Nau Hôr 16 - Nau Brah Ndu Ngơi 2023

¹ Lĕ rngôch nau nchră tâm nuih n'hâm jêng nau kan kon bunuyh, Ƀiălah nau plơ̆ lah văch bơh Brah Yêhôva.

² Lĕ rngôch trong kon bunuyh jêng kloh rsang da dê tĭng măt păng nơm, Ƀiălah Brah Yêhôva mêt uănh tâm nuih n'hâm.

³ Jao hom nau kan may ma Brah Yêhôva, Pôri moh nau may ŭch rvê mĭn mra dơi jêng.

⁴ Brah Yêhôva rhăk njêng lĕ rngôch mpô mpa geh da dê nau ŭch, Nđâp ma lĕ bunuyh ƀai đŏng prăp ma nar nau mhĭk.

⁵ Brah Yêhôva tâm rmot ăp nơm geh nuih n'hâm sưr, N'hêl nanê̆ păng mâu mra klaih ôh bơh nau tâm rmal.

⁶ Ma nau ueh jêh ri ma nau nanê̆ ngăn nau tih dơi yô̆ an, Yor ma nau klach yơk ma Brah Yêhôva bu der bơh nau mhĭk.

⁷ Lah Brah Yêhôva di nuih n'hâm đah nau rêh ueh ma mbu nơm, Pôri Păng ƀư ăn nơm rlăng gŭ đăp rmên ndrel ma bunuyh nây.

⁸ Ueh lơn geh djê̆ ndơ ƀiălah gŭ rêh sŏng srăng Rlau lơn ma âk ndơ sa ƀiălah rêh ma nau kue.

⁹ Kon bunuyh ŭch mĭn trong păng, Ƀiălah Brah Yêhôva ntĭm leo lĕ nhuat păng.

¹⁰ Nau mbơh ngơi klơ bâr hađăch, Mbung hađăch mâu ngơi tih dôl păng phat dôih.

¹¹ Mâng njing jêh ri play jâk njing nau di jêng tâm Brah Yêhôva; Ăp play njing tâm dŭng jêng nau kan Păng.

¹² Ƀư nau djơh mhĭk jêng ndơ tâm rmot ma phung hađăch, Yor tă bơh nau sŏng srăng ƀon bri hađăch dơi nâp ngăn ngên.

¹³ Bâr mbung nau ƀon bri hađăch ƀư ăn hađăch di nuih n'hâm, Hađăch ŭch nau ngơi bơh bunuyh sŏng.

¹⁴ Nau hađăch ji nuih nâm bu nơm mbơh nau khĭt. Ƀiălah bunuyh blau mĭn ƀư ma păng aih jêh.

¹⁵ Măt hađăch ang nchrat, sol ang nau rêh; Nau yô̆ păng nâm bu tŭk leo tơm mih yan kao.

¹⁶ Dơi geh nau blau mĭn, khlay lơn ma mah chrêk! Dơi geh nau gĭt rbăng, khlay lơn ma prăk!

¹⁷ Trong bunuyh sŏng der ngai nau mhĭk; Mbu nơm mât trong păng jêng mât huêng păng nơm.

¹⁸ Nau sưr hăn lor, nau rai lôch groi pakơi, Jêh ri nau n'hao êng nơm hăn lor tâm nau tŭp.

¹⁹ Ueh lơn rêh dêh rhêt gŭ ndrel bunuyh o ach Rlau lơn ma nau tâm pă ndơ sŏk pit ndrel phung sưr.

²⁰ Mbu nơm djôt ƀoi ntil nau chroh, dơi joi nau khlay, Jêh ri mbu nơm nsing ma Brah Yêhôva geh nau ueh maak ngăn!

²¹ Bunuyh geh nuih n'hâm blau mĭn bu kuăl jêng bunuyh gĭt rbăng, Nau ngơi rdơ̆ sâm n'hao nau blau mĭn.

²² Bunuyh dơi geh nau gĭt rbăng jêng dơi geh tu nau rêh, Ƀiălah nau brŭt ndrăng jêng nau tâm rmal ma phung rluk.

²³ Nuih n'hâm blau mĭn ntĭm nti mbung păng, Jêh ri ntop nau gĭt mĭn ăn ma bâr mbung.

²⁴ Nau ngơi ueh jêng nâm bu mpơng sŭt, Kah njŭng ăn ma huêng jêh ri nau dăng ktang ma săk jăn.

²⁵ Geh du trong ntôn lah nâm bu di ăn ma kon bunuyh, Ƀiălah nglĕ dŭt păng jêng trong nau khĭt.

²⁶ Ndŭl ji ngot ƀư ăn khân păng pah kan, Mbung ŭch sa ntrôl khân păng mra kan.

²⁷ Bunuyh mâu chroh tâm nchră ŭch ƀư mhĭk bu, Tâm mbung păng nâm bu geh chiông ŭnh hit.

²⁸ Bunuyh kue srih nau tâm djrel, Phung suai rak tâm nkhah mĭt jiăng nơm.

²⁹ Bunuyh janh ƀai ndơm ma mĭt jiăng păng nơm, Jêh ri njŭn leo păng tâm trong mâu ueh ôh.

³⁰ Mbu nơm nhêp măt tâm nchră nau mhĭk, Mbu nơm kăp mbung ƀư nau kue.

³¹ Sŏk ndra mra jêng đon hađăch nau chrêk rmah, Prăp ăn ma bunuyh hăn tâm trong sŏng srăng.

³² Bunuyh băt ji nuih dơi lơn ma tahan janh, Jêh ri mbu nơm chiă uănh nuih n'hâm păng dơi lơn ma nơm pit sŏk ƀon.

³³ Bu rhuăt nau tâm nchroh tâm ntôr ao, Ƀiălah ăp nau ton ƀư bơh Brah Yêhôva.