Nau Hôr 12 - Nau Brah Ndu Ngơi 2023

¹ Mbu nơm rŏng nau nduyh nkra jêng rŏng ma nau gĭt rbăng, Mbu nơm tâm rmot nau nduyh lah jêng nơm rluk.

² Bunuyh ueh sŏk dơn nau yô̆ bơh Brah Yêhôva, Ƀiălah nơm nchră nau mhĭk Păng tâm rmal nơm tih.

³ Kon bunuyh mâu jêng nâp ôh yor nau djơh mhĭk, Ƀiălah tơm reh ma phung sŏng srăng bu mâu geh n'gơ ôh.

⁴ Ur geh nau ueh jêng nâm bu đon hađăch ăn ma sai păng, Bi ma ur ƀư nau bêk prêng ƀư ma sai nâm bu ôm rai tâm nting.

⁵ Nau mĭn phung sŏng srăng jêng di ngăn, Nau nchră bơh phung ƀai jêng nau ndơm da dê.

⁶ Nau ngơi phung ƀai rmoch ƀư pling mham, Ƀiălah mbung phung sŏng tâm rklaih bunuyh.

⁷ Bu lơh rlâm lơi phung ƀai, khân păng mâu hôm ôh, Ƀiălah ngih phung sŏng srăng hôm gŭ nâp.

⁸ Du huê bunuyh dơi geh nau tâm rnê tĭng nâm nau blau mĭn păng nơm, Bi ma nơm geh nuih n'hâm kue bu mra tâm rmot.

⁹ Ueh lơn jêng du huê bunuyh hêt rhôi, dơi geh oh mon Rlau lơn đah nơm n'hi êng nơm jêng toyh ƀiălah pưt ndơ sa.

¹⁰ Bunuyh sŏng srăng mât mray ăn nau rêh mpô mpa păng rŏng, Ƀiălah nuih n'hâm yô̆ bơh phung mhĭk jêng nau djơh janh.

¹¹ Mbu nơm kai neh mir păng mra geh ndơ sông sa rmeh ler, Bi ma nơm hăn tĭng bunuyh ƀlao jêng kƀah nau gĭt rbăng.

¹² Phung mhĭk hưp ma drăp ndơ geh tă bơh ndơ pit in, Ƀiălah tơm reh phung sŏng srăng mra geh kao play.

¹³ Phung ƀai geh dăk yor nau tih bâr mbung, Bi ma phung sŏng srăng klaih bơh nau rêh ni.

¹⁴ Du huê bunuyh mra dơi geh bêng ler nau ueh yor play bơh bâr mbung păng, Jêh ri ăp nơm mra sŏk dơn tĭng nâm kan ti păng hŏ ƀư.

¹⁵ Trong bơh phung rluk jêng sŏng tĭng măt păng nơm, Ƀiălah bunuyh blau mĭn kâp iăt nau ntĭm nti.

¹⁶ Bunuyh rluk mpơl ro nuih n'hâm ji nuih, Ƀiălah bunuyh blau mĭn mƀăr lơi nau ƀư bêk prêng păng nơm.

¹⁷ Nơm mbơh nau ngăn ngơi nau sŏng srăng, Bi bunuyh mbơh mƀruh knŏng nkoch bri nau ndơm.

¹⁸ Nau ngơi mâu njrăng ôh jêng nâm bu ntâp ma đao, Ƀiălah mpiăt phung blau mĭn jêng djôt nau blau ƀư bah.

¹⁹ Bâr ngơi nanê̆ ngăn gŭ nâp n'ho ro, Bi mpiăt ngơi mƀruh gŭ knŏng ƀât lât dơm.

²⁰ Nuih n'hâm phung nchră nau mhĭk prăp ma nau ndơm, Ƀiălah nuih n'hâm bunuyh ƀư nau đăp mpăn bêng nau răm maak.

²¹ Mâu geh ôh du ntil nau mhĭk tât ma bunuyh sŏng srăng, Ƀiălah phung ƀai nkŭm bêng ma nau mhĭk tât.

²² Bâr ngơi mƀruh jêng nau tâm rmot đah Brah Yêhôva, Bi ma bunuyh ƀư nau nanê̆ ngăn mra ƀư maak nuih n'hâm Păng.

²³ Bunuyh blau mâu ngơi ntưih ôh nau gĭt blau, Nuih n'hâm phung rluk mpơl nau brŭt ndrăng

²⁴ Ti bunuyh gơih mra djôt nau dơi chiă uănh, Bi ti bunuyh ƀlao mra pah kan jan dĭk.

²⁵ Nau rngot tâm nuih n'hâm ƀư ma kon bunuyh mĭn rvê, Ƀiălah du nau ngơi ueh ƀư maak nuih n'hâm.

²⁶ Bunuyh sŏng srăng njŭn leo trong ăn mĭt jiăng păng, Bi trong phung ƀai ƀư ăn khân păng nhhơt vĭ hêng.

²⁷ Bunuyh ƀlao mâu gŭch ôh puăch păng hŏ nchron geh jêh, Ƀiălah bunuyh gơih dơi geh drăp ndơ khlay.

²⁸ Tâm trong sŏng srăng geh nau rêh, Chuat hăn tâm trong păng mâu geh nau khĭt.