Nau Hôr 11 - Nau Brah Ndu Ngơi 2023

¹ Brah Yêhôva rmot ngăn ma njing tih, Ƀiălah Păng maak ma play njing di.

² Tơlah nau sưr tât, nau prêng ăt tât lĕ; Ƀiălah nau blau mĭn hôm gŭ ndrel ma phung dêh rhêt.

³ Nau di phung sŏng têk ndrêng khân păng, Bi nau tih mhĭk phung mâu răp jăp ƀư rai khân păng.

⁴ Drăp ndơ mâu geh ôh nau khlay ta nar nau ji nuih, Ƀiălah nau sŏng srăng tâm rklaih bơh nau khĭt.

⁵ Nau sŏng srăng bơh bunuyh n'hêl nanê̆ ƀư song trong păng, Bi nau mhĭk bơh bunuyh ƀai ƀư cha lôt păng.

⁶ Nau sŏng srăng bơh phung sŏng tâm rklaih khân păng, Ƀiălah nuih n'hâm kơnh bơh phung ƀlêp ƀlêr sân dăk khân păng.

⁷ Lah phung ƀai khĭt, nau păng kâp gân rai lôch, Jêh ri nau kâp gân bơh phung djơh janh ăt rai jêng nhhŭk tŭk.

⁸ Bunuyh sŏng srăng dơi rklaih bơh nau rung răng, Bi bunuyh djơh mhĭk ntrok ntŭk păng.

⁹ Phung mâu chroh sŏk bâr mbung ƀư rai phung chiau meng, Ƀiălah bunuyh sŏng srăng dơi tâm rklaih yor nau blau mĭn.

¹⁰ Lah bunuyh sŏng srăng geh nau ueh uĭn, lĕ rngôch toyh răm maak, Jêh ri lah phung ƀai rai yot pôri geh bâr troh rhơn.

¹¹ Ma nau ueh uĭn phung sŏng, ƀon geh nau n'hao, Ƀiălah yor mbung phung djơh ngơi mhĭk, bu n'glưh lơi ƀon.

¹² Mbu nơm mưch ma phung chiau meng păng jêng bunuyh mâu gĭt vât, Ƀiălah bunuyh geh nau gĭt rbăng gŭ rklăk.

¹³ Nơm dăng nkoch bri mpơl lĕ nau ndâp, Bi ma bunuyh khư nau rnơm nsing prăp ndâp nau kan êng păng.

¹⁴ Mâu geh kôranh chiă uănh, phung ƀon lan mra rlâm tŭp, Ƀiălah yor geh âk phung kơl nchră păng dơi geh nau đăp rmên.

¹⁵ Mbu nơm dơn râng ăn phung bu năch mra mâp nau mhĭk, Ƀiălah mbu tâm rmot nau dơn râng nây geh nau đăp mpăn ngăn.

¹⁶ Bu ur blau yô̆ dơi geh nau yơk, Bi phung bu klâu dăng ktang mra dơi geh drăp ndơ.

¹⁷ Bunuyh blau yô̆ ƀư ueh ma huêng păng nơm, Bi phung janh ƀai ƀư rai săk jăn.

¹⁸ Bunuyh ƀư nau ƀai dơn rnoh nkhôm ma nau ndơm, Ƀiălah bunuyh srih nau sŏng srăng dơi geh nau nkhôm n'hêl nanê̆ ngăn.

¹⁹ Bunuyh gŭ nâp tâm nau sŏng srăng leo tât ma nau rêh, Bi nơm tĭng joi nau ƀai njŭn tât nau khĭt.

²⁰ Brah Yêhôva tâm rmot ma phung geh nuih n'hâm kue, Ƀiălah Păng hâk maak ma bunuyh geh trong bu mâu dơi nduyh.

²¹ Nanê̆ phung ƀai mâu klaih ôh bơh nau tâm rmal, Ƀiălah noi deh phung sŏng srăng mra dơi rklaih.

²² Du huê bu ur ueh ƀiălah mâu geh ôh nau gĭt mĭn Tâm ban ma du mlâm rvang mah văn ta muh sŭr.

²³ Nau ji hir ma phung sŏng srăng mra dơi geh nau ueh, Bi nau kâp gân phung ƀai knŏng jêng nau ji nuih.

²⁴ Geh bunuyh pă ăn bu drăp ndơ păng nơm, lơ ntop geh âk lơn đŏng; Geh đŏng bunuyh mbeh krêp ir, ƀiălah knŏng geh nau pưt kƀah.

²⁵ Bunuyh geh nuih n'hâm lŏng mra dơi geh nau ndrŏng, Mbu nơm ăn bu nhêt dak, păng nơm mra dơi geh dak nhêt.

²⁶ Ƀon lan rak rtăp ma nơm prăp kuăn ba phe ma păng nơm, Ƀiălah ăn nau ueh uĭn ma bunuyh tăch lơi păng.

²⁷ Mbu nơm joi nau ueh mra mâp nau yô̆, Mbu nơm tĭng joi nau mhĭk, nau mhĭk mra tât ma păng.

²⁸ Mbu nơm rnơm nsing ma drăp ndơ păng nơm mra rlâm tŭp, Bi ma bunuyh sŏng srăng mra geh jêng lơn nâm bu n'ha si ndrêh.

²⁹ Mbu nơm ƀư uh ah rnăk vâl păng nơm, mra dơn sial ƀư jêng drăp ndơn, Bi bunuyh rluk mra jêng dĭk ma bunuyh geh nau blau mĭn.

³⁰ Play bơh bunuyh sŏng srăng jêng tơm si nau rêh, Bunuyh blau mĭn dơi njŭn leo âk huêng bu.

³¹ Tơlah bunuyh sŏng srăng dơi mplơ̆ sĭt ta neh ntu aơ, Pôri nơm djơh mhĭk jêh ri nau tih mra mplơ̆ sĭt tanăp măt!