Nau Hôr 15 - Nau Brah Ndu Ngơi 2023

¹ Nau plơ̆ lah ma bâr rdơ̆ rbăn ƀư djoh nau ji nuih, Bi nau ngơi dăng nsônh nau ji nuih.

² Mpiăt phung blau mĭn ngơi nau gĭt rbăng, Ƀiălah mbung phung rluk knŏng luh nau brŭt moih.

³ Măt Brah Yêhôva uănh tâm lam ntŭk, Sek uănh phung djơh mhĭk jêh ri phung ueh.

⁴ Mpiăt rdơ̆ rbăn jêng nâm bu tơm si nau rêh, Ƀiălah mpiăt kue ăn chah nuih n'hâm.

⁵ Bunuyh rluk tâm rmot nau mbơ̆ păng ntĭm nti, Ma mbu nơm iăt nau nduyh nkra jêng nau blau ngăn.

⁶ Ngih bunuyh sŏng srăng geh âk drăp ndơ khlay, Ƀiălah ndơ bunuyh ƀai knŏng djôt leo nau rŭng răng tât ma khân păng.

⁷ Bâr mbung bunuyh blau mĭn ăn bĭk nau gĭt rbăng, Bi nuih n'hâm phung rluk mâu dơi nâm bu pônây ôh.

⁸ Brah Yêhôva tâm rmot mpa ƀư brah bơh phung mhĭk, Ƀiălah Păng maak nau mbơh sơm bơh bunuyh sŏng.

⁹ Brah Yêhôva tâm rmot trong phung mhĭk, Ƀiălah Păng rŏng ma bunuyh tĭng joi nau sŏng srăng.

¹⁰ Nau rmal dŭt jâk prăp ma phung chalơi trong sŏng, Bi ma phung rmot nau nduyh nkra mra khĭt.

¹¹ Ƀon phung khĭt jêh ri ntŭk rai yot hôm e mpơl tanăp măt Brah Yêhôva, Lơ hô ma nây nuih n'hâm kon bunuyh!

¹² Phung dăng mưch mâu ŭch ôh nau bu nduyh nkra; Păng mâu ŭch văch ôh ndrel bunuyh blau mĭn.

¹³ Nuih n'hâm răm rhơn ƀư ăn măt hâk răm, Ƀiălah nuih n'hâm rngot ƀư ăn nau mĭn hươi rdja.

¹⁴ Nuih n'hâm bunuyh gĭt rbăng tĭng joi nau blau mĭn âk, Bi ma mbung phung rluk mât nau brŭt moih.

¹⁵ Ăp nar phung rêh ni jêng mhĭk da dê, Ƀiălah nuih n'hâm hâk răm râng nau nhêt sông ƀaƀơ.

¹⁶ Ueh lơn geh djê̆ drăp ndơ ƀiălah klach yơk ma Brah Yêhôva Rlau lơn đah geh âk drăp ndơ ƀiălah nau rŭng răng tĭng groi.

¹⁷ Ueh lơn sa du ntil n'ha biăp ƀiălah tâm rŏng ndrel Rlau lơn đah sa ndrôk lay ƀiălah geh nau tâm rmot tĭng groi.

¹⁸ Bunuyh gơnh nuih vay nsônh nau tâm djrel, Ƀiălah bunuyh băt nuih ƀư bah nau tâm djrel.

¹⁹ Trong phung ƀlao nâm bu du mbor n'gar lok, Bi trong phung sŏng lĕ rli lâng.

²⁰ Kon blau mĭn ƀư maak nuih n'hâm mbơ̆ păng, Ƀiălah du huê kon rluk tâm rmot ma mê̆ păng.

²¹ Bunuyh mâu geh nau gĭt vât sŏk nau rluk ƀư maak ma păng nơm, Ƀiălah bunuyh gĭt rbăng ăt chuat hăn tâm trong sŏng.

²² Mâu geh nau tâm nchră, nau ŭch ƀư mâu mra jêng, Yor geh âk bunuyh kơl nchră, nau ŭch nchră mra jêng.

²³ Mbung blau plơ̆ lah ƀư ăn bu răm maak, Nau ngơi di mông jêng ueh ngăn ngên!

²⁴ Trong nau rêh njŭn leo bunuyh blau mĭn hăn hao klơ, Gay der bơh ƀon phung khĭt gŭ dêh tâm dâng.

²⁵ Brah Yêhôva ƀư rlâm lơi ngih phung sưr, Ƀiălah Păng king nâp n'har bri bu ur ndrô.

²⁶ Nau mĭn djơh mhĭk jêng nau tâm rmot đah Brah Yêhôva, Ƀiălah nau kloh ueh dơi ƀư ueh nuih n'hâm Păng.

²⁷ Bunuyh kơnh sa drăp tih ƀư uh ah ma ngih păng nơm, Bi nơm rmot ma drăp bu blŏl mra dơi geh nau rêh.

²⁸ Nuih n'hâm bunuyh sŏng srăng mĭn rvê mâm nau mra plơ̆ lah, Ƀiălah bâr mbung phung djơh mhĭk ngơi luh nau janh.

²⁹ Brah Yêhôva gŭ ngai phung ƀai, Ƀiălah Păng iăt nau mbơh sơm bơh phung sŏng srăng.

³⁰ Măt ang ƀư ăn nuih n'hâm răm maak, Nau mhe mhan ueh ƀư ma nting nđăng dơi dăng.

³¹ Mbu nơm rkêng tôr iăt nau nduyh nkra nau rêh. Mra dơi gŭ ta nklang bunuyh blau mĭn.

³² Mbu nơm dun nau ntĭm nti jêng tâm rmot ma huêng păng nơm, Ƀiălah mbu nơm iăt nau nduyh nkra dơi geh nau gĭt rbăng.

³³ Nau klach yơk ma Brah Yêhôva ntĭm nau blau mĭn, Jêh ri nau dêh rhêt hăn lor ma nau yơk.