Nau Hôr 14 - Nau Brah Ndu Ngơi 2023

¹ Bu ur blau mĭn ndâk ngih păng, Ƀiălah bu ur rluk sŏk ti phă lơi ngih păng.

² Bunuyh gŭ rêh tâm nau di klach yơk ma Brah Yêhôva, Bi ma nơm tĭng trong kue mưch rmot Păng.

³ Tâm mbung bunuyh rluk geh mâng rpăt prăp ma nau păng sưr, Ƀiălah bâr mbung bunuyh blau mĭn king n'gang păng.

⁴ Ta ntŭk mâu geh ndrôk, ta nây hip gơ̆ nsoih dơm, Ƀiălah tă n'hâm suan ndrôk, geh play ba âk rmeh.

⁵ Bunuyh mbơh ngơi ngăn mâu geh ôh ngơi mƀruh. Bi phung bunuyh mbơh mƀruh luh ngơi nau rlăm.

⁶ Bunuyh dăng mưch joi nau blau mĭn ƀiălah mâu mâp ôh, Ƀiălah bunuyh gĭt mĭn nơih pơih mâp nau blau mĭn.

⁷ Der ngai hom bơh bunuyh rluk, Yorlah may mâu hŏ nti ôh nau blau mĭn bơh bâr mbung păng.

⁸ Nau blau bơh bunuyh blau njrăng jêng nau gĭt n'hêl nê̆ trong păng, Ƀiălah nau brŭt moih bơh phung rluk jêng nau ndơm.

⁹ Phung rluk mưch ma nau tih; Bunuyh sŏng Kôranh Brah dơi ăn nau yô̆.

¹⁰ Nau rngot tâm nuih n'hâm knŏng nuih n'hâm păng nơm gĭt. Nau maak tâm nâm nuih n'hâm mâm dơi tâm pă đah phung êng.

¹¹ Ngih phung djơh mhĭk bu mra ƀư rai, Ƀiălah vâl bok phung sŏng mra dơi geh jêng.

¹² Geh du trong ntôn lah nâm bu di ăn ma kon bunuyh, Ƀiălah nglĕ dŭt păng jêng trong nau khĭt.

¹³ Nđâp lah dôl geh nau gơm, nuih n'hâm hôm e rngot, Jêh ri dăch dŭt nau răm nây jêng nau rngot rvê.

¹⁴ Bunuyh plơ̆ ƀư tih mra dơn play mhĭk tĭng trong păng, Bi bunuyh ueh mra dơn play ueh bơh kan păng ƀư.

¹⁵ Bunuyh hôm e rluk rnơm lĕ rngôch ntil nau, Ƀiălah bunuyh blau njrăng sek uănh nanê̆ lĕ trong păng hăn.

¹⁶ Bunuyh blau mĭn klach nau mhĭk jêh ri der ngai, Ƀiălah bunuyh rluk ƀư sưr jêh ri mâu ôh blau njrăng.

¹⁷ Mbu nơm gơnh ji nuih ƀư nau rluk, Bi bunuyh nchră ƀư nau mhĭk bu mra tâm rmot.

¹⁸ Phung mâu blau mĭn sŏk nau rluk ƀư drăp ndơn, Ƀiălah phung blau mĭn dơi ndô đon hađăch đah nau blau mĭn.

¹⁹ Phung mhĭk mra chon mon tanăp măt phung ueh, Jêh ri phung djơh mhĭk gŭ kâp panăp mpông phung sŏng,

²⁰ Phung chiau meng ăt tâm rmot đŏng ma bunuyh o ach, Ƀiălah phung ndrŏng dơi geh âk bunuyh rŏng.

²¹ Mbu nơm tâm rmot ma phung chiau meng jêng tih, Bi ma nơm yô̆ nđach ma phung o ach geh nau ueh maak ngăn.

²² Phung tâm nchră ƀư nau mhĭk mâm mâu lĕ vĭ nhhơt? Bi ma phung ŭch mĭn ƀư nau ueh mra mâp nau ueh jêh ri nau nanê̆ ngăn.

²³ Lĕ rngôch nau kan hŏt geh nau khlay da dê, Ƀiălah nau ngơi dơm dam njŭn leo ma nau o ach.

²⁴ Đon hađăch ma phung blau mĭn jêng nau ndrŏng kuăng, Bi ma rvang kao phung rluk mâl jêng nau brŭt moih.

²⁵ Nơm mbơh nau nanê̆ ngăn tâm rklaih âk nau rêh, Ƀiălah bunuyh ngơi mƀruh knŏng jêng nau ndơm.

²⁶ Tâm nau klach yơk ma Brah Yêhôva geh ntŭk rnơm nsing nâp ngăn, Jêh ri phung jêng kon Păng mra dơi geh du ntŭk gŭ krap.

²⁷ Nau klach yơk ma Brah Yêhôva jêng tu dak nau rêh, Kơl kon bunuyh der bơh dăk nau khĭt.

²⁸ Phung ƀon lan âk jêng nau chrêk rmah ma hađăch, Mâu geh ƀon lan, phung kôranh chiă uănh jêng nau rai lôch.

²⁹ Bunuyh băt duh nuih bêng ma nau gĭt rbăng, Ƀiălah bunuyh vay gơnh duh nuih lơ hô n'hao nau brŭt moih.

³⁰ Nuih n'hâm đăp rmên jêng nau rêh ma săk jăn, Bi nau rmot ƀư rai tâm nting.

³¹ Phung tŭn jot bunuyh o ach suai rak ma Nơm rhăk njêng păng, Mbu nơm yô̆ an ma bunuyh o ach jêng nau yơk ma Păng.

³² Bunuyh mhĭk roh rai yor nau djơh mhĭk păng, Ƀiălah bunuyh sŏng srăng tâm nôk khĭt ăt hôm e geh ntŭk nde.

³³ Nau blau mĭn prăp tâm nuih n'hâm bunuyh gĭt rbăng, Bi ntil nau tâm trôm bunuyh rluk dơi mpơl.

³⁴ Nau sŏng ƀư ăn bri dak dơi geh nau yơk, Ƀiălah nau tih ƀư mpôl bunuyh geh nau bêk prêng.

³⁵ Hađăch prăp nau yô̆ ăn ma oh mon gŭ ngao blau mĭn, Ƀiălah păng mra ji nuih ma nơm ƀư nau bêk prêng.