Nau Hôr 17 - Nau Brah Ndu Ngơi 2023

¹ Ueh lơn du glo piăng let kro geh nau tâm rnglăp Rlau lơn đah ngih bêng ma puăch ƀư brah nkhơng tâm djrel.

² Du huê dĭk bu nau blau mĭn mra chiă uănh du huê kon kôranh mâu iăt nau, Jêh ri dơi dơn drăp ndơn ndrel ma phung oh nâu tâm ngih.

³ Glah gay krĕt prăk, năk gay krĕt mah, Ƀiălah Brah Yêhôva rlong uănh nuih n'hâm kon bunuyh.

⁴ Bunuyh ƀư ƀai rle nuih n'hâm mpeh bâr djơh mhĭk; Bunuyh vay ngơi mƀruh rkêng tôr iăt mpiăt nau mhĭk.

⁵ Mbu nơm mưch bunuyh ndĭt trơi jêng suai rak ma Nơm Rhăk Njêng păng; Mbu nơm maak răm ma nau rêh ni mâu mra klaih ôh bơh nau tâm rmal.

⁶ Đon hađăch ma phung bu ranh, nây jêng phung kon sau, Bi nau mƀrơn phung kon sau, nây jêng phung chô yau.

⁷ Nau ngơi ueh mâu khư đah phung rluk; Bâr mbung mƀruh lơ hô mâu khư đah kôranh chiă uănh.

⁸ Ndơ bu blŏl tâm ban ma du găr lŭ khlay tanăp nơm dơi geh păng; Nđâp lah mbah ntŭk mpeh păng rle ăt dơi jêng.

⁹ Mbu nơm tâm yô̆ nau tih, tĭng joi nau rŏng, Ma mbu nơm nkah tay nau nây, tâm nkhah nau rŏng mĭt jiăng.

¹⁰ Nau nduyh lăp jru tâm bunuyh geh nau gĭt rbăng Rlau lơn rhiăng tơ̆ dong bunuyh rluk.

¹¹ Bunuyh djơh mhĭk knŏng joi nau tâm rdâng, Du huê nơm ntuh bâr janh mra dơi prơh hăn lơh păng.

¹² Ueh lơn bu mâp kau me lĕ bu ntŭng kon Rlau lơn mâp bunuyh rluk dôl păng ƀư nau rluk.

¹³ Mbu nơm sŏk nau mhĭk mplơ̆ ma nau ueh, Nau mhĭk mâu mra du ôh bơh ngih păng.

¹⁴ Ntơm bôk nau tâm djrel nâm bu pling ntât dak; Pôri rlu hom nau tâm rlăch êlor păng geh nau tâm djrel.

¹⁵ Mbu nơm kơp bunuyh mhĭk jêng sŏng srăng jêh ri nơm nduyh bunuyh sŏng srăng, Lĕ bar hê tâm rmot ma Brah Yêhôva da dê.

¹⁶ Moh nau khlay ma bunuyh rluk djôt prăk tâm ti gay ma rvăt nau blau mĭn, Lah păng mâu geh ôh nuih n'hâm ŭch nti?

¹⁷ Mĭt jiăng tâm rŏng ndrel ƀaƀơ, Jêh ri geh oh nâu gay tâm kơl dôl geh nau rêh ni.

¹⁸ Nơm mâu geh nau gĭt rbăng gơnh ro ƀư nau tâm nkol, Tâm chuai ma bunuyh chiau meng păng.

¹⁹ Mbu nơm kơnh tâm djrel, kơnh ma nau tih; Mbu nơm ƀư mpông ăn prêh, tĭng joi nau rlâm.

²⁰ Phung geh nuih n'hâm blau plĕch mâu dơi ôh joi nau ueh lăng, Jêh ri mbu nơm geh mpiăt kue mra tŭp tâm nau mhĭk.

²¹ Mbu nơm deh kon rluk mâl mra rngot; Mbơ̆ ma phung rluk mâu geh ôh nau maak!

²² Nuih n'hâm hâk răm jêng du ntil dak si ueh, Bi nau rdja nuih ƀư ăn nting sơh kro.

²³ Bunuyh ƀai dơn ndơ bu blŏl ma nau ndâp Gay ƀư vĭ mâng njing nau di.

²⁴ Bunuyh gĭt rbăng rle măt mpeh ma nau blau mĭn, Ƀiălah trôm măt phung rluk gŭ ta ntŭk dŭt neh ntu.

²⁵ Kon rluk jêng nau rngot ăn ma mbơ̆ Jêh ri jêng nau rngot ăn ma mê̆ hŏ deh păng.

²⁶ Kuh lah bunuyh sŏng srăng jêng mâu di, Lơh bunuyh khư nau yơk yorlah nuih n'hâm sŏng khân păng jêng tih jêh.

²⁷ Mbu nơm njrăng nau păng ngơi jêng bunuyh blau mĭn, Mbu nơm geh nau ueh jêng bunuyh gĭt rbăng.

²⁸ Lah gŭ rklăk, nđâp lah bunuyh rluk ăt dơi đŏng kơp păng jêng blau mĭn, Bunuyh blau prăp bâr mbung dơi kơp jêng bunuyh gĭt rbăng.