Nau Hôr 2 - Nau Brah Ndu Ngơi 2023

Nau khlay ma nau blau mĭn

¹ Hơi kon gâp, tơlah may sŏk dơn nau gâp nti Jêh ri djôt prăp lĕ nau vay gâp ntăm,

² Rkêng tôr iăt nau blau mĭn, Rbông nuih n'hâm may ma nau gĭt rbăng;

³ Ngăn yơh, tơlah may vơl dăn nau gĭt rbăng Jêh ri vơh vơl nau gĭt rbăng,

⁴ Tơlah may joi păng nâm bu prăk rêl, Joi păng nâm bu ndô ndơ khlay pôn ndâp,

⁵ Nôk nây may gĭt rbăng nau klach yơk ma Brah Yêhôva Jêh ri dơi joi nau gĭt rbăng Brah Ndu.

⁶ Yorlah Brah Yêhôva ăn nau blau mĭn; Tă bơh trôm mbung Păng luh nau blau mĭn jêh ri nau gĭt rbăng.

⁷ Păng prăp nau blau mĭn nanê̆ ma bunuyh sŏng; Păng jêng khêl ma phung rêh tâm nau sŏng,

⁸ Gay ma n'gang trong phung sŏng srăng, Jêh ri mât mray trong phung kloh ueh Păng.

⁹ Nôk nây may mra gĭt rbăng nau sŏng srăng jêh ri nau di, Nau sŏng jêh ri lĕ rngôch trong ueh.

¹⁰ Yorlah nau blau mĭn mra lăp tâm nuih n'hâm may, Nau blau mĭn mra ƀư maak huêng may.

¹¹ Nau blau sek uănh mra mât njrăng may, Nau gĭt vât mra king may ƀaƀơ,

¹² Gay tâm rklaih may tă bơh trong phung mhĭk, Rklaih may tă bơh bunuyh ngơi nau kue,

¹³ Jêh ri phung nây chalơi trong nau sŏng Ŭch hăn tĭng trong ngo klĕng;

¹⁴ Jêng phung maak ƀư nau mhĭk, Hâk răm đah nau ƀai bơh phung mhĭk.

¹⁵ Khân păng hăn kue tâm lĕ trong hăn, Jêh ri vĭ nhhơt jêh tâm lĕ trong khân păng nơm.

¹⁶ Nau blau mĭn mra rklaih may bơh nau bu ur văng tĭr, Jêng bu ur bu năch bri ngai ndơm may ma nau ngơi n'hi;

¹⁷ Nơm hŏ chalơi sai păng bơh păng hôm druh mom Jêh ri chuêl nau tâm rnglăp đah Brah Ndu păng;

¹⁸ Yorlah ngih păng lĕ ngâm tâm nau khĭt, Trong păng njŭn tât ta ntŭk ƀon phung khĭt.

¹⁹ Ăp nơm văch ta păng mâu hôm ôh plơ̆ tay, Mâu lĕ hôm geh du huê dơi tât ta trong nau rêh.

²⁰ Nau blau mĭn mra ƀư ăn may hăn tâm trong bunuyh ueh Jêh ri tĭng ndô̆ trong phung sŏng srăng.

²¹ Yorlah phung sŏng mra dơi gŭ chăm bri tâm n'gor, Jêh ri bunuyh ueh mra hôm gŭ ta nây ƀaƀơ.

²² Ƀiălah phung djơh mhĭk mra ƀư rai lơi bơh n'gor, Phung mâu răp jăp bu mra mprơh lơi bơh ƀon tơm.