng, Yorlah bar đah ti păng mâu ŭch pah kan.

²⁶ Lĕ nar păng knŏng kơnh rlau ir, ŭch kơnh. Ƀiălah bunuyh sŏng srăng ăn ma nau lŏng.

²⁷ Mpa ƀư brah bơh phung mhĭk jêng du ndơ ƀơ̆ ƀơch; Lơ hô khân păng djôt leo ndrel ma nau mĭn djơh mhĭk.

²⁸ Nơm mbơh mƀruh mra rai roh, Ƀiălah bunuyh blau iăt mra dơi ngơi mro.

²⁹ Bunuyh mhĭk jan ƀư janh, Bi ma bunuyh sŏng ƀư nâp trong hăn păng nơm.

³⁰ Mâu geh nau blau mĭn, nau gĭt rbăng, mâu lah moh nau ŭch nchră Dơi tâm rdâng đah Brah Yêhôva.

³¹ Seh ndrăp ăn nar tâm lơh, Ƀiălah nau dơi tâm lơh tă bơh Brah Yêhôva.