Nau Hôr 13 - Nau Brah Ndu Ngơi 2023

¹ Kon blau mĭn iăt nau mbơ̆ ntĭm nti, Ƀiălah bunuyh mưch mâu ŭch iăt ôh nau nduyh.

² Tă bơh kao play bâr mbung du huê bunuyh dơi dơn nau ueh, Bi ma phung kơnh blau plĕch ƀư nau djơh janh.

³ Mbu nơm blau njrăng bâr mbung dơi mât nau rêh păng nơm, Ƀiălah nơm nđar huy ir mbung n'ho geh nau rai yot.

⁴ Nuih n'hâm bunuyh ƀlao geh nau kơnh ƀiălah mâu geh ôh ndơ, Bi ma huêng phung bunuyh gơih mra dơi geh ăp ntil ndơ.

⁵ Bunuyh sŏng srăng tâm rmot ma nau ngơi mƀruh, Bunuyh djơh mhĭk di ma bu tâm rmot jêh ri bêk prêng.

⁶ Nau sŏng srăng king bunuyh gŭ rêh tâm nau di, Ƀiălah nau mhĭk n'glưh lơi phung ƀư tih.

⁷ Geh bunuyh ƀư n'hi ndrŏng ƀiălah mâu geh ôh; Geh đŏng bunuyh ƀư n'hi nâm bu o ach ƀiălah geh âk drăp ndơ.

⁸ Rnoh tâm chuai nau rêh du huê bunuyh jêng drăp ndơ bơh nơm nây, Ƀiălah bunuyh o ach mâu ŭch iăt ôh nau nkrit nhhu.

⁹ Nau ang phung sŏng srăng troh nau maak, Ƀiălah ŭnh kađen bơh phung ƀai gơnh geh nau nhhât.

¹⁰ Nau sưr knŏng ăn tât nau tâm djrel, Bi nau blau mĭn gŭ ndrel bunuyh dơn iăt nau ntĭm nti.

¹¹ Drăp ndơ tă bơh nau kue mra roh mbrơi, Ƀiălah mbu nơm blau ti bun prăp drăp ndơ mra ntop lơ âk.

¹² Nau kâp gân njong tay ƀư ăn nuih n'hâm nđêh nji, Ƀiălah nau gay ŭch tât jêh jêng tơm si nau rêh.

¹³ Mbu nơm tâm rmot nau bu nti mra roh păng nơm, Bi ma nơm klach yơk nau vay ntăm nanê̆ mra geh nau nkhôm.

¹⁴ Nau ntĭm bơh bunuyh blau mĭn jêng tu dak nau rêh, Kơl ăn bunuyh iăt gay klaih bơh dăk nau khĭt.

¹⁵ Nau gĭt rbăng ngăn dơi dơn nau yô̆, Ƀiălah trong phung blau plĕch bêng nau rêh ni.

¹⁶ Lĕ rngôch bunuyh geh nau blau njrăng pah kan ma nau blau mĭn, Ƀiălah bunuyh rluk mâl tâm mpơl nau rluk păng.

¹⁷ Phung mbơh nkoch nau mhĭk tŭp tâm nau mhĭk uh ah, Bi phung mbơh răp jăp leo nau ƀư bah.

¹⁸ Mbu nơm dun nau bu ntĭm nti mra jêng o ach jêh ri dơn nau bêk prêng, Ƀiălah mbu nơm dơn nau nduyh nkra mra dơi geh nau yơk.

¹⁹ Nau gay ŭch dơi jêng ƀư ăn huêng rdơ̆ rbăn, Chalơi nau mhĭk jêng nau phung rluk tâm rmot.

²⁰ Mbu nơm dơh dăch đah bunuyh blau mĭn mra dơi jêng blau mĭn, Ƀiălah mbu nơm ƀư jiăng đah bunuyh rluk mra dơn nau roh rai.

²¹ Nau mhĭk tĭng groi phung geh nau tih, Bi nau ueh lăng jêng nau nkhôm ma bunuyh sŏng srăng.

²² Bunuyh ueh ăn drăp ndơn ma kon sau păng nơm, Ƀiălah drăp ndơ phung geh nau tih prăp ma bunuyh sŏng srăng.

²³ Neh bơh bunuyh o ach muyh kăl geh âk ndơ sông sa, Ƀiălah nau mâu sŏng pih kloh lĕ ndơ sông sa nây.

²⁴ Mbu nơm mâu dŏng mâng rpăt jêng rmot kon păng nơm, Ƀiălah mbu nơm rŏng ma kon ăn ơm đê̆ rvê mĭn nkra nti păng.

²⁵ Bunuyh sŏng srăng dơi geh ndơ sông sa tŏng ma păng, Bi ndŭl phung ƀai mra geh nau ji ngot ngăn.