Nau Hôr 18 - Nau Brah Ndu Ngơi 2023

¹ Phung gŭ êng tĭng joi nau păng nơm ŭch, Tâm ndăng đah nau blau mĭn ngăn.

² Bunuyh rluk mâu ŭch ôh ma nau gĭt rbăng, Ƀiălah knŏng ŭch mbơh nau păng nơm mĭn.

³ Lah phung djơh mhĭk tât, nau mưch rmot tât tâm ban đŏng, Jêh ri nau prêng ndrel nau djơh mhĭk tâm ban lĕ.

⁴ Nau ngơi bơh trôm mbung kon bunuyh nâm bu dak jru ngăn ngên, Tu nau blau mĭn nâm bu dak n'hor hoch băm ler.

⁵ Gŭ mpeh phung ƀai gay ma tŭn jot bunuyh sŏng srăng dôl phat dôih Jêng nau mâu di,

⁶ Mbung bunuyh rluk joi ma nau tâm djrel, Mbung păng ngơi nsônh nau tâm lơh.

⁷ Mbung bunuyh rluk ƀư roh săk păng nơm, Bâr păng jêng dăk sân ma huêng păng nơm.

⁸ Nau nơm nkoch bri nsak nâm bu ndơ sa kah, Păng lăp trŭnh tât proch klơm.

⁹ Phung ƀlao tâm kan păng pah Jêng oh nâu ndrel ma phung ƀư rai đŏng.

¹⁰ Amoh Brah Yêhôva jêng du pôih nâp ngăn, Bunuyh sŏng srăng nchuăt tât ta nây, dơi joi ntŭk du krap đăp mpăn.

¹¹ Drăp ndơ bunuyh ndrŏng jêng pôih nâp ngăn ma păng, Jêng pêr prêh tâm nau mĭn lor bơh nơm nây.

¹² Nuih n'hâm sưr hăn lor ma nau rai lôch, Ƀiălah nau dêh rhêt hăn panăp ma nau yơk.

¹³ Plơ̆ lah ro êlor ma iăt, Nây jêng nau rluk jêh ri nau prêng ma mbu nơm ƀư pônây.

¹⁴ Nuih n'hâm bơh du huê bunuyh tâm kơl bunuyh nây nôk ji kuet, Ƀiălah Nuih n'hâm lĕ rai roh pôri mbu nơm dơi dâk đŏng?

¹⁵ Nuih n'hâm bunuyh gĭt rbăng vơt dơn nau blau mĭn, Tôr bunuyh blau mĭn tĭng joi nau gĭt rbăng.

¹⁶ Ndơ ăn bơh du huê bunuyh pơk trong ăn ma nơm nây Jêh ri njŭn leo tât tanăp măt phung geh nau dơi toyh.

¹⁷ Mpeh nơm ngơi lor kơp păng nơm ngơi jêng di, Ƀiălah mpeh đah ri tât bu ôp n'hêl ri mơ rah vah tih di.

¹⁸ Nau sŏk nchroh dơi ƀư ăn lôch nau tâm rlăch Jêh ri rblang ta nklang phung geh nau dơi toyh.

¹⁹ Sŏk tay nuih n'hâm du huê oh nâu bu hŏ ƀư nsak jêh nuih n'hâm, Jêng jêr lơn lơh pit in du ƀon toyh lĕ nâp; Nau tâm djrel pônây tâm ban rnăng mpông nchăng pôih toyh.

²⁰ Ndŭl dơi hơm yor tă kao play bơh trôm mbung; Kao play bơh bâr mbung ƀư ăn bunuyh hơm ndŭl.

²¹ Rêh khĭt yor tă nau dơi bơh mpiăt, Mbu nơm rŏng păng mra sa kao play păng.

²² Mbu nơm dơi joi du huê ur jêng dơi joi du ntil nau ueh, Jêh ri sŏk dơn nau yô̆ bơh Brah Yêhôva.

²³ Bunuyh o ach vơh vơl dăn nau yô̆, Bi ma bunuyh ndrŏng plơ̆ lah ma nau ngơi dăng.

²⁴ Du huê bunuyh geh âk mĭt jiăng dơi jêng nau djơh mhĭk, Ƀiălah geh du huê mĭt jiăng dơh dăch rlau lơn ma oh nâu du ndŭl deh.